1. सृष्टि
आदि में परमेश्वर ई तरीका से सोब चीज कर सृष्टि करलक। उ छव दिन मे संसार कर आउर जे कुछ उकर में हेइक उ सब कर सृष्टि करलक। जब परमेश्वर पृथ्वी कर रचना करलक, तब पृथ्वी अंधार अउर खाली रहलक, काहेकि एखन ले परमेश्वर उकर में कोई भी चीज के नी बनाएं रहलक। लेकिन परमेश्वर कर आत्मा पानी कर उपरे मंडरात रहे।
फिन परमेश्वर कहलक, “इन्जोत हो” अउर इन्जोत होई-गेलक। परमेश्वर देखलक कि इन्जोत बेस आहे, आउर उके “दिन” कहलक। अउर इन्जोत के अन्धार से अलग करलक। अउर अंधार के उ “राईत” कहलक। परमेश्वर सृष्टि केर पहिले दिन में इन्जोत कर रचना करलक।
सृष्टि केर दूसर दिन में परमेश्वर कहलक, "पानी कर ऊपरे एगो फांका हो "आउर फांका होई गेलक। परमेश्वर ई फंका के "आकाश" कहलक।
तीसरा दिन परमेश्वर कहलक, "पानी एक ठीन जमा होई जाए अउर सुखल जमीन दिखाई देवे" उ सुखल जमीन के “पृथ्वी” कहलक आउर पानी के "समुन्दर” कहलक। परमेश्वर देखलक कि जेके उ बनाए रहलक उ बेस रहे।
फिन परमेश्वर कहलक, "पृथ्वी पर सोउब किसिम कर पेड़ आउर पौधा मन उगे।” आउर उसने होई गेलक। परमेश्वर देखलक कि जे उ बनाय रहलक उ बेस रहे।
सृष्टि केर चौथा दिन में परमेश्वर कहलक, "आकाश में ज्योति हो” अउर सूरज, चांद आउर तैरगण प्रकट होलक। परमेश्वर उ मनके पृथ्वी पर प्रकाश देवेक ले आउर दिन आउर राइत, मौसम आउर वर्ष मन में पहचान करेक ले बनालक।
पांचवा दिन परमेश्वर कहलक "जीयत जीव जन्तुमन पानी में भईर जाय। आउर आकाश में चरई उड़े "इ तरह से उ पानी में पंउरेक वाला सोउब जनतुमन के आउर चरईमन के बनालक। परमेश्वर देखलक कि उ बेस रहे आउर उमन के आशीष देलक।
सृष्टि केर छठवां दिन परमेश्वर कहलक, "भूइंया में रहेक वाला सउब किसिम के जानवर पैदा होवे" आउर परमेश्वर कर कहेक कर अनुसार वैसने होई गेलक। कुछ जानवर पालतू रहलय, कुछ जमीन में रेंगेक वाला, आउर कुछ जंगली जानवर रहलैं। आउर परमेश्वर देखलक कि उ बेस रहे।
फिन परमेश्वर कहलक, "आवा हमिन मनुष्य के आपन स्वरूप में आउर आपन लेखे बनाब। उमने पृथ्वी पर आउर सोउब जानवर उपरे राईज करबैं"।
अत: परमेश्वर माटी लेइके उकर से आदमी के बनालक आउर उकर में जीवन केर सांस के फूईक देलक। इ आदमी कर नाव आदम रहे। परमेश्वर ने आदम के रहेक ले एगो बड़कासन बगीचा के बनालक आउर उकर देखेक ताकेक ले आदम के हुआँ राईख देलक।
उ बगीचा कर बीचे में परमेश्वर दुईठो खास गाछ लगाय रहलक- जीवन कर गाछ आउर भले आउर बुरे कर ज्ञान कर गाछ। परमेश्वर आदम से कहलक कि उ उस बगीचा कर भले आउर बुरे कर ज्ञान कर गाछ छोईड़ के दूसरा कोनवे गाछ कर फल के खाए सकीला। अगर उ उ गाछ कर फल खालक तो उ मरीये जई।
फिर परमेश्वर कहलक "पुरुष केर अकेला रहेक ठीक नखे।" लेकिन कोनो जानवर आदम कर सहायक नीं होई शकलक।
इकर ले परमेश्वर आदम के गहरा नींद में डाइल देलक। फिन परमेश्वर आदम कर एगो पसली लेईके उकर से एगो स्त्री केर रचना करलक आउर उके आदम कर ठीना लेइके आलक।
जब आदम उके देखलक तो उ कहलक "अरे! इ तो मोरे नियर आहे! इ स्त्री कहाई, काहेकि ई पुरुष से बनाल जाहे।" इ चलते पुरुष आपन माय बाप के छोड़ देवेन आउर आपन पत्नी केर साथ एक होई जायना।
परमेश्वर पुरुष आउर स्त्री के आपन स्वरूप में बनालक। उ उमन के आशिष देलक आउर उमन के कहलक “ढेर सारा छउवा आउर छउवा पुता मन के पैदा करा आउर धरती में भईर जावा! ” आउर परमेश्वर देखलक कि जे कुछ भी उ बनाय रहे उ बहुते बढ़िया रहे, आउर उ उमन से बहुत खुश रहे। इ सब सृष्टि के छठवाँ दिन होलक।
सतवां दिन परमेश्वर उ सोउब काम मन के खतम करलक जेके उ करत रहलक। उ सातवां दिन के आशीष देलक आउर उके पवित्र ठहरालक, काहेकि उ दिन उ सब चीज कर सृष्टि कइर के समाप्त कइर रहलक। इ प्रकार से परमेश्वर संसार कर आउर जे कुछ उकर में आहे उ सबके सृष्टि करलक।
उत्पत्ति अध्याय 1-2 से बाइबल कर एगो कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।