31. यीशु छुइ खातोरु डुलिका।

मि तोंग ङाह ला सापतुंग तातपि तिंगला, यीशु सु रांए चेला याला नाव रु डोया ला नावा। खोसु खोशाक ला छो कि फारका छोकला सोग नावा, जबकि खो मनताइ ज़िक कि छिला ओयरु दतताक। था चेला या फुसाक। यीशु सु ओए मि कि छोंम तेला खांगबा ला सौंग नावा। ओए तिंगला, यीशु मिहवा फेतचा ला लाचिक ला फुसाक। औएना खो चोकपु वोका, तेने खोसु छनमु छुहु मोलळम चावा।

ओए ज़िना, चेला रांए नाव ला कोरकिन फुडिका, परन्तुम लगदा ते खोशे खिलाफ ज्ञमनि ननति वोयिका। ज्ञमनि नम नानति रुकचासु कांग खोशाक छुइ छो कि जुङ ना लिविका।

ओए ज़िना यीशु सु मोल्लम फेतचा सेनदु चुकचा वोका तेने रांए चेला या कि दोरु ढोया सुकपा। खो नाव कि छोकला डोया ला छुइ खातोरु डुलिका।

तेने चेला यासु खोला थोवा। खोशाक युम जिहसाक चिला सेरना खोशाक सेंमबा कि ओए ति लांडि जिक नोक। यीशु ला हुन वोका कि खोशाक जिहशा वोक, ओए छिला खोसु खोशाक याला कात ज्ञपचा नावा, ”माझिंह दि ङा यिन!”

तेने पतरस सु यीशु ला नावा, “ऐ कोंजोक, खालते ञित यिनना मांगला छुइ खातोक ला वोंगदु जुकचि आदेश नांग।” यीशु सु पतरस ला नावा, “शोक!”

था पतरस नाव नासु फाफ साक तेने यीशु कि दोरु डोया ला छुइ नांगना ला चाया डुलजा सुकपा। परन्तु मानतांए फांव रु फुतचा, यीशु नासु मिक ज़ोलसाक तेने खो छुइ बलवा या राङ लगदा शेतचिन ला ञनजा सुकताक।

तेने पतरस जिहसाक तेने खो छुला गुंगडिका। खो कुरा ज्ञपा, “ऐ कोंजोक, ङाला क्योफ!” यीशु सु वोति ज़िना लाकपा तातचा खोला ज़ुंमबा। तेने खोसु पतरस ला नावा, “ख्योऐए दंग ते ज्ञामनि ञुन दुक! ख्योकत ला क्योफशा फोरचि छिला ख्योुत सु ङाए खातोरु दिन चिला माछिवा?”

तेने यीशु रांग पतरस नाव कि खातोरु जाहवा, तेने लगदा ते वोंगजा छाकसाक। छुह कांग थिकछुमि वोका। चेला यासु हा लाशा यीशु कि दोरु पुंगबु चुहशा दतपा। खोशाक सुखोए मिहवा चावा तेने खोसु नावा, “दिनबाला ख्योात कोंजोक कि टु यिनोक।”