32. यीशु न दुष्टातमा लक ग्रस्त आदमी अखिन एक बीमार बायको ला चंगा करिस

यीशु अखिन ओका चेला आपरो डोगा लक वन सरहेद मा गया जहाँ गिरासेनी लोख रव्हत होता। वय वन सरहेद मा जाय सारी डोगा मालक खालत्या उतर गया।

वहाँ एक आदमी होतो जो दुष्टात्मा लक ग्रस्त होतो।

यव आदमी एतरो ताकतवर होतो की कोई भी ओला बसमा नहीं कर सिकत होता। कई बार लोखहीन न ओको हाथहिन ला अखिन पायहिन ला जंजीरहिन लक भी बाँधीन, पर ऊ ओला तोड़ देत होतो।

ऊ आदमी वन सराहेद मा कब्रहिन मा रव्हत होतो। यव आदमी पुरो दिवस अखिन पुरो रात चिल्लावत रवत होतो। ऊ कपड़ा नहीं पेहरत होतो। अखिन अक्सर खुद ला गोटाहिन लक घायल करत होतो।

ऊ आदमी दौड़ सारी यीशु को जवर आएव अखिन ओको सामुर टोघरा टेक देईस। तब यीशु न वन आदमी को अंदर को दुष्टात्मा सीन बात करिस अखिन कहीस, “ एन आदमी मालक बाहेर आव! ”

वा दुष्टात्मा ऊंचो आवाज लक चिल्लाई, “ अ यीशु परम प्रधान परमेश्वर को टूरा, तोला मोरोसिन का काम से ? कृपा कर सारी मोला नोको सताऊ! ” तब यीशु न वन दुष्टात्मा सीन पूछिस, “ तोरो नाव का से ? ” वन जवाब देईस, “ मोरो नाव सेना से, काहेकी आमी बहुत सेजन। ” ( रोमी सेना मा कई हजार सैनिक को एक झुंड एक “ सेना ” होत होती। )

वय दुष्टात्माहिन न यीशु सीन विनती करिन, “ कृपा कर सारी आमला एन सरहेद मालक बाहेर नो धाडूस! ” वन जवर को पाहाड़ पर सूअरहिन को एक झुंड चरत होतो। एकोलाईक वन दुष्टात्माहिन न यीशु सीन विनती करिन, “ कृपा करसारी आमला वन सूअरईन मा धाड़ दे! ” यीशु न कहीस, “ ठीक से, ओको मा चली जाओ! ”

अधिक वय दुष्टात्मा वन आदमी मालक निकल सारी वन सूअरहिन मा धस गई। वय सूअर दौड़ सारी एक ऊबो टीले पर लक समुद्र मा कूद गया अखिन डूब मरया। वन झुंड मा लगभग 2,000 सूअर होता।

वहाँ पर वन सूअरहिन ला देखरेख करण वाला लोखा होता। जो काई भएव होतो जब ऊन देखिन त वय नगर मा पराय गया। यीशु न जो काई करि होतीस वहाँ ऊन सब ला साहीन। वन नगर का लोख निकल आया अखिन वन आदमी ला देखिन जेकोमा दुष्टात्मा होती। ऊ शान्ति लक, कपड़ा पेहेरेव, अखिन एक सामान्य आदमी को समान व्यवहार करत बसेव होतो।

वय लोख बहूत डराया होता अखिन ऊन्न यीशु सीन जान लाईक कहिन। अधिक यीशु डोगा पर चंग गएव। ऊ आदमी जेकोमा दुष्टात्मा होती वन यीशु को संग जान लाईक विनती कारीस।

पर यीशु न ओको सीन कहीस, “ नहीं। मी चाहुसू की तू घर जाए के सब ला सांग दे की परमेश्वर न तोरो लाईक का करिसे। ऊनला सांग की कसो परमेश्वर न तोरो पर दया करी होतीस। ”

एकोलाईक ऊ आदमी चली गएव अखिन सब ला एन बारेमा सागिस जो यीशु न ओको लाईक करि होतीस। ओको कहानी ला आयकनो वालो हर एक आदमी चकित भएव गएव होतो।

यीशु समुद्र को दूसरों आंग वापिस आएव। ओको वहाँ जानकों बाद मा, एक मोठी भीड़ ओको आजू बाजू जमा भई अखिन ओला दाबन लगी। वन भीड़ मा एक बायको होती जो बारा साल लक खून जानको बीमारी लक दू:खी होती। वन आपरो पुरो पैसा ड्राकटरहिन ला देए देई होतीस की वय ओला साजरों कर देहे, पर ओको रोग अखिन जादा बिगड़ गएव होतो।

वन आयकिस होतीस की यीशु न कई बीमार लोखहिन ला साजरो करी होतीस अखिन वन सोचिस, “ मी साही सेव की अगर मी मात्र यीशु को कपड़ा लाच छुए लेऊ, त मी साजरी होए जाऊ! ” एकोलाईक वा यीशु को मंग लक आई अखिन ओको कपडा ला छुए लेईस। जसोच वन ओला छुईस, खून को जानो बंद भय गएव।

ओधावरच, यीशु न जान लेईस की ओको मालक सामर्थ निकली से। एकोलाईक वन मंग गुम सारी पूछिस, “ मोला कोण छुईस ? ” चेलाहिन न जवाब देईन, “ यहाँ एतरा सारा लोखहीन न तोरो आजु बाजू मा भीड़ लगाईसेन, अखिन तोला चिपक रायासेती। त तुन कायला पुछेस की मोला कोण छुईस से ? ”

वा बायको यीशु को सामने काँपत आई अखिन बहुत डरी आपरो टोघराहिन पर भस गई। तब वन ओला सांग देईस की वन का करीसेस, अखिन यव भी की वा साजरी भए गईसे। यीशु न ओको सीन कहीस, “ तोरो विश्वास न तोला चंगा करिसे। आराम लक जाय। ”