11. लादू।

मूसा रांग हारुन ला कोंजोक सु फिरौन के दोरु इस्राएलियों ला डोरु छुक सेरतु तांबा। खोशाक सु हारुन ला हा काता कि खालते ख्योतसु खोशाक ला डोरु मिजुकचाना, तेने कोंजोक मिस्र कि मिया रांग खोशे गलछुह कि चिवा छेपु तोलि ला सात तोङान चावा। फिरौन सु कोंजोक कि वुर ञनजा सु कांग दिन माछिवा खोए वुर मानंदा।

कोंजोक सु खोला दिनछेयान याकि टु छिपु चिक वोकान याला क्योोफिशि छिला तरिका चिक ज़ोवा। इस्राएलि पेरांग तोलि ला रिउ गाङशिन रे रे खेरचा सोतगु वोङा।

कोंजोक सु इस्राएलियों ला ओए रोउ कि ठाक खेरचा रांए खांबा कि गोए खातोरु कु नावा। खोशाक ला खोय शिया तेला मि ला टाहशा क्युर कि रोटी रांग ञाबु ज्ञोवा सालांग नोक। खोसु ओए सोवि तिगंला वोति ज़िना मिसर नासु डोया ला छोंमला दोत नावा।

कोंजोक सु इसरएलियों ला चुक छे चाया वोकान खोशाक सु वोतुक चावा। गोङमु ते, कोंजोक टु छिपु वोकान तोलि ला सोतकिन मिस्र कि जुंनाला फुसाक।

इस्राएलियों कि खांगबा तोलि कि फिता ना ठाक गोशा वोका, ओए छिला ओए खांबा याला ताङ ताक। ओए नांग ना वोकान मि तोलि दिमु वोका। खोशाक रिउ कि ठाक कि छिनासु क्योंफताक।

मिस्रियों सु कोंजोक ला दिनमाछिवा खोए वुर ला माञिंदा। ओए छिला खो सु खोशि खांबा याला मातागबा। कोंजोक सु मिस्रियों कि टु छिपु या तोलि ला सातताक।

जेलखाने नांङना वोकान मिकि टु छिपु नासु फिरौन कि टु छिपु छुहु, तोलि टु शि साक। रांए नानति दुङाल तेसु मिस्र कि मिया युम ञोयंका तेनि खोशाक दुङाल फितेका।

ओए शाक गोङमु ते, फिरौन सु मूसा रांग हारुन ला कत ज्ञपचा नावा, “इस्राएलियों ला खेरचा मिस्र नासु थोनला सोंग!” मिसर कि मिया सु कांग इसरएलियों ला डोरोछि नावा।