45. स्तिफनुस अखिन फिलिप्पुस

पहीलों मसीह गुरुहीन को बीचमा स्तिफनुस नाव को एक आदमी होतो। सब लोख ओको आदर करत होता। पवित्र आत्मा न ओला बहुत ताकत अखिन ज्ञान प्रदान करी होतीस। स्तिफनुस न बहुत सारा चमत्कार करी होतीस। जब वन यीशु पर भरोसा करण को बारे मा उनला शिक्षा देईस त बहुत सा लोखहिन न ओको पर विश्वास करिन।

एक दिवस, स्तिफनुस यीशु को बारे मा शिक्षा देत होतो, अखिन काई असा यहूदी आया जेन यीशु पर विश्वास नहीं करी होतीस अखिन ओको संग वाद - विवाद करणों सुरू कर देईन। वय बहुत गुसा भय गया, येकोंलाईक वय धार्मिक गुरुहीन को जवर गया अखिन ओको बारे मा झूठ बोलिन। ऊन कहिन, “ आमी न स्तिफनुस ला मूसा अखिन परमेश्वर को बारे मा गलत बात करता आयकाय सेजन! ” येकोंलाईक धार्मिक गुरुहीन न स्तिफनुस ला जेलखानों मा डाक देईन अखिन ओला महायाजक अखिन यहूदीहिन का दूसरा गुरुहीन को सामने धर सारी आया। अखिन गलत गवाही देने वाला भी आया अखिन ऊन स्तिफनुस को बारे मा गलत बोलिन।

महायाजक न स्तिफनुस सीन खबर लेईस, “ का ये लोख तोरो बारे मा सही बोल रया सेती का ? ” स्तिफनुस न महायाजक ला जवाब देन लाईक बहुत सारी बातहिन ला बोलनों सुरू करिस। वन कहीस की अब्राहम को बेरा पासून त यीशु को समय वरी परमेश्वर न इस्राएल को लोखहिन लाईक बहुत सारा साजरा काम करिसे। पर लोखहीन न हमेशा परमेश्वर की मानहानि करीसेन। स्तिफनुस न कहीस, “ तुमि लोख परमेश्वर को विरुद मुंडी अखिन बलवा करण वाला सेव। तुमिन हमेशा पवित्र आत्मा ला नकारया सेव, जसो की आमरो दादा - परदादाहिन न हमेशा पवित्र आत्मा ला नकारिन होतीन अखिन हमेशा उनको भविष्यद्वक्ताहिन ला मार डाकिन होतीन। पर जो ऊन करिहोतीन ओको तुलना मा तुमि न अखिन बेकार कराय सेव! तुमी न मसीह ला मार देयात। ”

जब वन धार्मिक गुरुहीन न यव आयकीन, त वय येतरा गुसा भया गया की ऊन आपरो कानहिन ला बंद कर लेईन अखिन ज़ोर को आवाज मा चिल्लाया। वय स्तिफनुस ला झिकन सारी गाँव मालक बाहेर लिजाहिन अखिन ओला मारन लाईक ओला गोटा मारिन।

जब स्तिफनुस मरत होतो त, ऊ चिल्लाए उठेव, अ यीशु, मोरो हंश ला लेए ले! ” तब ऊ आपरो टोघराहिन पर पडेव अखिन मंग अदिक चिल्लाए उठेव, अ प्रभु, यव पाप उनको पर नोको लगावजों। ” तब ऊ मर गएव।

वन दिवस, यरुशलेम मा रव्हान वाला बहुत सारा लोखहीन न यीशु ला मानन वालाहिन ला सतावनों सुरू कर देईन, येकोलाईक विश्वासी लोख दूसरों जागा मा पराय गया। पर येकों बादमा भी, जहाँ भी वय गया ऊन यीशु को बारे मा प्रचार करिन।

फिलिप्पुस नाव को यीशु को एक विश्वासी होतो। जसो की दूसरा बहुत सा विश्वासीहिन न करिहोतीन वय तरी यरुशलेम लक पराय गया। ऊ सामरिया को सरहेद मा चली गएव। वहाँ वन लोखहीन मा यीशु को बारे मा प्रचार करिस। बहुत सारा लोखहीन न ओको पर विश्वास करिन अखिन उद्धार ला प्राप्त करिन। एक दिवस, फिलिप्पुस को जवर परमेश्वर करलक एक स्वर्गदूत आएव अखिन ओला जंगल मा जान लाईक, अखिन एक रोड पर चलन लाईक कहीस। फिलिप्पुस वहाँ चलिगएव। जब ऊ वन रोड पर चलत होतो, त वन एक आदमी ला आपरो रथ मा जाता देखीस। ऊ आदमी कुश देश को एक खास अधिकारी होतो। पवित्र आत्मा न फिलिप्पुस सीन कहीस की जायसारि वन आदमी को संग - संग चल।

येकोलाईक फिलिप्पुस रथ को जवर गएव। वन आयकिस की ऊ कुशी परमेश्वर को वचन ला पढ़त होतो। जो यशायाह भविष्यद्वक्ता न लिखी होतीस ऊ ओला पढ़त होतो। ऊ पढ़त होतो, “ वय ओला मरण लाईक लिजाने वालो भेड़ को जसो लिजाईन, अखिन जसो एक मेमना चुपचाप रवसे, वन तरी एक शब्द नहीं कहीस। ऊन ओको संग गलत व्यवहार करिन अखिन ओको आदर नहीं करिन। ऊन को प्राण ला लेए लेईन। ”

फिलिप्पुस न वन कुशी सीन खबर लेईस, “ जेव तू पढ़ रही से का तू ओला समझ भी से ? ” वन कुशी न जवाब देईस, “ नहीं। जब वरी कोई येला मोला नहीं समझायेत, तब वरी मी येला नही समझ सकु। कृपा कर सारी मोरो जवर आयसारि बस। यशायाह यव आपरो बारे मा लिखत होतो या कोई दूसरों को ? ”

फिलिप्पुस रथ पर चंग सारी बस गएव। तब वन ओला कुशी आदमी ला ऊ सांगिस की जो यशायाह न यीशु को बारे मा लिखिसे। फिलिप्पुस न परमेश्वर को वचन को बहुत सा दूसरो भागहिन की भी चर्चा करिस। येन तरीका लक, वन वन आदमी ला यीशु को बारे मा शुभ संदेश ला संगीस।

फिलिप्पुस अखिन ऊ कुशी चलता चलता पानी को जवर आया। वन कुशी न कहीस, “ देखो! यहाँ पानी से! का मी बपतिस्मा लेए सिकुसु ? ” अखिन वन रथ चलावन वालो सीन कहीस की रथ रोक।

अधिक वय पानी मा चली गया, अखिन फिलिप्पुस न वन कुशी ला बपतिस्मा देईस। जब वय पानी मालक बाहेर आया, त पवित्र आत्मा येकदाम लक फिलिप्पुस ला उठाय सारी दूसरों जागा मा लिजाईस। वहाँ फिलिप्पुस न लोखहीन ला यीशु को बारे मा सागनों सुरू राखीस।

ऊ कुशी आपरो घर कर जान लाईक सामने गएव। ऊ खुश होतो की ऊ आता यीशु ला जानत होतो।