21. २१. परमेश्‍वर मशिहक आगमनै प्रतिज्ञा

सब्ल कुराक सुरुवात ओयाङहाइतल,परमेश्वरै मशिहकना लेत्न्याङ योजना खैथाआनी।मशिह ओङन्याङबारे पहिलो प्रतिज्ञा आदम दै हब्बाहा निङ्हा ओङा।परमेश्वरै प्रतिज्ञा खया कि हब्बा क बंशहाइत दा-जना सन्तान जन्मेन्याङ ह्रेङ जाङी मुभुक काप्लौ कुच्यान्याङ ह्रेङ ।हब्बाकना छक्कान्याङ हुन मुभु सैतान हुनि ।हुन प्रतिज्ञाक अर्थ चाहिँ मशिहक आगमनै सैतानकना पुर्ण रुपहा पराजय खैन्याङ हुनि ।

परमेश्वरै अब्राहमकना प्रतिज्ञा खया कि हुन हाइतना संसारक सब्ल जातिक मन्छेराउइ आशिष दार्न्या ह्रेकी ।हुन आशिष् मशिहक आगमन सङ्घल पूरा ओन्याङ ह्रेनि।उइ संसारक सबल जातिक मन्छेराउकना उद्धारक यम सार्बैन्याङ हुनि।

परमेश्वरै मोसाकना भबिष्यहा उइ मोसासाङ्ल अर्को दा-जना अगमबक्त्ता खडा खैन्याङ प्रतिज्ञा खया।इन मशिह दैना उइ क आगमनक सम्बन्धहा अर्को दाठौ प्रतिज्ञा हुनि ।

परमेश्वरै दाउद राजाकना प्रतिज्ञा खयाकी उइ आफ्नोल बंशक सन्तानै परमेश्वरक मन्छेराउताकी सदा-सर्बदा राज्य खैन्याह्रेरेङ।हुन्क अर्थ मशिह दाउदकल बंशक दा-जना ओन्याह्रेङ।

यर्मिया अगमबक्त्ता हाइत, परमेश्वरै प्रतिज्ञा खयाकी उइ दाठौ नवै करार स्थापित खैन्याह्रेङ,जाङ चाहिँ उइ सिनै पर्बतहा स्थापित खयाङसाङ करार माहुनि।इन नवै करारहा,परमेश्वरै आफ्नो ब्यबस्थाराउ मन्छेराउक हृदयहा लेखेबैन्या ह्रेङ,मन्छेराउइ परमेश्वरकना ब्यक्तिगतरुपइ दास्न्याङ ह्रेकी,अनि परमेश्वरै हुराँउक पापराउ क्षेमा खैबैन्याङ ह्रेङ।मशिहै नवै करारक शुरुवात खैन्याह्रेङ।

परमेश्वरक अगमबक्ताराँउइ इसाकनी गार्सो कि मशिह दाठौ अगमबक्ता ,दाठौ पुजारी दैना दाठौ राजा ओन्याह्रेङ।अगमबक्ता हुन मन्छे हु जाङी परमेश्वरक बचनराँउ क्लाकु अनि परमेश्स्वरक बचनराउ मन्छेराँउक बिचहा घोषणा खैबैकु।परमेश्वरै लेत्थौ गार्त प्रतिज्ञा खयाङ मशिह चाइ दाठौ च्याल सिद्ध अगमबक्ता हुनि ।(ह्रेनी)

इस्रायली पुजारीराउइ मन्छेराँउक तर्फहाइत हुराँउक पापक लागै दण्ड क सट्टा क्षेमाक लागै बलिराँउ चढाबैन्याङ खएनी।पुजारिराँउइ मन्छेराँउक लागै परमेश्वरदै प्राथना कनि खैबयनी।मशिह दाठौ च्याल सिद्ध प्रधान पुजारी ह्रेनी जाङी आफुकना दाठौ सिद्ध बलिक रुपहा परमेश्वर निङ्हा अर्पण खैन्याङ ह्रेनी ।

राजा हुनहु जाङी हुन राज्यताकी शासन खैकु अनि मन्छेराँउक न्याय खैकु।मशिह दाठौ च्याल सिद्ध राजा ह्रेनी जाङ आफ्नो पुर्खा दाउदक सिहासनहा नैन्याङ हुनि ।उइ सदा-सर्बदाक लागै सारा संसारताकि राज्य खन्याङह्रेनी,अनि सदाल इमान्दारिदै सहि निर्णयहा न्याय खन्याङ हुनि।

परमेश्वरक अगमबक्ताराँउइ मशिहक बारेहा अरु चोल कुराक भबिष्यबाणी खैसो।मलाकी अगमबक्ताइ मशिह ओङम ध्री दा-जना महान अगमबक्ता ओङ्न्याह्रेङ खैतना भबिष्यबाणी खया।मिका अगमबक्ताइ उइ बेथलेमक गामाहा जन्मेन्याङह्रेङ क्लाया।

यसैया अगमबक्ताइ क्लाया कि मशिह गालिलहा नैन्याह्रेङ ,मन ग्रेयाङराउक हृदयराँउकना ह्रुप्न्याह्रेङ,बन्धनहा ब्रीयाङराउकना स्वतन्त्रता बैन्याह्रेङ अनि कैदहा ब्रीयाङराँउकना छुट्कारा बैन्याह्रेङ।मशिहै रोगी- कस्टेयाङराँउकना अनि क्लाम,मुम,थामम दै स्वाम माह्रोन्याङराँउकना निको खैन्याङ ह्रेङ खैतना भबिष्यबाणी खया।

यसैया अगमबक्ताइ इन कनि भबियष्बाणि खयाकी मशिहकना बिनाकारण घ्रीणा दै तिरस्कार खैन्याङह्रेकी ।अरु अगमबक्ताराउइ मशिहकना सात्न्याङराँउइ उइ क थ्याङ्ह्रीहा चिठ्ठा जाक्न्याङ ह्रेकी अनि दा-जना सङ्घौइ उइकना धोका बैन्याह्रेङ खैतना भबिष्यबाणि खया।जकरिया अगमबक्ताइ हुन सङ्घौकना,मशिहकना धोका बयाङ बाफत तीस चादी क सिक्का भुक्तानी स्वरुप तिरेहे गार्त भबिष्यबाणी खया।

अगमबक्ताराँउइ मशिहक मृत्युक सम्बन्धहा कनि भबिष्यबाणी खैसो ।यसैयाइ भबिष्यबाणी खयाकी मन्छेराँउइ मशिहकना थोक्न्याङह्रेकी ,गिजेन्याङह्रेकि अनि मक्न्याङह्रेकी।हुराँउइ उइकना भालाइ ह्रोक्न्याङ ह्रेकी अनि चो कष्ट दै पिडाहा उइ सिन्याह्रेङ ,तथापी उइ आङ्ल कसुर खैतमानी ।

अगमबक्ताराँउइ इन कनि गार्सो कि उइ गुसाङ्ल पाप बिनाक सिद्ध ओन्याह्रेङ।उइ अरु मन्छेराउक पाप्क दण्ड कुरमक लागै सिन्याह्रेङ ।उइक दण्डै मन्छेदै परमेश्वर बिच शान्ती पित्न्याङ ह्रेनी ।इन्लमारै मशिहकना कुल्चेम परमेश्वरकल चाहाना हुनि।

अगमबक्ताराँउइ भबियबाणी खैसो कि,मशिह सिन्याङ ह्रेकङ अनि परमेश्वरैल उइकना सियाङहाइतना बौह्रात सौन्याङ ह्रेकङ।मशिह क सिम दै बौह्रेत सयमहाइत ,परमेश्वरै पापिराँउकना बचान्याङ अनि नवै करारक थालनी खैन्याङ उइक योजना पूरा खैन्याह्रेङ।

परमेश्वरै मशिहक सम्बन्धहा अगमबक्ताराँउकना चो कुरा प्रकट खया,तर मशिह हुराँउ गुसाङ्ल अगमबक्ताराँउक समयहा ओङामा।इन अन्तिमक भबिष्यबाणिराँउ बयाङ्क ४००बर्ष हाइत चो समय न्हौ परमेश्वरै मशिहकना संसारहा लेता।