9. मूसा ला कोंजोक कत ज्ञाका।

यूसुफ ठोगबि तिंगला खो ए ञिमा ञेरिंग तोलि मीस्र तु दतपा। खोशि रिह रुहा लौ युम छुहु मिसर तुवा दता तेनि खोशाक ठा बुटिंग युम किवा। खोशाक ला इसराएली सेरका।

लौ ज्ञा कि युम तिंगला, इसराएलि ठाङखा ला माङबु वोका। मिस्र कि मियाते ओए वुर कि छिला वोरछि मिका कि खोशि रोह फेतचाला युसुफ सु युम चाया वोका। खोशाक इसराएलियो ना सु जिहसाक चिला सेरना खोशि ठांङाखा मांगबु वोका। ओए ज़िना मिस्र तु शासन फितकान फिरौन सु इसराएलि याला मिस्रियो कि योकपु ज़ोता।

मिस्रियों सु इसराएलियों ला नगर छिपु युम जोरु चुकपा। ओय मागोता युल युम कांग जोया ला नानतान चावा। वोतुक काहु रांग ज़ाङ जा खोशि मेज़े ला काहु कातपा, परन्तु कोंजोक सु खोला जिनलाफ तातपा तेने थुना खोशा याला चिवा युम किवा।

फिरोन सु तावा इसराएलि या चिवा युम कियि का, ओए छिला खोए माहमि याला नावा इसराएलि कि चिवा टु वोकान याला नील सांहु रु युहला सोततोंग सि आज्ञा ताता।

इस्राएलि फोमु सु चिक सू टु चिक किवा। तेने खोए माकपा रांग खोशानुहु सु चाम नुनु ओए चिवा ते ला बहशा फोरा।

जब खोए अमा-आपा नुहु मंगबु बतगु माछोता, खोला सतयोङ सेम्बा खोशा सु चिवा ते ला पाकचि कि नागदु चुकचा नील सांहु कि गतछोक कि राजल कि साए जुंगदु फोर ताक। ओए छिवा तेके अजि छेपु ते खोला ओइ ताया ला टुंगशा दतपा कि खोरागं ञाबु चि चायि।

फिरौन कि फोमु ते ओए पाकचि ला थोंगशा ओए नांगदु तावा। जब खो सु चिवा चिक ला तावा तेने खोसु खोरि चिवा कि लामु खेर वोंगबा। खोसु इसरएलि फोमु चिक ला खोला ओमा तेरचाला फोरा, ओतुक पता माचावा ला कि, चिवा कि दिमंग आमा नोक। था चिवा ते वोचम छिपू छारचा वोकाक कि खोला खोए आमा कि ओमा गोशा मिका, खो सू फिरौन कि फोमु ला लौक ताक, चिवा कि मिन मूसा फोरा।

शाकचिक, जब मूसा छिपु छारचा वोका, तेने खो थोंवाक कि मिस्रि मि चिक इस्राएलि ला दुइका। मूसा सु रांए रोह इस्राएलि ला क्योिफ कान से चावा।

था मूसा सु सेम्बा सु कांग ताइ मिनडो तेनि खो सु ओए मिस्रि तेला सातचा तेनि खोए रौ तेला कुङता। परन्तु मुसा सु फेतकान ते मि चिक सु खोला थोंगसा।

फिरौन ला हुन छोतसा कि मूसा सु चि चावा ते। खोसु खोला सोतचा चावा, परन्तु मूसा मिस्र कि रिया ला शोर साक। फिरौन कि माहमि खोला फातगु माछोत चाला।

मिस्र ना युम थाकरिंग मिदयान युल ना मूसा लुगज़ि चाया वोका। खोसु ओएरु फोमु चिक नामा लिनजा तेनि खोनासु टु नी किवा।

मूसा खोरि आजांग कि छुंगमा याला तायिन वोका। शाकचिक, खोला छिरताक ला मे थुकिन थोआ ओए मे ते खौकथाल मिताला थुइका। खो ताया ला छिरताक कि दोरु फुता। खो दोरु फुतचा वोतज़िना कोंजोक सु खोला वुर तांगबा। खो सु चावा, ”ए मूसा, रांए काफशा लुकतोंग। ख्योत ज़ा च़ङमा ना वोका।”

कोंजोक सु नावा, “ङा वोशि मिया कि दुकपु थोंङ। ङा ख्योखत ला फिरौन कि दोरु तोयि ताकि ख्योएत इस्राएलियों ला मिस्र कि योकपु ना सु तोनजा खिङजाला। ङा खोशाला कनान छवनि तेरि,ओए युल ङासु अबराहम, इसहाक रांग याकूब ला थामजा फितसा ते नोक।

मुसा सो ठिवा, मिया सु ङाला ठियाना कि मांग ला सुसो तांग जुआ तेनि मांग चि पिचा? “ क वोकन तेङा वोतु यिन, कोंजोक सु ङाला ख्योयए दोरु तांग जुङ। खोला वोतुक कांग नो,ङा ख्योशे पेरांग अब्राहम,इसहाक रांग याकुब के कोंजोक याहोवा यिन।’ ङाये ऊइ मिन ते फा दिंग के छेला नोक।”

मूसा जिहका तेनि फिरौन कि दोरु डोमु मिका चिला सेरना खो सेम्बा खो दिमु सेरगु मिशोतका, ओए छिला कोंजोक सु मूसा कि आजु, हारुन, ला खोए रोह फितचाल ला ताङबा।