19. भविष्यद्वक्ता

परमेश्वर हमेशा इस्राएलिहिन को जवर भविष्यद्वक्ताहिन ला धाड़तो रव्हत होतो। भविष्यद्वक्ता परमेश्वर सिन संदेशहिन ला आयकत होता अखिन डबल लक वन लोखहिन ला सांगत होता।

जब अहाब इस्राइल राज्य पर राजा होतो त वन समय मा एलिय्याह भविष्यद्वक्ता होतो। अहाब एक खराब आदमी होतो। वन झूठा बाल देवताहिन की उपासना करण लाईक लोखहिन ला मजबूर करी होतीस। एकोलाईक एलिय्याह न अहाब सिन कहीस की परमेश्वर वन लोखहिन ला दंडित करण जाय रहीसे। वन ओकोसिन कहीस, “ जेंधावर वरी मी पानी आवन लाईक नहीं कहूँ तब वरी इस्राइल को राज्य मा पानी नहीं आव अखिन ओस नहीं पड़न की। ” एन बात लक अहाब ला एतरों गुशा भएव की वन एलिय्याह ला मार देन को सोच लेईस होतीस।

एकोलाईक परमेश्वर न एलिय्याह सिन कहीस की ऊ जंगल मा जाय सारी अहाब सिन लुकाय जाए। एलिय्याह जंगल मा वन झरना को जवर गएव जहाँ परमेश्वर न ओला जान लाईक कई होतीस। हर सकारिच अखिन हर श्यामला, पक्षी एलिय्याह लाईक रोटी अखिन माँस धरकर आवत होता। यन पुरो समय मा, अहाब अखिन ओका सिपाई एलिय्याह ला ढूंडत रया, पर वय ओला ढूड नहीं सीकिन।

पानी नहीं आवन को काई समय को बाद मा ऊ झरना वार गएव। एकोलाईक एलिय्याह जवर कोच एक देश मा चली गएव। वन देश मा एक गरीब विधवा होती वोला एक टुरा होतो। ओको जवर भोजन लगभग खत्म भए गएव होतो काहेकी वहाँ कोईच फसल नहीं भई होती। तरी, वन बायको न एलिय्याह की देखरेख करिस, एकोलाईक परमेश्वर न ओकी अखिन ओको टुरा की आवश्यकताहिन ला पुरो करीस, एन कारण लक ओको पीट की हांढी अखिन ओको तेल की डपकी कभी खाली नहीं भई। वन पुरो अकाल को समय मा उनको जवर भोजन होतो। एलिय्याह कई साल वरी वहाँ रहेव।

साढ़े तीन साल को बाद मा, परमेश्वर न एलिय्याह सीन कहीस की ऊ डबल लक पानी धाड़े। वन एलिय्याह सिन वापिस इस्राइल को राज्य मा जायसारी अहाब सिन बोलन लाईक कहीस। एकोलाईक एलिय्याह अहाब को जवर गएव। जब अहाब न ओला देखीस त वन कहीस, “ अच्छा तू आस, गड़बड़ करने वालो! ” एलिय्याह न जवाब देईस, “ गड़बड़ करने वालो त तू सेस! तुन यहोवा ला छोड़ देईसेस। ऊ सही परमेश्वर से, पर तू बाल की उपासना करसेस। आता तोला इस्राइल राज्य का पूरा लोखहिन ला कर्मेल पाहड़ पर धरके आनो से। ’

अधिक पूरा लोख कर्मेल पाहड़ पर गया। वय आदमी भी आया जो कव्हत होता की वय बाल को संदेशहिन ला बोल सेत। वय बाल का भविष्यद्वक्ता होता। वय पूरा 450 होता। एलिय्याह न वन लोखहिन सिन कहीस, “ कब वरी तुमि आपरो मनहिन ला फिराए सारी ढेवों ? अगर यहोवा परमेश्वर से त तुमी ओकी आराधना करो! अगर बाल परमेश्वर से त तुमी ओकी उपासना करो! ”

तब एलिय्याह न बाल को भविष्यद्वक्ताहिन लक कहीस, “ एक बईल ला बली करसारी ओको माँस ला बलिदान करन ला एक वेदी पर ठेवो, पर इस्तों नोको लगावों। ओको बाद मा मी भी तसोच करू, अखिन एक अलग वेदी पर मी वन माँस ला राखू। तब कदी परमेश्वर वेदी पर इस्तों पाडे त तुमि समज लेवों की ऊ सही परमेश्वर से। ” तब बाल को भविष्यद्वक्ताहिन न एक बली ला तैयार करिन पर इस्तों नहीं लगाईन।

तब बाल का भविष्यद्वक्ताहिन न बाल सिन प्रार्थना करिन, “ अ बाल, आमरी आयेक! ” पुरो दिवस ऊन प्रार्थना करिन अखिन चिल्लाया अखिन यहाँ वरी की खुद ला चाकुईन लक काट लेईन, पर बाल न जवाब नहीं देईस, अखिन वन काई इस्तों नहीं पाडिस।

बाल का भविष्यद्वक्ताहिन न बाल सीन प्रार्थना करणों मा लगभग पुरो दिवस निकाल देईन। आखरी मा: उन्न प्रार्थना करणों बंद कर देईन। तब एलिय्याह न दूसरों बईल को माँस ला परमेश्वर को वेदी पर राख़ देईस। अन्न ओको बाद मा, वन लोखहिन सिन पानी का मोठा बर्तनहिन लका वन बलिदान पर तब वरी डाकन लाईक कहीस जब वरी माँस, काड़ीहिन, अखिन यहाँ वरी की वेदी को आचू बाचू की जमीन पुरो तरीका लक ओली नहीं होयजाय।

तब एलिय्याह न प्रार्थना करिस, “ अ यहोवा, अब्राहम, इसहाक, अखिन याक़ूब को परमेश्वर, आमला देखाओ की तुमि इस्राइल का परमेश्वर सेव अखिन यव की मी तुमरो सेवक आव। मोला जवाब देव जसो की ये लोख जानेती की तुमिच सही परमेश्वर सेव। ”

ओंधावरच, बादर मालक इस्तो पड़ेव अखिन वन माँस ला, काड़ीहिन ला, चट्टान ला, माटी ला, अखिन यहाँ वरी की वेदी को आचू बाचू मा पानी ला भी जराय डाकिस। जब लोखहिन न यव देखिन, त वय जमीन पर पडया अखिन कहिन, “ यहोवाच परमेश्वर से! यहोवाच परमेश्वर से!”

तब एलिय्याह न कहीस, “ बाल का एक भी भविष्यद्वक्ता बच सारी जाय नोको सिकेत! ” एकोलाईक लोखहिन न बाल को भविष्यद्वक्ताहिन ला धर लेईन अखिन उनला वहाँ लक अलग लिजाईन अखिन उनला मार डाकिन।

तब एलिय्याह न अहाब राजा सिन कहीस, “ लवकरच आपरो घर चलिजाय, काहेकी पानी आवनों वालो से। ” लवकरच बादर न झाक देईस, अखिन मनमाना पानि आवनों चालू भयेव। यहोवा वन वारेव ला खत्म करत होतो। एको लक मालूम चलेव की यहोवाच सही परमेश्वर से।

जब एलिय्याह न आपरो काम ला खत्म करीस, त परमेश्वर न एलिशा नाव को एक आदमी ला आपरो भविष्यद्वक्ता होन ला डूडिस। परमेश्वर न एलिशा को कारण लक बहुत सारा चमत्कार करिस। एक चमत्कार नामान को संग भएव। ऊ एक दुशमानहिन को मुखिया होतो, पर वोला कोड को एक बेकार रोग भय गएव होतो। नामान न एलिशा को बारे मा आयकि होतीस, एकोलाईक ऊ एलिशा को जवर आएव अखिन ओला ओन अच्छों करण लाईक आग्र करिस। एलिशा न नामान सिन कहीस की जायकर यरदन नदी को पानी मा सात बार डुबकी मार ले।

नामान गुशा भए गएव। वन असो करण सिन मना कर देईस, काहेकी ऊ ओला मूर्खता को काम लगत होतो। पर बाद मा ओन आपरो मन ला बदल देईस अखिन जायकर यरदन नदी को पानी मा सात बार डुबकी मार लेईस। जब आखरी बार ऊ पानी मालक बाहेर आएव त परमेश्वर न ओला अच्छों कर देईस।

परमेश्वर न इस्राइल को लोखहिन को जवर दूसरा बहुत सारा भविष्यद्वक्ताहिन ला धाड़िस। वय सपाईहिन न लोखहिन सिन मूर्तिहिन की उपासना बंद करण लाईक कहिन। एको अलावा, उनला एक दूसरों को संग न्यायपूर्वक व्यवहार करणों होतो अखिन एक दूसरों पर दया करणों होतो। वय भविष्यद्वक्ताहिन न लोखहिन ला धमकी देईन की उनला खराब कामहिन ला बंद कर देनो से अखिन एको अलावा परमेशर को बातहिन ला माननों से। अगर वय लोखहिन न असो नहीं करिन त परमेश्वर उनला गुनेगार मान सारी उनको न्याय करे, अखिन उनला अपमानित करे।

जादा समय वरी, वय लोखहिन न परमेश्वर को आज्ञाला नहीं मानि सेन। जादातर उन भविष्यद्वक्ताहिन को संग गलत व्यवहार करिन अखिन यहाँ वरी की कभी कभी उनला मार डाकिस। एक बार, उन यिर्मयाह भविष्यद्वक्ता ला वारेव बेहेर मा डाक देईन अखिन ओला वहाँ मरन लाईक छोड देईन। ऊ बेहेर को अंदर कीचड़ मा धँस गएव। मंग राजा ला ओको पर दया आई अखिन वन आपरो सिपाईहिन ला आदेश देईस की यिर्मयाह को मरन को पहीले ओला बेहेर मालक बाहेर कहाड़ ले।

भविष्यद्वक्ताहिन न परमेश्वर कर लक बोलनों सुरू राखिन भले लोखहिन न ओको सिन नफरत करिन। उन लोखहिन ला धमकी देईन की अगर ऊन कबूल नहीं करिन त परमेश्वर उनला नाश कर देए। उन्न लोखहिन ला यव भी याद कराईन की परमेश्वर न उनको जवर मसीह ला धाडन को वादा करीसेस।