50. यीशु ञा लोकचा फुडिका।

गन तोंग 2,000 लौ नासु, ज़मबुलिंग कि ज़ा तोलि ना मागबु से मागबु मिया मसीह यीशु कि बारे ला लोन ला ञनिका। कलिसिया बरगद फितेका।यीशु सु थामजा चावा कि खो ज़मबुलिंग कि जुंगमाला लोकचा वोमे से।खालते खो थासांग लोकचा मियोंगजाना, तेनि कांग खो खोए थामजा ला छांगबु फितका।

जब कि वोशाक यीशु कि लोकचा वोंगजाला गुहशा वोका, कोंजोक वोशाक नासु वोति लुहनासु मिज़े क्योिजा गोएका जो चांगमा नोक तेनि जो खोला आदर फितकान ते। जब यीशु ज़मबुलिंग दु दोतज़िना तेनि खोसु चावा, ङाए चेला या ज़मबुलिंग तोलि ज़ारु मिया ला कोंजोक कि राज्यक कि बारे ला शुभ लोन प्रचार फितका, तेनि जुङमा वोङा।

रिह रुहा युम ला थासांग छुहु यीशु कि बारे ला माछिरा। स्व्रग ला लोकचि थांगला, यीशु सु मसिहि याला ला ओए मिया ला शुभ लोन शोतचा ला नावा जिसने नम कांग माछोरा। खोसु नावा, “ सोगं तेनि तोलि रिह रुहा कि मिया ला चेला ज़ो! तेने उदारण नासु ”तेनि” थुया ला शिंगा छोदोक छोदिका!

यीशु सु वोतुक कांग नावा, “सु कांग मि कि योकपु खोए ज़िदाक सांग छिपु मानोक। उइ ज़मबुलिंग कि मि खाकचिन सु ङाला मिगाह छाजुंग, तेनि ङाए छिना सु खोशाक ख्योशाक ला कांग ङाजिन फितका तेनि सात तोङा। दि ज़मंबुलिंग दु ख्योत नातपा फुडाक, परन्तुो उह छुक ला दोत, चिला सेरना ङासु शैतान ला फामदु चुक तांग जो दि ज़मंबुलिंग दु शासन फितेका। खालते ख्योकत जुंगमा छुहु ङाला दंग चाया दोतना, तेनि कोंजोक ख्योतला क्यो़फकानुक!”

यीशु सु रांए चेलाया लोपचि छिला टुंग चिक शतपा कि जब ज़मंबुलिंग सिनडिज़िना मिया रांग ञाबु चि वोङावा। खोसु चावा, मि चिक सु रांए शिंगारु साङोन दिमु ज्ञपा। जब खो ञालशा वोतज़िना खोए डआ वोंगबा तेनि ठो कि साङोन कि जुङदु रिया कि साङोन जिक ज्ञपताक, तेनि खो ओएना सु फुसाक।”

था साङोन किया वोतज़िना खोए योकपु यासु ओए मिते ला ना वा, ”ए स्वावमि, ख्योसत सु ने रांए शिंगा ला साङोन दिमु ज्ञपसुंग तेनि ञा दिरु रिया कि पांग चिला वोकावा?’ ओए मिते सु लान लोहवा, ’लिम ङाए डातेसु वोतुक साङोन ज्ञपाक। दि ङाए डा जिक यिनोक जिसने वोतुक चावा’”

“ओए योकपु यासु खोए जिनदाक ला लान लोहवा, ’चि वोशाक ला रिया कि पांग ला पोक तोंग जावा? ओए जिनदाक सु नावा, ’माबोक।खालते ख्योशाक वोतुक फितचाना ठो कांग पोक तोङा। ठो थुथु छुहु गुहशा दोत।तेनि रिया कि पांगटुक ला दोंग दु दुला फोर तेनि दुहशा ला। परन्तुा ठो तेला शिंगमांग दु खेला।”

चेलाया सु ओए टुंग सेरकान ते हुन छोति मिका, ओए छिला खोशाक सु यीशु ला खोशाक ला शोत वोरछे नावा। यीशु सु नावा, ”साङोन दिमु ज्ञाकान मि ते मसीह कि लोपकान नोक। शिंगा ज़मबुलिंग कि लोपकान नोक। दिमु साङोन कोंजोक कि राज्यक कि मिया कि लोपकान नोक।”

“रिया कि पांग ते ओए आखि मि, शैतान कि मिया कि लोपकान नोक। ओए मि कि डा शैतान कि लोपकान फितकाक, जिसने रिया कि साङोन ते ज्ञपता। थुया ते ओए जमबुलिंग कि लोपकान नोक, थुवान याते कोंजोक कि स्वकरगदुत कि लोपकान नोक।”

जब ज़मबुलिंग कि सेनडिज़िना तब स्वरगदुत ओए मिया तोलि ला ञाबु दुशा खेङा जो शैतान कि नोक। ओए स्वरगदुत सु खोशाक ला मि छानते जिक कि नांगदु युह तोङा। ओएरु ओए मिया जिहशा काहु सु ङुवा तेनि रांए सो दरका। परन्तुि जो मिया ज़ांगबो वोकान या, जिसने यीशु ला आतला फोरिका, खोशाक खोए आपा कोंजोक कि राज्यक रु ञिमा कि लामु ओत ज्ञकिन दोतका।”

यीशु सु वोतुक कांग चावा कि खो ज़मबुलिंग सेनजि थांगला ज़मबुलिंग दु लोकचा वोङा। खो वोति लुह नासु लोकचा वोङा। जैसे खो फुता। खोए दोना दिमांग जुहु वोङा, तेनि खो नमकि टिन कि खातोरु दतचा वोङाक। जब यीशु लोकचा वोंगज़िना, तेनि मसीहि शिसोङान या शिसा नासू लांग वोङा तेनि खोला नमदु थुका।

तेनि जो मसीहि सोनपु वोकान ते ओए ला नमला ताक डाक तेनि ओए जिनमा मसीहि या रांग ञाबु डेडाक जो शिसा नासु लांगजा वोंगबा। ओए थाकपु यीशु रांग ञाबु दोतका। ओए गुपला, यीशु रांए मिया रांग ञाबु दोतका। जब खोशाक ञाबु दोतजिना तेनि खोशे दोना फादिंग कि छिला शान्ति वोङा।

यीशु सु खोला दिन छियान मि तोलि ला मुकुट रे रे तेरचि थामजा चावा। खोशाक फा कि छिला कोंजोक तांग ञाबु नोर रै रै ला शासन फितका। खोए दोना तोलि शान्ति वोका।

परन्तु कोंजोक ओए तोलि रांग ञाबु ठिम फितका जो यीशु ला दंग मिफितका। खो खोशाकला नरक तु चुकतोङा। ओएरु खोशाक ञुवाक नुक तेनि सो दरका, तेनि खोशाक फादिंग नाइन दोतका। फादिंग मिशियान मे ला थुकिन दोतका, तेनि बु या खोशाक ला सायिन दोतका।

जब यीशु लोकचाना, तेनि खो तोलि लुह नासु शैतान ला तेनि खोए राजय ला सेनगु जुका। खो शैतान ला नरक तु चुकतोङा। ओए रु शैतान फादिंग कि छिला दुकिन दोतका, खोशाक तोलि रांग ञाबु जिसने कोंजोक कि वुर ला ञनजि मिते खाला शैतान कि गुपला डोए दामबा।

चिला सेरना आदम रांग हव्वाक सु कोंजोक कि वुर माञादा तेनि दिकपा ला दि ज़मबुलिंग दु खेरचा वोंगबा, कोंजोक सु खोशाक ला श्राप तातपा तेनि खोशाक ला सात तोंजा सेंबा। परन्तुे नम जिक कोंजोक स्वरग सोमा रांग ज़मबुलिंग सोमा जिक जोवानुक।

यीशु रांग खोए मिया ओए ज़मबुलिंग सोमा रु दोतका, तेनि फादिंग कि छिला ओए नोरयाकि खातोरु शासन फितका। खो मिया कि मिक नासु मिगछु तोलि पितोङा। था सु कांग नातपा रांग दुकपु मिदोतका। खोशाक मिङुआक। खोशाक मिनानुक या मिशिया। तेनि ओएरु चि कांग ङानबा मियोंङा। यीशु रांए राज्या रु दिमु रांग लोदिया शासन फितका। खो फादिंग खोशि मिया रांग ञाबु दोतका।