18. बड्वारा भया राज्य

दाऊद राजा न चालीस साल वरी राज करिस। तब ऊ मर गएव, अखिन ओको टुरा सुलैमान न इस्राइल पर राज्य करणो चालू करिस। परमेश्वर न सुलैमान सीन बात करिस अखिन ओको सिन पूछिस की ऊ सब लक जादा का चाव्हसे की परमेश्वर ओको लाईक करे। सुलैमान न परमेश्वर सिन मागीस की ऊ ओला बहुत अकलवर बनाय देए। एन बात न परमेश्वर ला खुश कर देईस, एकोलाईक परमेश्वर न सुलैमान ला संसार को सबलक जादा अकलवर आदमी बनाय देईस। सुलैमान न बहुत सारी बातहिनला सीखीस अखिन ऊ एक अकलवर राजा होतो। परमेश्वर न ओला बहुत मोठों पैसा वालो बनाय देई होतीस।

यरूशलेम मा सुलैमान न वन मंदिर ला बनाईस जेकों लाईक ओको बाप न योजना बनाई होतीस अखिन सामाईन ला जमा करि होतीस। आता लोख मिलापवालों खोपड़ी मा रव्हन को बजाय मंदिर मा परमेश्वर की आराधना करत होता अखिन ओको लाईक बलि चड़ावत होता। परमेश्वर आयकर मंदिर मा उपस्थित रव्हत होतो, अखिन वहाँ ऊ आपरो लोखहिन को संग रव्हत होतो।

पर सुलैमान न दूसरों देशईन को बायकोहिन सिन प्यार करिस। वन बहुत सारी, लगभग 1000 बायकोहिन सीन बिहाया करसारी परमेश्वर को आज्ञा ला नहीं मानिस! इनको मालक बहुत सारी बायका दूसरों देशहिन मालक आई अखिन आपरो संग आपरो देवताहिन ला भी आन्नीन अखिन ओकी उपासना करणों सुरू राखिन। जब सुलैमान बुड्गा भएव त वन भी उनको देवताहिन की उपासना करिस।

एन कारण लक परमेश्वर सुलैमान सिन गुसा होतो। वन कहीस की ऊ इस्राइल देश ला दुई भाग मा बाट देन को कारण ओला दंड देहे। ऊ सुलैमान को मरण को बाद मा असो करे।

सुलैमान को मरण को बाद मा, रहबाम राजा बनेव। इस्राइल देश का पूरा लोख ओला आपरो राजा को रूप मा मंजूर करन लाईक एक साथ जमा भया। उन्न रहबाम सीन शिकायत करिन की सुलैमान न उनको सीन बहुत भारी परिश्रम करवाई होतीस अखिन बहुत सारो कर मागी होतीस। उन्न रहबाम सीन आग्र करिन की उनको सीन कम काम कराओ।

पर रहबाम न उनला मोठों मूर्खता लक जवाब देईस, “ तुमि कसेव की मोरो बाप सुलैमान न तुमारो लक कठोर परिश्रम करवाईस। पर मी तुमला ओको सीन जादा दु:खी करू। ”

जब लोखहिन न ओला असो बोलता आयकिन त उनको मालक कई लोखहिन न ओको विरुद लड़ाई झगड़ा करिन। दस पीड़ीहिन न ओला छोड़ देईन ; ओको संग आता मात्र दुई पीड़ी बची। इन दुई पीड़ीहिन न खुद ला यहूदा को राज्य कहिस।

बाकी का दस पीड़ीहिन न यारोबाम नाव को एक आदमी ला आपरो राजा बनायलेईन। या पीड़ी देश को उत्तर-पूर्वी भाग मा होता। उन्न खुद ला इस्राइल को राजा कहिन।

पर यारोबाम न परमेश्वर को विरुद लड़ाई झगड़ा करिस अखिन लोखहिन सिन पाप करवाईस। वन आपरो लोखहिन सिन उपासना करण लाईक दुई मूर्तिहिन ला बनाईस। वय आता यहूदा को राज्य मा यरूशलेम मा परमेश्वर को मंदिर मा ओकी आराधना करण लाईक नहीं गया।

यहूदा अखिन इस्राइल का राज्य दुशमन बन गया अखिन जादा एक दूसरों ईन को विरुद लड़ाई करण लगया।

इस्राइल को नवीन राज्य मा, पुराच राजा दुष्ट होता। इनको मालक बहुत राजा उनको जागा मा राजा बनन की ईक्छा रखान वाला दूसरा इस्राएलिईन को सिन माराया गया होता।

इस्राइल राज्य का पूरा राजाहिन न अखिन जास्तीच लोखहिन न मूर्तिहिन की उपासना करिन। जब उन्न असो करिन, त वय जादातर वेश्याहिन को संग सोया अखिन यहाँ वरी की कई बार मूर्तीहिन को सामने लेकरुहिन की बलि तक्के करिन।

यहूदा राज्य को राजा, दाऊद का लेकरू होता। एन राजाहिन मालक कई अच्छा आदमी होता जे न्यायपूर्वक राज्य करिन अखिन परमेश्वर की आराधना करिन। पर यहूदा का जादातर राजा दुष्ट होता। उन्न दुष्टता लक राज्य करिन, अखिन मूर्तिहिन की उपासना करिन। यहाँ वरी की इनको मालक कई राजाहिन न झुठा देवताहिन को सामाने आपरो लेकरूहिन की बलि कर देईन। यहूदा का जादातर लोखहिन न तरी परमेश्वर को विरुद बलवा करिस अखिन दूसरा देवताहिन की उपासना करिन।