37. यीशु को द्वारा लाजार ला मरेव मालक जिवित करणों

लाजर नाव को एक आदमी होतो। ओको दुई बहिनी होतीन उनको नाव मरियम अखिन मार्था होता। वय सब जन यीशु का खास संगी होता। एक दिवस, कोई न यीशु ला सांगिन की लाजर बहुत बीमार से। जब यीशु न यव आयकिस त वन कहीस, “ या बीमारी लाजर को मरण को संग खत्म नहीं होए। एको अलावा, येन लोखहीन ला परमेश्वर को आदर करन लाईक ऊत्साहित करे। ”

यीशु आपरो संगीहिन सीन प्रेम करत होतो, पर जहां ऊ होतो वहाँ वन दुई दिवस वरी बाट देखीस। वन दुई दिवस को बाद मा, वन आपरो चेलाहीन सीन कहीस, “ आओ, वापिस यहूदिया ला जाबिन। ” चेलाहीन न जवाब देईन, पर अ गुरुजी, आब काईच बेरा को पहले वहाँ को लोख तोला मारन लाईक देखत होता! ” यीशु न कहीस, “ आमरो संगी सोए रही से, अखिन मोला ओला जगावनों से। ”

यीशु को चेलाहीन न जवाब देईन, “ अ प्रभु, अगर लाजर सोए रही से, त ऊ साजरों होए जाए। ” तब यीशु न उनको सीन साप तरीका लक बोल देईस, “ लाजर मर गयव। मोला ख़ुशी भई की मी वहाँ नोव्हतों, ताकि तुमि मोरो पर विश्वास कर सिको। ”

जब यीशु लाजर को गाँव मा पव्चेव त लाजर ला मराया पहीले लकाच चार दिवस भए गया होता। मार्था यीशु सीन मिलन लाईक बाहेर आई अखिन कहीस, “ अ प्रभु, अगर तू रव्तोस त मोरो भाई नहीं मरतों। पर मी विश्वास करुसु की जो काईच तू परमेश्वर सीन मागजों ऊ तोला देहे। ”

यीशु न जवाब देईस, “ पुनरुत्थान अखिन जीवन मी सेव। जो कोई मोरो पर विश्वास करसे अगर ऊ मर भी जाए तभी जिये। जो कोई मोरो पर विश्वास करसे ऊ कभी नहीं मर। का तू एको पर विश्वास करसेस ? ” मार्था न जवाब देईस, “ अ प्रभु, मी विश्वास करूसु की तू परमेश्वर को टूरा मसीह आस। ”

तब मरियम आई। वन यीशु को पाय खालत्या आय सारी कईस, ‘ अ प्रभु, अगर तू यहाँ रव्तोस त मोरो भाई नहीं मरतों। ” यीशु न ओको सीन खबर लेईस, “ तुमि न लाजर ला कहाँ ठेया सेव ? ” ऊन ओला सागीन की, “ कब्र मा। आव देखलेव। ” तब यीशु रोवन लगेव।

ऊ कब्र एक भुयारो होतो जेकों दरवाजो पर एक गोटा ला राखेव गएव होतो। जब यीशु कब्र पर आएव त वन ऊनको सीन कहीस, “ गोटा ला सरकाय देव। ” पर मार्था न कहीस, “ ओला मरे चार दिवस भय गया सेती। ओको मालक त बास आवत रहे। ”

यीशु न जवाब देईस, “ का मीन तोरो सीन नहीं कहेव होतो अगर तुमि मोरो पर विश्वास करो त परमेश्वर को शक्ति ला देखो ? ” एकोलाईक ऊन गोटा ला सरकाय देईन।

तब यीशु न ऊपर स्वर्ग कर देख सारी कहीस, “ अ बाबूजी, मोरी आयकन लाईक मी तोरो धन्यवाद करूसु। मी जानुसु की तू हमेशा मोरी आयकसेस, पर मीन यव यहाँ पर ऊभा एन सपाई लोखहिन की मदत करन लाईक कहेव ताकि ये विश्वास करेत की तुन मोला धाड़िसेस। ” तब यीशु न आवाज लगाईस, “ अ लाजर, बाहेर आव! ”

अधिक लाजर बाहेर आएव! ऊ आब भी कफन मा लपटेव होतो। यीशु न ओको सीन कहीस, “ एन कफन ला निकालन मा ओकी मदत करो अखिन ओला मुक्त करो। ” एन चमत्कार को वजह लक बहुत सारा यहूदीहिन न यीशु पर विश्वास करिन।

पर यहूदीहिन को धार्मिक गुरु यीशु सीन जरन लगया, एकोलाईक वय योजना बनावन लाईक एक साथ जमा भया की कसो यीशु अखिन लाजर ला मारेव जाए।