38. यीशु को संग विश्वासघात

हर साल, यहूदी लोख फसह को त्यौहार मनावत होता। ऊ एन बारे मा एक आनन्द होतो की कई सालहिन को पहेले परमेश्वर न उनको खानदान ला मिस्र को गुलामी मालक निकालिस होतीस। लगभग तीन साल को बाद मा यीशु न सार्वजनिक रूप मा प्रचार करनो अखिन शिक्षा देनों सुरुकरिस। यीशु न आपरो चेलाहिन ला सांगिस कि ऊ उनको संग यरुशलेम मा फसह को त्यौहार मनावन ला चाव्हसे त, अखिन यव भी कि ऊ वहाँ मार डाकेव जाए।

यीशु को चेलाहीन मा एक यहूदा नाव को आदमी होतो। यहूदा प्रेरितहिन को पैसा को झोरा राखन वालो प्रभारी होतो, पर खास कर ऊ वन झोरा मालक पैसा निकाल लेत होतो। यीशु अखिन चेलाहीन को यरुशलेम मा जान को बाद मा यहुदी गुरुहीन को जवर गया। वन पैसा को बदला मा यीशु ला ऊनको हाथ लक धरन को प्रस्ताव राखीस। ऊ जानत होतो कि वय ओला मारन ला चाव्हत होता।

महायाजक को बोलनों पर यहूदी गुरुहीन न यीशु ला ऊनको हाथहिन मा धरावन लाईक यहूदा ला तीस चाँदी का सिक्का देईन। यव वन तरीका लक भएव जसो की भविष्यद्वक्ता न कहिहोंतीस की होए। यहूदा मान गएव अखिन पैसा धर सारी चली गएव। वय यीशु ला गिरफ्तार करणो मा उनकी मदत करण लाईक कई समय की बाट देखन लगेव।

यरुशलेम मा, यीशु न आपरो चेलाहीन को संग फसह को त्यौहार मनाईस। फसह को खानो को समय मा, यीशु न रोटी धर सारी तोड़िस। वन कहीस, “ एला धरो अखिन खाओ। यव मोरो देह आय जेव मी तुम्हारों लाईक देसु। एला मोरो याद मा रखो। ” एन तरीका लक, यीशु न कहीस की ऊ उनको लाईक मर जाए, जोकि ऊ उनको लाईक ऊ आपरो देह ला बली कर देहे।

तमंग यीशु न एक दाखरस को गिलास ला धरिस अखिन कहीस, येला पिलेव। यव नवीन वाचा को मोरो खून आय जो की मी बाहाऊ सु ताकि परमेश्वर तुमरो पापहिन ला माप कर देए। हर बार येला पिवन को समय मा मोरी याद मा येला करो जो मी आब करुसु। ”

तब यीशु न आपरो चेलाहीन सीन कहीस, “ तुमारों मालक एक जन मोला धराए। ” चेला चमक गया, अखिन पूछन लगया की कौन असो काम ला करे। यीशु न कहीस, “ मोला धरने वालों आदमी ऊ आए जेला मी यव रोटी को टुकड़ा देए रहीसेव। ” तब वन वा रोटी यहूदा ला देईस।

वन रोटी को लेन को बाद मा, यहुदा मा शैतान सिर गएव। यहूदा निकल सारी यीशु ला गिरफ़्तार करण लाईक यहूदी गुरुहीन की मदत करण लाईक चली गएव। यव रात को समय होतो।

खानो को बाद मा, यीशु अखिन ओका चेला जैतून पाहाड़ पर चली गया। यीशु न कहीस, “ तुमि सब जन अज रात्रि मा मोला सोड देओ। यव लिखेव से, ‘ मी चरवाह ला मारू अखिन पूरी भेड़ इतन - उतन होए जाएती। ”

पतरस न जवाब देईस, “ भलेच बाकी का तोला सब जन छोड़ देयेती, मी नहीं छोडु!” तब यीशु न पतरस सीन कहीस, “ शैतान तुमला सबजन ला धरन ला देखसे, पर अ पतरस, मीन तोरो लाईक प्रार्थना करिसेव की तू विश्वास लक मुकर नोको जाजो। तमंग भी, अज की रात, कोमड़ा को आरावन को पहेले तू तीन बार नकारजो की तू मोला पैचानस तके नहीं। ”

पतरस न तब यीशु सीन कहीस, “ भलेच मी मर जाऊँ, मी कभी तोला नकारु नहीं! ” दूसरा सब चेलाहीन न असोच कहिन।

तब यीशु आपरो चेलाहीन को संग गतसमानी नाव कि जागा पर गया। यीशु न आपरो चेलाहीन सीन प्रार्थना करण लाईक कहीस ताकि शैतान ऊनकी परीक्षा नोको ले। तब यीशु खुद प्रार्थना करण लाईक चली गएव।

यीशु न तीन बार प्रार्थना करिस, “ अ मोरो बाप, अगर सरल से त कृपा कर सारी दु:ख को कटोरा पिवन लाईक मोला नोको देव। पर अगर लोखाहिन को पाप क्षमा करण लाईक कोई अखिन मार्ग नाहाय का, त तोरिच इच्छा पूर्ण होए। ” यीशु बहुत उदास होतो अखिन ओको पसीना खून को बूंदहिन को जसो होतो। ओला ताकत देन लाईक परमेश्वर न एक स्वर्गदूत ला धाड़िस।

हर बार प्रार्थना को बाद मा, यीशु आपरो चेलाहीन को जवर वापिस आएव, पर वय सोए गया होता। जब यीशु तीसरों बार वापिस आएव त यीशु न कहीस, “ उठो जाओ! मोरा धरने वालो यहाँ सेत। ”

यहूदी गुरु, सैनिक, अखिन एक मोठी भीड़ को संग यहूदा आएव। ऊन्न तलवार अखिन लकड़ी धरिन होतीन। यहूदा न यीशु को जवर आय सारी ओको सीन कहीस, “ अ गुरुजी, नमस्ते, ” अखिन ओला चूम लेईस। वन गिरफ्तार करण वालो आदमी ला यहूदी गुरुहीन पर प्रकट करण लाईक असोच करिहोतीस। तब यीशु न कहीस, “ अ यहूदा, का तू एक चुम्बन लक मोला धराय रईसेस ? ”

जब वय सैनिक यीशु ला धरत होता, त पतरस न आपरो तलवार ला निकालिस अखिन महायाजक को एक सेवक को कान ला काट देईस। यीशु न कहीस, “ तलवार ला दूर डेव! मी आपरो बाप सीन मोरो बचाव करण लाईक स्वर्गदूतहिन को एक सेना लाईक विनती कर रहीसेव। पर मोला मोरो बाप की बात ला मानोसे। ” तब यीशु न वन आदमी को कान ला साजरों कर देईस। तब पूरा चेला पराय गया।