50. ५०. येशू फेरि ओङ्न्याह्रेङ

करिब २,००० बर्षहाइत ,संसार भरेत क चो हाइत चो मन्छेराँउइ येशू मशिह क बारेहा सु-समचार क्लातल ओङ्ह्रेक्सी ।मन्डली क वृद्धि ओछाकङ ।येशूइ प्रतिज्ञा खैथाआनी कि संसार क अन्त्यहा उइ फर्केत ओङ्न्याह्रेङ ।उइ अझ मचै फर्केयाङ त हैमा ,तर उइ आफ्नो प्रतिज्ञा पूरा खैन्याह्रेङ ।

जब ङै येशू क ओङ्न्याङहा लाङिकी ,ङै पबित्रता क यमहा जीवन बचाए खैतना पर्मेश्वरै चाहेकु,जाङी उइ क आदर खैकु ।ङै इ अरु कना कनि उइ क राज्य क बारेहा गारेँ गारतना उइ चाहेकु ।जब येशू संसारहा ह्रेनी ,उइ गारा ,"ङाक चेलाराँउइ परमेश्वर क राज्य क बारेहा सब्ल संसार क मन्छेराँउ कना सु-समचार प्रचार खैहे ,अनि हुनहाइत न्हौ च्याल,अन्त्यक कान ओङ्न्याह्रेकङ ।"

चोल मन्छे क जातिराँउइ अझै कनि येशू क बारेहा क्लाँतमा ।स्वर्गहा फर्केत स्वामहाइत ध्री उइ ख्रीष्टियानराँउकना हुन मन्छेराँउकना सु-समचार क घोषणा (सुनाम)खयम गारा ,जाङी तिङ्ल इन्क बारेहा क्लाँतमानी ।उइ गारा,"गात्नी अनि सब्ल जाती क मन्छेराँउकना चेला बनाने

येशूइ इन कनि गारा,"गुन्ल कमरा आफ्नो मालिक हाइत बरे ओम ह्रोकुमा ।जसखैतना इन संसार क अधिकारीराँउइ (बरेङ मन्छेराँउइ) ङा कना घिन खैसी ,हुराँउइ ङा क लागै नराँउकना दुख्ख बैन्याह्रेकी अनि सात्थि ।इन संसारहा नराँउइ कष्ट भोगेम ब्रीयाझै कनि ,उत्साहित ओनि ,आँहुखाझै ङाइ इन संसारहा शासन खैन्याङ सैतानकना जिताथाका ।यदि नराँउ अन्त्यमचै बिश्वासयोग्य ओक्सि खाझै ,परमेश्वरै नाङराँउ क उद्धार खैन्याह्रेङ्

येशूइ उइ क चेलाराँउकना संसार क अन्त्य ओआझै गुसा ओन्याह्रेङ खैत बुझाम क लागै दाठौ कथा गारा ।उइ गारा,"दा-जना मन्छेइ आफ्नो खेतहा ह्रुङ ब्याङराँउ फोसि ।जब हुन निङ्ह्रेयानी ,हुन्क शत्रु ओङ्तना गोमा क बिचहा सामा क ब्याङ फो बया ,अनि होइत स्वस्वआ ।"

"जब ब्याङ इङा ,हुन मन्छे क कमराराँउइ गार्सो "मालिक,नाङी त हुन खेतहा ह्रुङ ब्याङराँउ फोथासिनी ।तर घोइतना हुन्हा सामा इङ्सी ?हुन मालिकै जवाफ बया ,"गुन्भनी शत्रुऐ हुन फोयाङ ओमब्रीङ ।"

"हुन कमराराँउइ हुराँउक मालिककना गार्सो,"आङ ङै इ हुन सामाराँउकना ल्होते?"मालिकै गारा,"माहु ।नराँउइ हुसाखैकासो खाझै ,नराँउइ हुन्दैनाल आइचिदा गोमाकनी ल्होत्थे ।गाक्न्याङ बेलामचै लाइनी अनि हुन न्हौ सामाराँउ जम्मा खैत छोरम् क लागै मुठी-मुठी प्रीने,तर गोमा चाँइ ङाक ढुकुटिहा पित्ने ।"

चेलाराँउइ हुन कथा क अर्थ बुझेसोमा,हुन्लमारै आराँउइ येशूकना हुन बुझाबयम क लागै(गारासो)आग्रह खैसो ।येशूइ गारा,"ह्रुङ ब्याङ फोन्याङ मन्छेइ मशिह क प्रतिनिधित्व (अगुवाइ)खैकु।खेतै संसारकना सार्कु ।ह्रुङ ब्याङै परमेश्वर क राज्यहा मन्छेराँउ क प्रतिनिधित्व(अगुवाइ) खैकु।"

सामाराँउइ हुन दुष्ट मन्छेराँउ क प्रतिनिधित्व (अगुवाइ) खैके ।सामा फोबैन्याङ हुन शत्रुइ दुष्ट क प्रतिनिधित्व खैकु ।गाक्न्याङ बेलाइ हुन अन्त्य क कान क प्रतिनिधित्व खैकु,अनि गाक्न्याङराँउइ परमेश्वर क स्वर्गदुतराँउ क प्रतिनिधित्व खैके ।"

"जब संसार क अन्त्य ओन्याह्रेङ,स्वरगदुतराँउइ अधर्मी मन्छेराँउकना जम्मा खैन्याह्रेकी अनि हुराँउकना दन्केछायाङ मुइहा जाक्बैन्याङ ह्रेकी ,जहाँ हुराँउ कार्ही अनि निक्माल कष्टहा आफ्नो दाह्रासी किटेहे ।अनि धर्मि मन्छेराँउ चाइ हुराँउ क पिता परमेश्वर क राज्यहा दि-न साङ चम्केन्याङह्रेकी ।

येशूइ इन कनि गारा कि संसार क अन्त्य ओमहाइतना ठिक ध्री उइ पृथ्बीहा फर्केत ओङ्न्याह्रेङ ।उइ लेत्याङ् साङ्ल अबस्थाहा उइ फर्केत ओङ्न्याह्रेङ ,जाङ चाँइ, उइ क जिउनाउ भौतिक ओन्याह्रेङ अनि अक्कासहा बाल्ह ताकी ओङ्न्याह्रेङ ।जब येशू फर्केकङ ,सियाङ सब्ल ख्रीष्टियानराँउ सियाङ हाइत बौह्रेत सैन्याङ ह्रेकी अनि उइ कना अक्कासहा भेटेन्याङ ह्रेकी ।

अनि हुनबेला बचेयाङ ख्रीष्टियानराउ ताकी अक्कासहा सौइन्याङ ह्रेकी अनि अरु सियाङहाइत बौह्रेत सयाङ ख्रीस्टियानराँउदै ल ग्वाङ्न्याह्रेकी ।हुराँउ सब्ल्हाउल येशूदैना ओन्याह्रेकी ।हुन न्हौ ,येशू उइ क मन्छेराँउदै सदा क लागै शान्ती दै दा-वतना(एकताहा) नैन्याह्रेकङ ।

येशूइ उइ ताकी बिश्वास खैन्याङ सब्ल्हाउकना जीवन क मुकुट बैन्याङ प्रतिज्ञा खैथाका ।हुराँउ परमेश्वर सङ्घल शान्तिहा ह्रेन्या ह्रेकी अनि राज्य खैन्याह्रेकी ।

तर परमेश्वरै येशूताकी बिश्वास माखैन्याङ सब्ल्हाउकल न्याए खैन्याह्रेकङ ।उइ हुराँउकना नरकहा तम्न्याह्रेकङ ,जहाँ हुराँउ सदा क लागै कार्ही अनि कष्टहा दाह्राउ किटेन्या ह्रेकी ।तिङ्ल मासिन्याङ मुइ इ सदाभरेत हुराँउकना छोर्न्याङ ह्रेङ ,अनि गिउराँउइ हुराँउकना कयम लेत्न्याहैमा ।

जब येशू फर्केकङ,उइ सैतान दैना हुन्क राज्यकना पुर्ण रुपै जितान्याङ ह्रेकङ ।उइ सैतानकना नरकहा तम्न्याङ ह्रेङ जहाँ हुराँउ सदा क लागै जोर्न्याङ ह्रेकी अनि हुराँउदैना आराँउकनी ओन्याह्रेकी ,जाङी परमेश्वर क आज्ञापालन खयम क सट्टा हुन दुष्टकना पछ्याम रोजेसो ।

आदम दै हब्बाइ परमेश्वर क आज्ञापालन माखयाङ दैना इन संसारहा पापकना प्रबेश खैबयाङ कारणै ,परमेश्वरै इन संसारकना श्राप बया अनि इनकना नास खैन्याङ निर्णय खया ।तर दाक्काले ,परमेश्वरै दाठौ नवैँ स्वर्ग दैना नवैँ पृथ्बी क सृष्टि खैन्याह्रेङ जाङ चाँइ सिद्ध ओन्याह्रेङ ।

येशू दै उइ क मन्छेराँउ नवैँ पृथ्बीहा ह्रेन्याह्रेकी ,अनि उइ सदा क लागै अस्तित्वहा ह्रेयाङ सब्ल कुराराँउताकी राज्य खैन्याह्रेङ ।उइ सब्ल मिक्र्याउराँउ पुइबन्याङ ह्रेङ अनि हुन्हा फेरि आङ्ल कष्ट ,दुख्ख ,काराइ ,दुष्टता,बेदना,वा सिमब्रीन्याङ हैमा ।येशूइ शान्ती दै न्याएहा आफ्नो राज्य क शासन खैन्याह्रेङ ,अनि उइ सदा क लागै आफ्नो मन्छेराँउदैना ह्रेन्याह्रेकङ ।