44. पतरस अखिन यूहन्ना न एक भिखारी ला साजरों करिन

एक दिवस, पतरस अखिन युहन्ना मंदिर मा गया। एक लंगड़ा आदमी भीख मागन लाईक फाटक पर बसेव होतो।

पतरस न वन लंगड़ा आदमी कर देखीस अखिन कहीस, “ मोरो जवर तोला देन लाईक पैसा त नाहात। पर जोव मोरो जवर से ऊ मी तोला देसु। यीशु को नाव लक, उठ अखिन चल – फिर। ”

वंधावरच, परमेश्वर न वन लंगडा आदमी ला साजरों कर देईस। वन इतन - उतन चलनों अखिन कुदनो, अखिन परमेश्वर को स्तुति करणो सुरू कर देईस। मंदिर को आँगन मा जमा लोख अचम्भित होता।

लवकरच लोखहिन की एक भीड़ वन आदमी ला देखन लाईक आई जो साजरों भए गएव होतो। पतरस न ओको सीन कहीस, “ यव आदमी साजरों से, पर येन बात पर अचम्भित नोको होओ। आमी न येला आपरो ताकत लक साजरों नहीं करया सेजन, अन येकोलाईक नहीं की आमी परमेश्वर को आदर करसेजन। बल्कि, ऊ यीशु आए जेन येन आदमी ला आपरो ताकत लक साजरों करीसेस, काहेकी आमी यीशु पर भरोसा करसेजन। ”

“ ऊ तुमिच आव जेन वन रोमी राज्यपाल सीन यीशु ला मार डाकन लाईक कहया होतात। तुमि न ओला मार डाकायत जो सबजन ला जीवन देसे। पर परमेश्वर न ओला मरेव मालक जीतो करिस। तुमि नहीं समझो की तुमि का कर रया सेव, पर जब तुमी वन कामहिन ला करत होतात, त जो भविष्यद्वक्ताहिन न कही होतीन ऊ पुरो भएव। ऊन कहि होतीन की मसीह दु:ख उठाए अखिन मर जाए। परमेश्वर न येला एन तरीका लक होन देईस। येकोलाईक आब, पश्चाताप करो अखिन परमेश्वर कर घुमों, ताकि ऊ तुम्हारों पापहिन ला धोए सारी साफ कर देहे। ”

जब मंदिर का गुरुहिन न पतरस अखिन यूहन्ना ला आयकीन, त वय बहुत घबराय गया। येकोलाईक ऊन्न उनला गिरफ्तार कर सारी जेलखानों मा डाक देईन। पर जो पतरस न कहिहोतीस ओको पर बहुत सारा लोखहिन न विश्वास करिन। यीशु पर विश्वास करने वालो की गिनती बढ़ सारी लगभग 5,000 भए गई।

दूसरों दिवस, वय यहूदी गुरु पतरस अखिन यूहन्ना ला महायाजक अखिन दूसरा धार्मिक गुरुहीन को सामने धरसारी आया। वय वन आदमी ला भी धर सारी आया जो लंगड़ा होतो। ऊन्न पतरस अखिन यूहन्ना सीन खबर लेईन, “ कोनसों अधिकार लक तुमि न वन लंगड़ा आदमी ला साजरों कराया सेव ? ”

पतरस न जवाब देईस, “ ऊ आदमी जो तुमरो सामने ऊबो से ऊ यीशु मसीह को ताकत लक साजरों भईसे। तुमि न यीशु ला क्रूस पर चढ़ाए देया सेव, पर परमेश्वर न ओला डबल लक जीतो कर देईसेस! तुमि न ओला नकार देयात, पर यीशु को ताकत को माध्यम को अलावा उद्धार पावन लाईक कोनतोच दूसरों मार्ग नाहाय! ”

वय गुरु हैरान होता की पतरस अखिन यूहन्ना न बहुत हिमत लक बात करिन। ऊन्न देखिन की या त साधारण आदमी होता जो की अनपढ़ होता। पर मंग ऊनला याद आएव की ये आदमी यीशु को संग रव्हत होता। येकोलाईक ऊन उनको सीन कहिन, “ आमी तुमला बहुत जादा दंड देबीन अगर तुमि येन आदमी यीशु को बारे मा लोखहिन ला कोई अखिन संदेश ला देसेव त। ” असो बहुत सारी बातहिन ला करण को बाद मा, ऊन पतरस अखिन यूहन्ना ला जान देईन।