17. दाऊद को संग परमेश्वर को वादा

शाऊल इस्राइल को पहिलों राजा होतो। ऊ लंम्बो अखिन सुंदर होतो, जसा वय लोख देखत होता एकदम तसोच। इस्राइल पर आपरो राज्य को पहिलों काई साल वरी शाऊल एक अछो राजा होतो। पर बाद मा ऊ बेकार आदमी बन गएव ओन परमेश्वर को बात ला नहीं मानिस, एकोलाईक परमेश्वर न एक दूसरों आदमी ला पसंद करिस ऊ एक दिवस ओको जागा पर राजा बनेव।

परमेश्वर न दाऊद नाव को एक जवान इस्राएली आदमी ला पसंद कर के एक दिवस शाऊल को जागा पर राजा होन लाईक तैयार करणों सुरुकरिस। दाऊद बैतलहम नगर को एक सेरकी होतो। कई बार त, दाऊद न सेर ला अखिन भालू दुई ला मार डाकी होतीस काहेकी दाऊद को राखन को समय मा ओको बाप को सेरी मेंढीहिन पर दोडात होता त। दाऊद एक सीदों अखिन धर्मी आदमी होतो। वन परमेश्वर पर भरोसा करिस अखिन ओको बातहिन ला मानिस।

जब दाऊद आब जवान आदमीच होतो, वन लंम्बो - चौडो गोलियत को विरुद्द लड़ाई करिहोतीस। गोलियत एक बहुत साजरों सिपाई होतो। ऊ बहुत मजबूत अखिन लगभग तीन मीटर लंम्बो होतो! पर परमेश्वर न गोलीयत ला मारन लाईक अखिन इस्राइल ला बचावन लाईक दाऊद की मदत करिस। एकोबाद, दाऊद न इस्राइल का दुशमनहिन पर कईयो बार जीत हासिल करिस। दाऊद एक मोठो सिपाई बन गएव, अखिन वन बहुत सा लड़ाईहिन मा इस्रएली सिपाई की अगुवाई करिस। लोखहिन न ओकी बहुत तारीफ करिन।

लोखहिन न दाऊद सीन एतरों प्यार करिन की शाऊल ओको सीन जरन लगेव। आखरीमा शाऊल ओला मार ड़कन ला देखत होतो, एकोलाईक दाऊद ओको सीन अखिन ओको सिपाईहिन सीन लुकान लाईक जंगल मा पराय गएव। एक दिवस, जब शाऊल अखिन ओका सिपाई दाऊद ला ढूडत होता त शाऊल एक भूयारों मा गएव। यव ऊच भूयारों होतो जेकों मा दाऊद लुकाएव होतो, पर शाऊल न ओला नही देखीस। दाऊद शाऊल को मग ओको बहुत जवर चली गएव अखिन ओको कपड़ा मालक एक टुकड़ा काट लेईस। बाद मा, जब शाऊल उन भूयारों मालक निकलेव त दाऊद न ओला बुलाय कर वन कपड़ा को टुकड़ा ला देखाईस। एन तरीका लक, शाऊल जान गएव की दाऊद न राजा बनान लाईक ओला मारन लाईक ईनकार भयगएव।

कई समय को बाद मा, शाऊल लड़ाई मा मर गएव, अखिन दाऊद इस्राइल को राजा बन गएव। ऊ एक अच्छों राजा होतो, अखिन लोखहिन न ओको सीन प्यार करीन। परमेशर न दाऊद ला आशिषित करीसेस अखिन ओला सफल बनाईस। दाऊद न कई लड़ाई ला लड़िसे, अखिन परमेश्वर न इस्राइल का दुशमनहिन ला हरावनों मा ओकी मदत करिस। दाऊद न यरुशलेम नगर ला जीत सारी ओला आपरी राजधानी बनाईसेस, जाहाँ ऊ रव्ह अखिन राज्य करिस। दाऊद चालीस साल वरी राजा रहेव। एन समय को बेरामा, इस्राइल ताकतवर अखिन धनी बन गएव।

दाऊद एक मंदिर बनावन लाईक सोचत होतो जेको मा पूरा इस्राएली परमेश्वर की आराधना कर सिकेत अखिन ओको लाईक बलिदान कर सीकेत। लगभग 400 साल वरी, वय लोख मूसा को बनाएव मिलापवलों तम्बू मा परमेश्वर की आराधना करत होता अखिन ओको लाईक बलिदान चढावत होता।

पर वहाँ नातान नाव को एक भविष्यद्वक्ता होतो। परमेश्वर न ओला दाऊद सीन यव कवन लाईक धाड़िस : “ तून बहुत सारी लड़ाई लड़िसेस, एकोलाईक तू मोरो लाईक येन मंदिर नोको बनावजों। तोरों टुरा येला बनाए। तरी, मी तोला बहुत आशिषित करत रहु। तोरी एक संतान हमेशा लाईक मोरो लोखहिन पर राजा को रूप मा अधिकार राखे। ” हमेशा को लाईक अधिकार राखने वालो ऊ दाऊद को एकमात्र संतान मसीह होतो। मसीह परमेश्वर को चुनेव आदमी होतो जो दुनिया को लोखहिन ला उनको पापहिन सीन बचाए।

जब दाऊद न नातान को संदेश ला आयकिस त वन परमेश्वर को धन्यवाद करिस अखिन ओकी स्तुति करिस। परमेश्वर ओको सम्मान ला बढ़ावत होतो अखिन ओला बहुत सारो आशीर्वाद देत होतो। बेशक, दाऊद नहीं जानत होतो की परमेश्वर येन बातहिन ला कब करे। येन बेरा मा आमी जान सेजन की इस्राएलिहिन ला एक लंबो बेरा वरी, लगभग 1000 साल वरी मसीह को आवन की बाड़ देखनों पड़े।

दाऊद न बहुत साल वरी न्यायपूर्वक आपरो लोखहिन पर अधिकार रखीस। वन मोठों सम्मान लक परमेश्वर को बातहिन ला मानिस अखिन परमेश्वर न ओला आशिषित करीसेस। हालाँकि, आपरो जीवन को अंत मा ओन परमेश्वर को बिरुद बहुत मोठो गुना करी होतीस।

एक दिवस दाऊद न आपरो महल लक बाहेर झांकिस अखिन एक सुंदर बायको ला आंगपाय धोवता देखीस। ऊ ओला नहीं जानत होतो, पर वन मालूम कर लेईस की ओको नाव बतशेबा होतो।

आपरो नजर ला हटावन को सिवाय, दाऊद न ओला आपरो जवर आन लाईक कोईला धाड़िस। ऊ ओको संग सोएव अखिन ओला वापस घर धाड़ देईस। थोड़ों समय को बाद मा बतशेबा न यव क्यके दाऊद को जवर संदेश धाड़िस की वा पेट लक से।

बतशेबा को नवरा ऊरिय्याह नाव को एक आदमी होतो। ऊ दाऊद को खास सिपाई मालक एक होतो। येन समय मा ऊ लड़ाई करन लाईक बाहेर गएव होतो। दाऊद न ऊरिय्याह ला लड़ाई मा लक वापस बुलाय सारी ओला आपरो बायको संग रवन लाईक कहीस। पर दूसरा सिपाई लड़ाई माच होता एकोलाईक ऊरिय्याह न घर जान लाईक स्याप मना कर देईस। अधिक दाऊद न ऊरिय्याह ला वापस लड़ाई मा धाड़ देईस अखिन सेनापति सीन ओला लड़ाई मा असो जागा मा राखन लाईक कहीस जहाँ दुशमन सब लक जादा शक्तिशाली सेत जहा ऊ मारेव जाए। त असो भएव की ऊरिय्याह लड़ाई मा मारेव गएव।

ऊरिय्याह को लड़ाई मा मर जान को बाद मा दाऊद न बतशेबा सीन बिहाया कर लेईस। बाद मा वन दाऊद को टुरा ला पैदा देईस। दाऊद न जो करिहोतीस ओको सीन परमेश्वर जादा गुसा होतो, एकोलाईक वन नातान भविष्यद्वक्ता ला दाऊद ला यव सांगन लाईक धाड़िस की ओको पाप केतरों बेकार होतो। दाऊद न आपरो पाप लाईक माफी मागीस अखिन परमेश्वर न ओला माप कर देईस। आपरो बचेव जीवन मा, आपरो मुसकिल समय मा भी दाऊद परमेश्वर को मग - मग चलेव अखिन ओको बातहिन ला मानिस।

पर दाऊद को टुरा मर गएव। येन तरीका लक परमेश्वर न दाऊद ला दंडित करिस। येकों अलावा, दाऊद को मरत वरी, ओका आपरा परिवार का काई लोखहिन न ओको बिरुद लड़ाई करिन, अखिन दाऊद की आपरि शक्ति कम भय गई होती। पर परमेश्वर विश्वासयोग्य होतो अखिन आब भी वन ऊ करिस जो ओन दाऊद सीन करन को वादा करी होतीस की ऊ करे, हालाकी दाऊद न ओकी आज्ञा नहीं मानि होतीस। बाद मा, दाऊद अखिन बतशेबा ला दूसरा लेकरू पैदा भया, अखिन ऊन ओको नाव सुलैमान राखिस।