50. यीशु वापस लौटकर आयन्या

लगभग 2,000 वर्ष लक, संसार मा सर्व जागा बरत्या लगभग लक जास्त लोक मसीह यीशु को बारामा शुभ संदेश ला आयकत होता. कालेसिया उनत्ती करत होती. यीशु न वादा करीस की वो संसार को अंत मा वापस आवन. जर वो आब वापस नई आयो हा, तरीपण वो आपलो वादा ला पूर्ण करन.

जब की आपण यीशु को वापस आब की प्रतीक्षा करत हा. परमेश्वर आमरो पासलक योन रितीन जीवन जिबकी इच्छा करत हा, जो पवित्र हा अन् जो ओको आदर करते. जब यीशु पृथ्वी बऱ्या रहत होतो तब ओन बलीस, “मोरो चेला संसार भर मा सर्वा जागा का लोकमान ला परमेश्वर को राज्य को बारामा शुभ संदेश प्रचार करन अन् तब अंत आय जान.”

लगीतसी जातियो न आब पर्यंत यीशु को बारा मा नई आयकीस हा. स्वर्ग मा जाबको पहिले यीशु न मसीहीयो लस वय लोकमान ला शुभ संदेश सुनाबला सांगिस, जोन एला कबक नई आयकीस हा. उनला बलीस, “जाओ अन् सर्वा जातियो का लोकमान ला चेला बनाओ.” कटाई करबसाठी खेत पक गया हा.”

यीशु न यो पण बलीस, “कोणी व्यक्ती को सेवक अन् स्वामी पासलक मोठो नई होत. यो संसार का महत्वपूर्ण लोकमान न मोरो संग नफरत करीस अन् मोरो कारण वय तुमला पण सतावन अन् मार टाकन. यो संसार मा तुम्ही पीडित होय जान, पण मजबूत बनो, कारण मीनं शैतान ला हराय टाक्यवून जो यो संसार बऱ्या शासन करते हा. जर तुम्ही अंत पपर्यंत मोरी विश्वासयोग्य बन्या रहो, त परमेश्वर तुम्हला बचावन.”

यीशु न आपलो चेला ला समझाबसाठी एक कहानी सुनाईस की संसार को अंत होन त लोकमान संग काय होन. ओन बलीस, “कोणी व्यक्ती न आपलो खेत मा चांगलो बीज बोईस. जब वो सुते होता तब ओकी शत्रू आयो अन् गहू को बीज को बीचमा जंगली झाड को बीज ला बोय देईस अन् मंग वो चली गया.”

"जब झाड अंकुरित भया तब सेवको न वो व्यक्ती ला बलीस, “हे स्वामी, तुनं त आपलो खेत मा चांगलो बीज बोयो होतस. त मंग योकोमा जंगली झाड कावून हा?” वो व्यक्ती न जवाब देईस, “फक्त मोरो शत्रूच उनला बोवनु चाहन. यो मोरो कोणी शत्रू हा जेन असे करीस हा. “

"वय सेवको न आपलो स्वामी ला जवाब देईस, काय आपुनला जंगली झाड ला उखाद देबला पाहिजे? वो स्वामी न बलीस, नई. जर तु असे करस त तु काही गहू ला पण उखाड देओ. कटाई को वेळ पर्यंत वाट देखो. तब जंगली झाड ला गठ्ठा मा जमा कर ले ताकी तुम्ही ओला जालाय स्को. पण गहू ला मोरो खेत मा लेयकेन आबो.”

चेला न यो कहानी को मतलब नई समझीस, योकोसाठी उन्होन यीशु ला समझाबसाठी निवेदन करीस. यीशु न बलीस, “चांगलो बीज बोने वालो व्यक्ती मसीह को प्रतिनिधित्व करत हा. खेत संसार को प्रतिनिधित्व करत हा. चांगलो बीज परमेश्वर को राज्य का लोकमान को प्रतिनिधित्व करत हा.”

"जंगली झाड वय दृष्ट जन , शैतान को लोकमान का प्रतिनिधित्व करते, ज्योन जंगली झाड ला बोय देईस होतीस. कटाई यो संसार को अंत को प्रतिनिधित्व करते अन् कटाई करने वालो परमेश्वर को स्वर्गदूत को प्रतिनिधित्व करते.”

"जब संसार को अंत होन तब स्वर्गदूत वय सर्वा लोकमान ला एक साथ जमा करन जो शैतान का हा. वय स्वर्गदूत उनला एक लगीत गरम आग मा फेक देन. वामा वय लोक भयंकर सताव मा रोवन अन् आपला दात पीसन. पण जो लोक धर्मी हा, जिन्होन यीशु को अनुसरण करीस हा, वय उनका परमेश्वर पिता को राज्य मा सूर्य को सारखा चमकन.”

यीशु न यो पण बलीस हा की वो संसार को अंत होबोको पईले पृथ्वी बऱ्या लौटके आवन. वो वोच तरीका न वापिस आवन जसे वो गया होतो. अर्थात ओको पास वास्तविक शरीर रहन अन् वो आकाश मा बादल बऱ्या सवार होयकेन आवन. जब यीशु लौटके आवन, त हर एक मसीही जो मर गयो हा, वो मरे हुवे मातलक जी उठन अन् उनला आकाश मा भेटन.

तब जो मसीही आब पण जितो हा वय आकाश मा उचाल लेय जान अन् वय दुसरा मसीही को संग शामिल होय जान जो मरे हुवो मातलक जी उठ्या. वय सर्वा वामा यीशु का संग रहन. ओको बादमा, यीशु आपलो लोकमान को संग रहन. जब वय एक साथ रहत हा त उनको पास हमेशा साठी पूर्ण शांती रहन.

यीशु न ओको बऱ्या विश्वास करने वालो हर एक जन ला एक मुकुट देबकी प्रतिज्ञा करीस हा. वय हमेशासाठी परमेश्वर को संग हर एक वस्तू बऱ्या शासन करन. उनको पास सिद्ध शांती रहन.

पण परमेश्वर वय सर्वा को न्याय करणे जो यीशु बऱ्या विश्वास नही करत. वो उनला नरक मा टाक देन. वामा वय रोवन अन् आपला दात पीसन अन् वय हमेशा पिडीत होत रहन. कब न बुझनेवाली आग उनला लगातार जलावत रहन अन् किडा उनला खाबला कबक नई रुकनार.

जब यीशु वापस आवते त वो पूर्ण रिती न शैतान ला अन् ओको राज्य ला नष्ट कर देन. वो शैतान ला नरक मा टाक देन. वामा शैतान हमेशासाठी जळत रहन, वय सर्वा संग ज्योन परमेश्वर की गोष्ट ला मानबोको बजाय शैतान को मंग चलबोको चुनाव करीस.

कारण आदम अन् हवा न परमेश्वर की अनाज्ञा करिता करीस होतीस अन् पाप ला यो संसार मा लेयकेन आया होता. परमेश्वर न उनला श्राप देईस अन् ओला नष्ट करबोको निर्णय लेईस. पण एक दिवस परमेश्वर एक नवीन स्वर्ग अन् एक नवीन पृथ्वी की रचना करन, जो सिद्ध होन.

यीशु अन् ओको लोक या नवीन पृथ्वी बऱ्या रहन अन् वय हमेशासाठी सर्वा वस्तू बऱ्या शासन करन. वो लोकमान को डोळा लक हर एक आसू ला पूस टाकन. आब कोणी पण पिडीत या दुखी नई होन. अन् वामा काहीच बुराई नई रयनार. यीशु आपलो राज्य बऱ्या न्यायपूर्वक अन् शांती को संग शासन करन. वो हमेशा साठी आपलो लोकमान संग रहन.