31. यीशु को पानी पर चलनों

पाँच हजार लोखहीन ला खानो देन को बाद मा, यीशु न आपरो चेलाहीन ला डोगा मा जान लाईक कहीस। वन ऊनला समुद्र को दूसरो आंग जान लाईक कहीस जबकि ऊ थोड़ों समय लाईक वाहच ऊभो रहेव। अधिक चेला चली गया अखिन यीशु न भीड़ ला बीदा करिस की वय आपरो घर जायेत। एको बाद मा, यीशु प्रार्थना करण लाईक एक पाहाड़ पर चली गएव। वहाँ ऊ एकलों होतो, अखिन वन बहुत रात वरी प्रार्थना करिस।

वन समय मा, चेला आपरो डोगा ला चलावत जात होता, पर हवा ऊनको विरुद मोठो ज़ोर सारी चलत होती। बहुत रात होन को बाद मा भी वय मात्र समुद्र को बीचों बीच माच होता।

वन समय मा यीशु न प्रार्थना करणों बंद करि होतीस अखिन आपरो चेलाहीन को जवर वापिस जानला सुरवात करिस। वन डोगा कर जान लाईक पानी पर चलन लगेव।

तब चेलाहीन न ओला देखिन। वय बहुत डर गया काहेकी ऊन सोचिन की ऊ कोई भूत होए। यीशु जानत होतो की वय डर गया सेत, एकोलाईक वन ऊनला आवाज देय सारी कहीस, “ डरो नोको, यव मी आव! ”

तब पतरस न यीशु सीन कहीस, “ अ प्रभु, अगर तू आस त मोला पानी पर चल सारी तोरो जवर आवन लाईक कव। ’ यीशु न पतरस सीन कहीस, “ आव! ”

अधिक पतरस डोगा पर लक उतर गएव अखिन यीशु को जवर जान लाईक पानी पर चलनों सुरुकरिस। पर थोड़ों दूर जाय सारी, वन आपरो नजर ला यीशु पर लक फेर लेईस अखिन लहरहिन ला देखीस अखिन बड़ी तेज हवा ला महसूस करणों सुरू कर देईस।

तब पतरस डर गएव अखिन पानी मा डूबन लगेव। ऊ चिल्लाएव, “ अ प्रभु, मोला बचाव! ” यीशु न ओधावरच हाथ ला बढाय सारी ओला धर लेईस। तब वन पतरस सीन कहीस, “ तोरो विश्वास बहुत कम से! तोला साजरों लक रवन लाईक तुन मोरो पर भरोसा नहीं करेस ? ”

तब यीशु अखिन पतरस डोगा पर चघया, अखिन ओधावरच हवा को आवनों बंद भय गएव। पानी शान्त भय गएव। चेलाहीन न चकित होय सारी यीशु को सामुर टोघरा टेक देईन। ऊन ओकी आराधना करीन अखिन ओको सीन कहिन, “ सहिमा तू परमेश्वर को टूरा आस। ’