39. यीशु पर मुकद्दमा चलावसे

आता यव अर्धों रात को समय होतो। वय सैनिक यीशु ला महायाजक को घर आनीन, काहेकी ऊ यीशु सीन सवाल करने वालो होतो। पतरस दूर लक उनको धावा करत होतो। जब सैनिक यीशु ला घर मा लिजाहिन, त पतरस बाहेर ऊभो रयसारी खुद ला इस्तों लक गर्म करण लगेव।

घर को अंदर, यहूदी गुरुहीन न यीशु पर मुक़द्दमा चलाहिन। वय ओको विरुद गलत बातहिन ला बोलन लाईक बहुत सारा गलत गवाहहिन ला धर सारी आया। हालाँकि, ऊनकी बात एक दूसरों लक मिलात नोव्हती, येकोलाईक यहूदी अगुवा वय साबित नहीं कर सीकिन की ऊ कोई बात को दोषी होतो। यीशु न काहि नहीं कहीस।

आखरी मा, महायाजक न सीधों यीशु कर देख सारी कहीस, “ आमला सांग की का तुच जीवित परमेश्वर को टुरा मसीह आस ? ”

यीशु न कहीस, मीच आव, अखिन तुमि मोला परमेश्वर को संग बसेव अखिन स्वर्ग लक आवता भी देखो। ” महायाजक न आपरो कमीज ला फाड़ लेईस काहेकी जेव यीशु न कहीस ऊ वन बात पर बहुत गुसा होतो। ऊ दूसरों गुरुहीन पर चिल्लाएव, “ आमला यव सांगन लाईक कोई अखिन गवाहहिन की जरूरत नहाय की येन आदमी न का करीसेस! तुमिन खुदच ओला यव बोलता आयक्या सेव की ऊ परमेश्वर को टुरा आय। ओको बारे मा तुमरो का राय से ? ”

सब यहूदी गुरुहीन न महायाजक ला जवाब देईन, “ ऊ मरण को कगार मा से! ” त ऊन्न यीशु को डोराहिन पर पट्टी बांधीन, ओको पर थूकिन, ओला मारिन, अखिन ओको मज़ाक उड़ाहिन।

अखिन पतरस, जब ऊ घर को बाहेर बाट देखत होतो। तब एक दासी टुरी न ओला देखीस। वन ओको सीन कहीस, “ तू भी त यीशु को संग होतोस। ” पतरस न नकार देईस। बाद मा, कोई दूसरो टुरी न येनच बात ला कहीस, अखिन पतरस न डबल लक नकार देईस। आखरी मा, काई लोखहिन न कहिन, “ आमी जानसेजन की तू भी त यीशु को संग होतोस काहेकी तुमि दुई गलील लक सेव। ”

तब पतरस न कहीस, “ अगर मी येन आदमी ला पहचानु सु त परमेश्वर मोला श्राप देए! ” वंधावरच पतरस को येन तरीका लक कसम खान को बाद मा, एक कोमड़ा न आराईस। यीशु न मंग मूड सारी पतरस ला देखीस।

पतरस वहाँ लक चली गएव अखिन जोर - जोर सारी रोएव। वन समय मा, यीशु ला धरने वाला यहूदा गिन न देखिन की यहूदी गुरुहीन न यीशु ला मृत्युदंड देईसेन। यहूदा बहुत दु:खी भएगेव अखिन जायसारि खुद ला मार डाकिस।

आता वन देश को राज्यपाल पिलातुस होतो। ऊ रोम लाईक काम करत होतो। यहूदी गुरु यीशु ला ओको जवर धर सारी आया। वय चाव्हत होता की पिलातुस ओला मृत्युदंड देए अखिन ओला मार डाके। तब पिलातुस न यीशु सीन खबर लेईस, “ का तू यहूदीहिन को राजा आस ? ”

यीशु न जवाब देईस, “ तुन सहीच कहीसेस। पर मोरो राज्य यहाँ पृथ्वी को नाहाय। अगर होतो त मोरा दास मोरो लाईक लड़ाई करता। मी पृथ्वी पर परमेश्वर को बारे मा सही सांगन लाईक आईसेव। हर एक जन जो सही मा प्रेम करसे ऊ मोरी आयकसे। ” पिलातुस न कहीस, “ त सही का से ? ”

यीशु को संग बात करण को बाद मा, पिलातुस न बाहेर भीड़ को जवर जाय सारी कहीस, “ मी असो कोई कारण नहीं देखू की यव आदमी मार डाकन को योग्य से। ” पर यहूदी गुरु अखिन भीड़ न चील्लाय सारी कहीस, “ ओला क्रूस पर टांग देव! ” पिलातुस न जवाब देईस, “ ऊ काईच गलत करण को दोषी नाहाय। ” पर वय अखिन मोठों आवाज लक चिल्लावन लगया। तब पिलातुस न तीसरों बार कहीस, “ ऊ दोषी नाहाय। ”

पिलातुस डराय गएव की वा भीड़ दंगा सुरू कर देए, येकोलाईक ऊ आपरो सैनिकहिन को द्वारा यीशु ला क्रूस पर टगावन लाईक मान गएव। रोमी सैनिकहिन न यीशु ला कोडा मारिन, अखिन ओला राजा को कमीज पेहराईन, अखिन ओको डोसकी पर काँटा लक बनाएव मुकुट ला राखिन। तब वय यव बोल सारी ओको मजाक ऊडावन लगया, “ देखो, यहूदीहिन को राजा! ”