20. २०. निर्बासन दैना फिर्ता

इस्रायलक राज्यदैना यहुदाक राज्य,निठौइल परमेश्वरक बिरुद्धहा पाप खैसो।परमेश्वरै हुराँउदैना सिनै पर्बतहा ह्रुप्याङ करार हुराउइ भङ्ग खैसो।परमेश्वरै हुराँउकना पश्चाताप खयम अनि फेरि उइकना पुजेम गार्तना चेतावनी बयमक लागै आफ्नो अगमबक्ताराँउकना लेता,तर हुराँउ आज्ञाकारी ओम इन्कार खैसो।

हुन्लमारै परमेश्वरै निंठौल राज्यकना हुराँउक शत्रुहाइतना नष्ट ओम बैतना दण्ड बया।दाठौ शक्तिशाली दैना क्रुर राष्ट्र अश्शुरी साम्राज्यै इस्रायलक राज्य ध्वस्त प्रीया।अश्शुरिराँउइ इस्रायल रास्ट्रक चो मन्छेराँउकना सात्सो,हुराँउक बहुमुल्य सामानराँउ सब्ल कात्सो अनि देश क चो भागराँउ छोरबैसो।

अश्शुरिराउइ सब्ल अगुवाराउ ,धनी मन्छेराउ,अनि सीप ओयाङ मन्छेराउकना जम्मा प्रीत अनि हुराउकना अश्शुर देशहा कात्तना स्वासी ।केवल मासातियाङ चो गरिब इस्रायलीराउ च्याल इस्रायलक राज्यहा बाकी ह्रेसी ।

अनि अश्शुरीराउइ इस्रायलक राज्यहा बिदेशिराउकना पित्तना थासो। बिदेशिराउइ भत्केयाङा शहरराउक फेरि निर्माण खैसो इस्रायलिराउदै ब्याहा खैसो,जच्च हुन्हा लेतियाङ ह्रेइनी।बिदेशिराउकना ब्याहा खयाङ इस्रायली सन्तानराउकना "सामरी "गारिया।

यहुदाक मन्छेराउइ परमेश्वरताकी बिश्वास माखयाङ दैना उइक आज्ञाकारी माओयाङ मारै गोसैतना उइ इस्रायलक राज्यकना दण्ड बैका गार्त मुसो।ताकनी हुराउइ अझै कनानी देउताराउक मुर्तिराउ पुजेसो।परमेश्वरै हुराउकना चेतावनी बयम अगमबक्ताराउ लेत्सी ,तर हुराउइ क्लाम मानेसिमा ।

अश्शुरिराँउइ इस्रायल नष्ट खयाङ १०० बर्ष न्हौ परमेश्वरै बेबिलोन क राजा ,नबुकदनेसरकना यहुदाक राज्यहा आक्रमण खयम लेता ।बेबिलोन दाठौ शक्तिशाली साम्राज्य ह्रेनी ।यहुदाक राजाइ नबुकदनेसरक दास ओमदैना हरेक बर्ष हुनकना चो पैसा तिरेम सहमत ओआ।

तर आइची बर्ष न्हौ,यहुदाक राजाइ बेबिलोनक बिरुद्धहा बिद्रोह खया।हुन्लमारै,बेबिलोनिराँउ फेरि ओङ्सि खैँ यहुदाक राज्यकना आक्रमण खैसो।हुराँउइ यरुशलेम क शहर कब्जा खैसो,मन्दिर भत्काबैसो,अनि शहरदैना मन्दिरहा ओयाङ सब्ल सम्पतिराँउ कात्सो।

बिद्रोह खयाङक मारै यहुदाक राजाकना दण्ड स्वरुप नबुकदनेसरक सिपाहिराँउइ हुन्क चाउराँउकना हुन्कल ध्री सात्बैसो अनि उइकना अन्धाखैबैसो ।हुन न्हौ,हुराँउइ राजाकना झ्यालखानाहाल सिम क लागै बेबिलोन कात्सो।

नबुकदनेसर दैना हुन्क फौजै बाली रोपेमकलागै गरिब हाइत गरिबराँउकना बाहेक यहुदाक राज्यक चो भागै मन्छेराउकना बेबिलोनहा कात्सो।समयक इन अबधी जहाँ परमेश्वरक मन्छेराँउ प्रतिज्ञाक मुलुक लेतम बाध्य ओसि,इनकनाल निर्बासन गारियाङ हु।

परमेश्वरै मन्छेराँउकना हुराँउक पाप क कारण निर्बासनहा टाढो कात्तना दण्ड बयासै कनि उइ हुराँउकना दैना आफ्नो प्रतिज्ञा भुलेतमानी ।परमेश्वरै निरन्तर रुपहा अगमबक्ताराँउ हाइत आफ्नो मन्छेराँउक रेखदेख खैन्याङ दै थाम्न्याङ काम जारी थाआ।सत्तरी बर्ष न्हौ, हुराँउ फेरि प्रतिज्ञाक मुलुकहा फर्केन्याङह्रेकी गार्त उइ प्रतिज्ञा खया।

करिब सत्तरी बर्ष न्हौ फारसिराँउक राजा,कोरेसइ बेबिलोनकना परास्त खया,हुन्लमारै फारसी साम्राज्यै बेबिलोनि साम्राज्यकना प्रतिस्थापित खया। नो इस्रायलिराँउकना यहुदिराँउ गारेनी अनि हुराँउ मध्य चो-साङी आफ्नो पुराल जीवन बेबिलोनहा कटाथासोनी ।केवल आइचिदा बड्डो यहुदिराँउकना च्याल यहुदाक मुलुकक ख्याल ह्रेनी ।

फारसी साम्राज्य दाठौ शक्तिशाली साम्राज्य ह्रेनि तर हुराँउ आफुइ कब्जा खयाङ मन्छेराँउ ताकी कृपालु ह्रेइनी ।कोरेस फारसिराँउक राजा ओयाङ आइची समय न्हौ,हुनि जाङ कोँइ कनि यहुदिराँउ यहुदा फर्केत स्वाम चाहेके खाझै फारसी साम्राज्य लेत्तना यहुदा फर्केम ह्रोन्याङ आदेश जारी खैबया।हुनि हुराँउकना मन्दिरक पुनर्निर्माण खयम कचङ-तृयाङ (रुपैयाँ -पैसा)समेत बया।

जब मन्छेराउ यरुशलेमहा तोम्पिसी ,हुराँउइ मन्दिर दैना शहरक वरिपरि बान्नो क फेरि निर्माण खैसो ।हुराँउताकी अझैकनी अरुल राज्यै शासन खैछायाङ ओआझै कनि,दा-चोटा फेरि हुराँउइ प्रतिज्ञाक मुलुकहा नयम अनि हुन मन्दिरहा आरधना चढाम दार्सो।