10. चु मुसिबत।
कोंजोक सु मूसा रांग हारुन ला हा काता कि फिरौन ते ठाकशिन फुडाक। खोशानुहु फिरौन कि दोरु फूतचा नावा, ”इसराएल कि कोंजोक सु सेरोक, कि ङाशि मियाला डोरु छुक।’” परन्तुा फिरौन सु खोशि माञिंदा इस्राएलियों ला डोरु जुकचि मिते खाला, खोशाला खोसु यल्लाक लाहा काहु फेतचाला नानतान चावा।
फिरौन ओए मियाला फाडोरु मिजुकचा ला वोतुका ञिनि मिका, ओए छिला कोंजोक सु मिस्र तु चू जिहशा चोनि मुसिबत तांबा, ओए विपत्ति कि छिना सु, कोंजोक सु फिरौन ला तोनबा कि खो फिरौन रांग मिस्र कि लाहया साङ छीफू यिन।
कोंजोक नील साहुं ला ठाकतु ज्ञुर ताक, परन्तु फिरौन सु थुना इसराएलियों ला डोरु माचुकपा।
कोंजोक सु मिस्र या तोलि ला बलवा तांगबा। फिरौन सु बलवा ला मातोङ सि मूसा ला वोरशे नावा। परन्तु बलवा तोलि शिवि तिंगला, फिरौन सु खोरि सेंबा ला ज्ञ्योगबु ज़ोताक तेनि इस्राएलियों ला मिस्र नासु डोरु माचुकपा।
ओए छिला कोंजोक सु चुलि बु तांगबा। ओए गुपला ठाक थुङान ढऊ बु चिक तांगबा। फिरौन सु मूसा रंग हारुन ला कत ज्ञपा तेने खोशाकला नावा उइ विपति ला गाहशा ना ङा इस्राएलियों ला मिस्र ना सु डो छोका। था मूसा सु मिहवा चावा तेने कोंजोक सु बु मुकान याला सात ताक। परन्तुा फिरौन सु सेम्बा ज्ञ्योबु ज़ो ताक तेने ओए मियाला डोरु माचुकपा।
ओए गुपला, कोंजोक सु मिस्रियों के गलछुह टालशा वोकान याला नाया शिरु चुकताक। परन्तु फिरौन कि सेम्बाल ज्ञोगबु फुसाक तेने खोसु इसराएलियो ला डोरु माचुकपा।
तेने कोंजोक सु मूसा ला फिरौन किदोरु लगदा ला कोखथाल युकचाला नावा। तेने खो सु वोतुका चाया था मिस्र कि मिया के जुहु ला ज्ञामनि जुकजिर वोकान शुवा थोनबा, परन्तु इस्राएलियों ला चागखांग मायओगबा। कोंजोक सु फिरौन कि सेम्बा ला थुना ज्ञोगबु जोताक, तेने फिरौन सु ञा इस्राएलियों ला डोरु माचुकपा।
ओए गुपला, कोंजोक सु सेरा तांगबा मिसर कि तोदोक युम देतमेह ज़ोता तेने फिताला सु थोनजा वोतना कांग सात ताक। फिरौन सु मूसा रांग हारुन ला कत ज्ञपा तेने नावा, ङा दिकपा चा। ख्योशाया था डो छोका। ङा था मूसा सु मोनलाम ज्ञपा, तेने ओते ज़िना नमना सेरा ज्ञाकान ते छतसाक।
परन्तु फिरौन सु ङा दिकपा चावा। तेने रांए सेम्बा ज्ञोगबु जोता। खोसु इसराएलियों ला डोरु माचुकपा।
थाकोंजोक सु मिस्र तु टाकचि बुया तंगबा। ओए टाकचि बुयासु सेरा माकाला वोकान तोदोक तोलि सोताक।
था कोंजोक सु शाकपा सुम थांबा मिस्र लुंगबा रु मुन्नाह ज़ो ताक। वोतुक नानति मुन्नाह वोका कि मिसरि मिया खांबा ना सु फिताला थोनगु माछोता। पर इस्राएलियों कि मिया दोतसा रु सालवु वोका।
उइ काहु गु तांगजा सुकांग, फिरौन सु इस्राएलियों ला थोनजा डोरु माचुकपा। फिरौन ला हुन मिका कि ओए छिला कोंजोक सु जुंगमा चिक काहु तोंगजि ठो चावा। ओए सु फिरौन कि सिम ला ज्ञुर तोङा।
निर्गमन अध्याय 5-10 नासु बाइबल चिक की टुंग।
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।