48. यीशु तेया थामजा चाया वोकान मसीह यिनोक।

जब कोंजोक सु जमबुलिंग ज़ोशा वोतज़िना तोलि दिमु वोका। चि कांग दिकपा मिकाक। आदम रांग हव्वा चिक तांग चिकला ञिमु फेतिका, तेनि खोशाक कोंजोक ला ञिमु फेतिका। नाज़ा जिक कांग मिका। कोंजोक ते वोतुक जमबुलिंग ला थातिका।

लांडि सु डुल छि नासु छारा रु हव्वा ला वुर तांगबा, चिला सेरना खो खोला डोख्या फेतमु वोका। तेनि हव्वा रांग आदम सु कोंजोक कि खिलाफ दिकपा चावा। चिला सेरना खोशाक सु दिकपा चाया वोका। ओए छिला जमबुलिंग दु दोतकान सिमशिन तोलि शियिका।

चिला सेरना आदम रांग हव्वा सु दिकपा चावा, ओएछिला दुरुंग ओए सांग ञानबा वोंगबा। खोशाक कोंजोक कि ढा रु फुसाक। वोति नासु सिमशिन तोलि यासु दिकपा चावा। मि तोलि केनासु कोंजोक कि ढा नोक। कोंजोक तांग मिया कि जुंगना शान्ति मिका। परन्तु कोंजोक शान्ति फेतमु वोका।

कोंजोक सु थामजा चावाक कि हव्वा कि रिह रुहा जिक सु लांडि कि गो ला नोनङा। खोसु वोतुक कांग चावा कि लांडि खोए कांगबा ला मुका। जिनमि कात ला सेरना, लांडि मसीह ला सोतका, परन्तु कोंजोक खोला ञा सोनपु जोताक। ओए गुपला, मसीह लांडि कि शक्ति ला फादिंग कि छिला सेनदु चुकतोङा। लौ युम कि तिंगला कोंजोक सु तोनबा कि मसीह ते यीशु नोक।

कोंजोक सु ओए होलडो तेनासु रांए पिरांग ला क्योदफा। जिसे खो खिंगजा से वोका। नुह ला नाव ज़ोया ला नावा खो वोतुक चाया कोंजोक सु ओए मिया ला क्यो्फा जो खोला दंग फेतिका। वोतुक चाया, खोशाक तोलि कोंजोक कि छिनासु सोत चि लायक वोका चिला सेरना खोशाक सु दिकपा चाया वोका। परन्तु कोंजोक सु खोशाक तोलि ला क्योसफशि छिला यीशु ला तांगबा जो खोला दंग फेतिका।

लौ ज्ञा छुहु, पुजारि या कोंजोक कि छिला पुज़ा तोङिन दतपा। दिते दोनिका कि मिया सु दिकपा चावा, तेनि कोंजोक कि छिनासु खोशाक ला सजा तेरचि लायक वोका। परन्तु ओए पुज़ा तोङान या खोशे दिकपा ला माफ फितचि लायक मिका। यीशु सिंगसांग छेपु याजक नोक। खोसु ओए चावा जो जिनमा याजक फेतगु मिछोत का। खोसु लिम ओए लनमा चिक पुज़ा कि छिला रांग ला तात ताक जो चिक चिक मिकान कि दिकपा ला बितगु छोतका। खोसु ञिनबा कि कोंजोक ओए तोलि कि दिकपा कि छिला खोला सजा तैरचा ओए छिला, यीशु सिद्द पुजारि छेपुनोक।

कोंजोक सु अब्राहम ला नावा, ”ङा ख्योए छिनासु जमबुलिंग किरिह रुहा तोलि ला जिनलाफ तेरि।” यीशु ओति अब्राहम कि रिह रुहा नोक। कोंजोक अब्राहम कि छिनासु खानदान तोलि आशिष तेरिका चिला सेरना सुकांग यीशु ला दिन छिया ना, कोंजोक ओए तोलि ला दिकपानासु क्यो फका नुक। ओए मिया यीशु ला दिनछिया ना, कोंजोक खोशाक ला अब्राहम कि रिह रुहा ञिनङा।

कोंजोक सु अब्राहम ला नावा कि ख्योतरि टु, खोए छिला पुज़ा ला थोंग तोंग। परन्तु ञाकोंजोक सु इसहाक कि ज़ा रु पुज़ा तोंगजि छिला रोउ तातपा। वोशाक तोलि वोशेरि दिकपा कि सोतचि लायक वोका ! परन्तु कोंजोक सु वोशि ज़ारु शिया ला यीशु ला पुज़ा तोंगजे छिला तातपा। वोति छिनासु वोशाक यीशु ला कोंजोक कि रिउ सेरका।

जब कोंजोक सु मिस्र ला जुंगमा काहु ते तांगबा तेनि खोसू इस्राएलि तोलि ला नावा कि रिउ जिक कि पुज़ा थोंग। ओए रिउ ला क्योन मिगोशाक। तेनि रांए गोए खातोक, तेनि फाला छुलातोलि ला खोए ठाक कुतलांग नोक। जब कोंजोक सु ठाक ते थोंवाक तेनि खो ओए खांगबा नासु थांगला थोन साक तेनि खोशि टु या ला मासाता जब वोतुक चाया सु कोंजोक सु ओए ला फसह कि लदु चावा।

यीशु फसह कि लादु कि रिउ कि लामु नोक। खोसु नमकांग दिकपा माचावा, ओए छिला ओएना चांखांग मानलोक मिका। खो फसह कि लदु ज़िना ठोंगबा। जब सुकांग यीशु ला दंग फितचाना तेनि यीशु कि ठाक ओऐ मिति कि दिकपा कि किमत तेरगु वोङा। दि वोतुक नोक कि कोंजोक ओए मिते कि दोनाला फुडिका चिला सेरना खो खोला सजा तेरमु मिका।

कोंजोक सु इस्राएलि मिया रांग ञाबु थामजा जिम छावा, चिला सेरना खोशाक वोतुक मि नोक जिनको कोंजोक सु खोरि यिनसे दामशा वोकाक। परन्तु था कोंजोक सु चिक वोतुक थामजा जिक दमशा वोकाक जो तोलि कि छिला नोक। खालते सु कांग रिह रुहा सु कांग मि ओए थामजा सोमा ला ञिनजाना, तेनि खो कोंजोक कि मिया रु ञाबु डेडाक। वोतुक ओए छिला फेतकाक चिला सेरना यिशु ला दंग फितेका।

मुसा ते ङोशि शोतकान नोक। जिसने कोंजोक कि वचन ला ज्ञमनि छेपु सामरथ तांग ञाबु प्रचार चावा। परन्तु यीशु तोलि ङोनशि शोतकान यासांग छेपु नोक। ओए कोंजोक नोक, ओए छिला चिकांग खो छोरा तेनि चावा ओए ते कोंजोक कि लाहा रांग वचन नोक। ओए छिला नमशे चांगमा यीशु ला कोंजोक कि वचन सेरका।

कोंजोक सु ज्ञलवु दाउद ला थामजा चाया वोका कि ज्ञलवु कि लामु खोए रिह रुहा चिक कोंजोक कि मिया कि खातोरु शासन फितका। यीशु कोंजोक कि टु रांग मसीह नोक, ओए छिला खो दाउद कि रिह रुहा नोक जो फादिंग कि छिला ञाम फेतका।

दाउद ता इस्राएल कि ज्ञलवु नोक, परन्तुल यीशु जमबुलिंग कि ज्ञलवु नोक ! खो ञा वोङा तेनि फादिंग कि छिला ठिम रांग शान्ति रांग ञाबु खोए राज्यु ला शासन फेतका।