27. दयालु सामरी री बात

एक दिण, यहूदी व्यवस्था रो एक विशेषज्ञ यीशु रे कणे आयो। वो सगळा को ओ दिखावणों चावतो कि यीशु गळत रीत ऊ शिकसा देवे। इण वास्ते उणने कियो, "हे गरु, अणन्त जीवण पाणे रे वास्ते म्हु कई करूँ?" यीशु ने जबाब दियो, "परमेश्वर री व्यवस्था माय कई लिखियोड़ो व्है?"

उण व्यक्ति ने कियो, "वा केवे कि अपणे परमेश्वर सू अपणे सगळे मन, पराण, सामरथ, अर बुद्धि सू परेम राख। अर अपणे पड़ोसी सू अपणे समान परेम राख।" यीशु ने जबाब दियो, "थू एकदम सही व्है! जदि थू ऐणों करेळा, तो थणे अणन्त जीवण पावेळा।"

पण वो व्यवस्था रो विशेषज्ञ लोगों को दिखावणों चावतो कि उणरो जीवण जीणे रो तरीको सही हेतो। इण वास्ते उणने यीशु ऊ पूछियो, "ठीक व्है, तो मेरो पड़ोसी कुण व्है?"

यीशु ने उण व्यवस्था रे विशेषज्ञ को एक बात बताणे रे द्वारा जबाब दियो। "एक यहूदी मीनक हेतो जको एक हड़क सू वेयणे यरूशलेम सू यरीहो री यातरा कर रियो थो।"

पण थोड़ाक डाकुओं ने उणे देखियो अर उण माथे हमलो कर दियो। वे उणरो सगळो ले लियो अर उणे लगभग मरणे ताई मारियो-पीटियो। तबे वे गिवरा।

उणरे हाथोहाथ पचे, एक यहूदी याजक उणी हड़क सू वेयणे गुजरियो। उण याजक ने उण मीनक को हड़क माथे पडियो देखियो। जद उणने उणे देखियो तो वो हड़क रे दूजी पाड़े जायणे धके हालगो। उणने उण मीनक को पूरी तरेह सू अणदेखियो कर दियो।

इणरे पचे थोड़ीक वेळा पचे, एक लेवी उण हड़क माथे आयो। (लेवी यहूदियों री एक गोत्र हेती जको मिन्दर माय याजकों री मदद किदी।) वो लेवी भी हड़क रे दूजी पाड़े ऊ निकल गियों। उणने भी उण मीनक को अणदेखियो कर दियो।

धकला जण जको उण हड़क माथे आयो वो सामरिया रो एक मीनक हेतो। (सामरी अर यहूदी एक दूजे ऊ घिरणा करता।) उण सामरी ने हड़क माथे उण मीनक को देखियो। उणने देखियो कि वो यहूदी हेतो, पण पचे भी उणने उण माथे घणों तरस खायो। अतः वो उणरे कणे गियों अर उणरे घावों माथे पट्टियाँ बाँधीं।

पचे उण सामरी ने उण मीनक को अपणे गधेड़ा माथे डाळियो अर उणे उण हड़क सू एक सराय माये ले गियो। जटे उणने उणरी देखभाळ करणी जारी राखी।

धकले दिण, उण सामरी को अपणी यातरा को जारी राखणे री जरूरत ही। उणने उण सराय रे परभारी मीनक को थोडोक धन दियो। उणने उणसू कयो, "इण मीनक री देखभाळ करणों। जदि इण धन रे अळावा थारो थोडोई भेर धन खरच व्हेओ तो पाचो आवणे माथे म्हु थारे उण खरचो रो भुगताण कर दूँळा।"

पचे यीशु ने उण व्यवस्था रे विशेषज्ञ सू पूछियो, "थू कई सोचे? इण तीण लोगों मायू कूण उण मीनक रो पड़ोसी व्है जिणे लूटियो अर पीटियो?" उणने जबाब दियो, "वोही जको उण माथे कृपालु थो।" यीशु ने उणसे कियो, "थू जा अर ऐणों ही करजे।"