4. अब्राहम सीन परमेश्वर को वादा

पुर को कई सालहिन को बाद मा, एन संसार मा बहुत सारा आदमी रव्हन लगया होतो, अखिन ऊन मंग लका परमेश्वर को अखिन एक दुसराहिन को विरुद मा पाप करीन। काहेकी वय पुरई झन एकच भाषा बोलत होता, एकोलाइक वय एक साथ जमा भया अखिन संसार ला भर देन को परमेश्वर को आदेश को बजाए एक गाँव ला बनाइन।

वय बहुत घमंडी होता, अखिन उनला कसो जीवन जीनो से एको बारेमा वय परमेश्वर को आदेश ला पालन करणो नहीं चाहवत होता। यहा तक की उन एक असी गुमट ला बनावनों चालू करीन की जो स्वर्ग वरी लीजाए। परमेश्वर न देखीस अगर वय एक साथ होय कर बुराई करत रहेती, त वय बहुत सारा पापी कामहिनला करेती।

येकोंलाइक परमेश्वर न उनको भाषा ला बहुत सारी भाषाहिन मा बदल देइस अखिन ऊनला पुरो संसार मा बिखराय देइस। जेन गाँव ला ऊन्न बनावनों चालू करीन होतीन ऊ बाबेल कव्होनो मा आएव, जोकों अर्थ से “गड़बड़”।

काई सालहिन को बाद मा, परमेश्वर न अब्राम नाव को एक आदमी सीन बात करिस।परमेश्वर न ओको सीन कहीस, “आपरो देश अखिन परिवार ला छोड़ कर वन देश मा चलीजाय जेव मी तोला देखाउ। मी तोला आशीष देऊ अखिन तोरोंलका एक मोठी जाती बनाऊ। मी तोरों नाव ला महान करू। जेव तोला आशीष देहेत मी वोला आशीष देऊ, अखिन जेव तोला श्राप देहे वोला मी श्राप देऊ। तोरों कारण संसार का पूरा कुल आशीष पायेती।”

अधिक अब्राम न परमेश्वर को बात ला मानीस। वन आपरो पूरो नवकरहिन ला अखिन आपरि पूरो जमापुंजी सहित आपरो बायको सारै ला धरिस अना वन कनान देश ला चली गएव जो परमेश्वर न वोला देखाइ होतीस।

जेंधावर अब्राम कनान मा गएव तब परमेश्वर न वोकों लका कहीस, “आपरो चारई आंग देख। मी तोला एव पूरो देश ला देऊ अखिन तोरी पीढ़ी एको पर अधिकार राखे।” तब अब्राम वन देश मा बस गएव।

मलिकीसिदक नाव को एक आदमी होतो ऊ सबलक मोठो परमेश्वर को याजक होतो। एक दिवस जब अब्राम युद्ध करके आवत होतो त ऊ अखिन अब्राम मिलया। मलिकीसिदक न अब्राम ला आशीर्वाद देइस अखिन कहीस “सबलक मोठो परमेश्वर जो स्वर्ग अखिन पृथ्वी को राजा से ऊ तोला आशीर्वाद देए। मंग अब्राम न जो युद्ध मा जीती होतीस वन सपाई को दशमांश मलिकीसिदक ला देइस।

काई साल निकल गया, तब भी अब्राम अखिन सारै ला कोई सन्तान नोहती। परमेश्वर न अब्राम सीन बात करिस अखिन मंग वादा करिस की ओला एक ठूरा पैदा होए अखिन जसा बादर मा तारा सेत तसाच ओका बहुत वंशज होएयती। अब्राम न परमेश्वर को वादा पर विश्वास करिस। परमेश्वर न घोसना करिस की अब्राम एक धर्मी जन से कहेकी वन परमेश्वर को वादा पर विश्वास करि होतीस।

तब परमेश्वर न अब्राम सीन एक वाचा बांधिस। साधारण रूप लका, एक वाचा दुई झुंडहिन को बीच मा एक दुसरो को लाईक कामईन ला करण को एक समझौता होसे। परमेश्वर न अब्राम सिन ऊ वादा तब करी होतीस जब अब्राम सोवत होतो, पर ऊ तब भी परमेश्वर ला आएक सिकत होतो। परमेश्वर न कहीस, “मी तोरो शरीर लका पैदा करके तोला तोरो एक निजी को टूरा ला देऊ। मी तोरो वंशज ला यव कनान देश देशु।” पर आब वरी अब्राम ला कोइच लेकरू नोहता।