5. वादा को टूरा

अब्राम अखिन सारै ला कनान पहुँचन को दस साल को बाद मा, आब वरी ऊन ला कोई संतान नोहती। एको लाइक, अब्राम की बायको सारै न वोकों लक कहीस, “काहेकी परमेश्वर न आब वरी मोला संतान पैदा करणलाइक सक्षम नहीं करीसेसे अखिन आता मी संतान पैदा करण लाइक जासती बुड़गी भय गाइसेव, देख आता, मोरी नवकरान्नी हाजीरा यहाँ से। ओको सीन बिया करले की वा मोरो लाइक एक संतान पैदा करे।”

मंग अब्राम न हाजीरा सीन बिया करलेइस। हाजीरा सीन एक टुरा पैदा भयव, अखिन अब्राम न ओको नाव इशमाएल ठेहीस। पर सारै हाजीरा सीन जरण लगी। जब इशमाएल तेरा साल को होतो, त परमेश्वर न मंग अखिन अब्राम सीन बात करीस।

परमेश्वर न कहीस, “मी सर्व-शक्तिमान परमेश्वर सेव। मी तोरों संग एक वादा करुशु।” मंग अब्राम न जमीन पर पठकर दंडवत करीस। परमेश्वर न अब्राम सीन यव भी कहीस, “तू बहुत जातीहिन को बाप होजों। मी तोला अखिन तोरों वंशहीन ला खुद की जागा होनला कनान देश देऊ अखिन मी हमेसा लाइक उनको परमेश्वर रहु। तोला आपरो पुरो परिवार को आदमीहिन को खतना करणों पड़े।”

“तोरी बायको सारै एक टुरा ला जन्म देए–ऊ वादा को टुरा होए। ओको नाव इसहाक राखजो। मी ओको संग आपरो वादाला बनाय के ठेऊ अखिन ऊ एक मोठी जाती बनाय लेहे। मी इशमाएल सीन भी एक मोठी जाती बनाऊ, पर मोरो वायदा इसहाक संग रहे।” तब परमेश्वर न अब्राम को नाव ला बदल कर अब्राहम राख देइस, जोकों अर्थ से “बहुत लोख हिन को बाप”। परमेश्वर न सारै को नाव ला बदल सारी सारा कर देइस, जोकों अर्थ से “मूलमाय”।

वन दिवस अब्राहम न आपरो पूरो परिवार का आदमीहीन को खतना करीस। लगभग एक साल को बाद मा, जब अब्राहम 100 साल को होतो अखिन सारा 90 साल की होती, तब सारा न अब्राहम को टुरा ला जन्म देइस। जसो परमेश्वर न ऊनकोसीन कहीस होतीस ऊन ओको नाव ला इसहाक राखिन।

जब इसहाक जवान भएव तब परमेश्वर न यव कयके अब्राहम को विश्वास की परीक्षा लेइस, “आपरो एकलौतो टुरा धरके, अखिन वोला मोरो लाइक बली को रूप मा मार डाक।”मंग अखिन अब्राहम न परमेश्वर की बात ला आयकिस अखिन आपरो टुरा ला बलिदान लाइक तैयार करीस।

जब अब्राहम अखिन इसहाक बलिदान करण को जागा कर जान लगाय त इसहाक न पुछिस, अ बाबूजी, आमरो जवर बलिदान लाइक लकड़ी त सेती, पर बलिदान करण लाइक मेमना कहा से?” अब्राहम न जवाब देइस, “अ मोरो टुरा, परमेश्वर बलिदान करण लाइक मेमना को उपाय करे।”

जब वय बलीदान करण को जागा मा आया, तब अब्राहम न इसहाक ला बाँध कर वेदी पर सोवाय देइस। ऊ आपरो टुरा ला मारनच वालों होतो त परमेश्वर न कहीस, “रुक जाय! टुरा पर तलवार नोकों चलाऊस! आता मी जान गएव तू मोरो भेव मानसेस काहेकी तुन आपरो एकलौतो टुरा ला मोरो सीन बचाए के नहीं राखेस।”

जवरच अब्राहम न एक मेढा ला देखीस ऊ झुनकूड मा फसेव होतो। इसहाक को बदला मा परमेश्वर न मेढ़ा को उपाय करीस होतीस। अब्राहम न खुशी-खुशी मेढ़ा को बलिदान देए देइस।

मंग परमेश्वर न अब्राहम सीन कहीस, “काहेकी तू मोरो लाइक पुरो काइच देन ला इच्छुक सेस, यहा वरी की आपरो एकलौतो टुरा ला भी, एकोलाइक मी तोला आशीष देन को वादा करुसू। तोरा लेकरू बादर का ताराहिन लका भी जासती होएत। काहेकी तुन मोरो आज्ञा ला मानिसेस येकोलाइक मी तोरो परिवार को द्वारा संसार का पुरई कुलइन ला आशीर्वाद देऊ।”