30. यीशु को 5000 लोखहिन ला खानो देनों

यीशु न आपरो चेलाहीन ला प्रचार करन लाईक अखिन लोखहीन ला शिक्षा देन लाईक बहुत सारा अलग-अलग गाँवहिन मा धाड़िस। जब वय वहाँ वापिस भया जहाँ यीशु होतो त ऊन ओला सागीन की ऊन का करि होतीन। तब यीशु न ऊनला समुद्र को दूसरों आंग मा ओको संग एक शान्त जागा मा जायसारि काई समय आराम करन लाईक बुलाईस। अधिक वय एक डोगा पर चंग गया अखिन समुद्र को दूसरों आंग ला चेला चलिगया।

पर वहाँ बहुत सा असा लोख होता जेन यीशु अखिन चेलाहिन ला डोगा मा जाता देखिन होतीन। ये लोख ऊनको लक सामुर समुद्र को दूसरों आंग ला जान लाईक समुद्र को किनारो - किनारो लक पराया। अधिक जब यीशु अखिन चेला चलिगया त लोखहीन को एक मोठों झुंड ऊनकी बाट देखता वय वहाँ पहीले लक होता।

वन भीड़ मा बायकाहिन अखिन लेकरुहिन कि गिनती को बिना 5,000 लक जादा आदमी होता। यीशु न वन लोखहीन पर बड़ो तरस खाईस। यीशु को लाईक वय लोख बगेर चरवाह की भेड़ को समान होता। एकोलाईक वन ऊनला शिक्षा देईस अखिन ऊनको बीच मा जो लोख बीमार होता ऊनला साजरों करिस।

दिवस बुड़तो मा, चेलाहिन न यीशु सिन कहिन, “ आता समय भय गईसे अखिन आजू बाजू मा कोई गाँव नाहात। एन लोखहीन ला जान दे ताकि वय जायसारि खान लाईक काई लेहेत। ”

पर यीशु न चेलाहिन सीन कहीस, “ तुमि ऊनला खान लाईक काई देव!” ऊन जवाब देईन, “ आमी असो कसो कर सिकसेजन ? आमरो जवर मात्र पाँच रोटी अखिन दुई मसरी सेती। ”

यीशु न आपरो चेलाहिन सिन कहीस की वय भीड़ को लोखहीन ला गवत पर 50 - 50 लोखहीन ला बसन लाईक कहो।

तब यीशु न पाँच रोटी अखिन दुई मसरीहिन ला धर सारी स्वर्ग कर देखीस, अखिन वन भोजन लाईक परमेश्वर ला धन्यवाद देईस।

मंग यीशु न रोटी अखिन मसरीहिन ला टुकड़ा करीस। वन लोखहीन ला देन लाईक आपरो चेलाहिन ला वय टुकड़ाहिन ला देईस। चेला वन भोजन ला देन लगया, अखिन ऊ कभी खत्म नहीं भएव! वय पुरा लोख खाय सारी तृप्त भए गया।

ओको बाद मा, चेलाहिन न वन खानो ला जमा करिन जेला खाएव नहीं गएव होतो अखिन वय बारा टोपालीहिन ला भरन लाईक पर्याप्त होतो! ऊ पुरो खानो वन पाँच रोटी अखिन दुई मसरीहिन लक भएव गएव।