34. यीशु कि छिनासु युम टुंगया ला लोविका।

यीशु सु कोंजोक कि राज्य कि टुंग युम शतपा। उदाहरण कि छिला, “कोंजोक कि राज्यन ते राई कि साङोन कि ज़ाए वोका। खोला शेंगा ला ज्ञपता। ख्योरशाक ला हुम वोता खो साङोन तोलि कि नांगना सिंगसांग चुन वोका।” " “परन्तुा जब राई कि साङोन ते केशा छार डोया ना तेनै छारि पांगतुक तोलि नासु छेपु छार डोवा, खो वोचम छेपु छारडाक कि छा चिव तोलि ओएरु ङाल सोवा।” "

यीशु सु जिनमा टुंग चिक शतपा, “कोंजोक कि राज्य फाकज़ान क्यारवु कि लामु नोक जिसे ओए फोमु सु जिनमा दिमांग फाकज़ान ला टे तौङजाना तेने फाकज़ान तोलि ला डे डोवाक।”

“कोंजोक कि राज्यं ओऐ खज़ाना कि लामु नोक जिसे सुजिक सु शेंगा ना बाशा वोका। जिनमा मिजिक ला थोपसाक तेने खो मागबु गोमु वोका। ओएछिला खोसु ञा बाताक। खो वोचम गरिशिया वोका कि खोसु फुतचा रांए नोर तोलि चोंगताक ताकि खो ओए खजाना वोतसे शेङगा ञोगु छोतचा ला।”

“कोंजोक कि राज्यक ते ओए मिनजिन मोति कि लामु नोक। जब सुरि मोति छोङान ला थोप डोया ना तेनै खोला ञोया ला खो रांए नोर तोलि चोंग तोङा।”

ओएना मि गनजिक वोका जो सेमिका कि कोंजोक खोशाकल ओए छिला लेनिका कि चिला सेरना खोशाक लाहा दिमु फेतिका। उइ मिया जिनमा ला गए मिका जो दिमु लाहा फितिमिका। ओए छिला यीशु सु खोशाकला टुंग चिक शतपा: “मि ञि वोका ञिकार मिहवा फेततु गोनबा ला फुता। ओए नुहु कि नांगना चिक ते चुगीं लेनङान जिक वोका, तेने जिनमा ते धारमिक अगुवा नोक।”

“ओए धारमिक अगुवे तेसु वोतुक सि मिहवा चावा, ‘ऐ कोंजोक, छाकसाल कि मांग ओए मिया कि लामु – जैसे कि कुनमा, ङाजिन फेतकान मि, आखि मि, या ओऐ मागोता दिना वोकान चुगीं लेनङान मि कि लामु दिकपा फैतकान मि मान।’”

उदाहरन कि छिला, ङा शाकपा दुन ला लनमा नि ञिना टुञित, तेने ङा ला थोपकान मुल रांग नोर गनजिक ख्योरतला तेरित।

“परन्तु ओए चुगीं लेनङान ते ओए धारमिक अगुवे नासु ज्ञमनि थाकरिंग ना लांगशा वोका। खोसु स्वरग ला मिक कांग मातावा। ओए मागोता खोसु रांए बरा दामशा ठांग दुगबा तेनै मिहवा चावा, ‘ऐ कोंजोक, मांगला थुगज़ि जेहशि चिला सेरना मांग दिकचिन यिन।’”

तेने यीशु सु नावा, “ङा ख्योअत ला दिनबाला सेरित, कोंजोक सु ओए चुगिं लेनङान कि मिहवा ञनबा तेने खोला धरमि जोताक। परन्तु खोसु ओए धारमिक अगुवे कि मिहवा ला मागावा। कोंजोक सु फोसो वोकान कि गो माला कुकतोङा, परन्तु खो सु मि तोलि ला दिमु फेतका जो रांग ला कुकचा दोतिका।”