2. पाप संसार में ढुकेला

आदम और उकर पत्नी सुंदर बगीचा में बहुत खुशी से रहत रहलै। उमन लुगा नि पिनधत रहलंय। सेकरो में उमन नी लजात रहलै। काहे कि संसार में पाप नी रहे। उमन हमेशा उ बगीचा में घुमत फिरत रहलैं आउर परमेश्वर से गोठियात रहलैं।

लेकिन उ बगीचा में एगो सांप राहत रहे। उ बहुत चालाक रहे। उ उ औरत से पूछलक, “का सच में परमेश्वर तोहिन के कईइ हे कि ई बगैचा केर कोनवे गछ कर फर के ना खाबा?”

उ स्त्री जवाब देलक “परमेश्वर हमिन के कइहे कि हमिन उ भला आउर बुरा कर ज्ञान कर गाछ के छोईड़ कोनों भी गाछ कर फर के खाय सकीला। परमेश्वर हामीन के कइहे कि अगर तोंय उ फर खाबे या छुबे भी तो तोंय मरिये जाबे।“

उ सांप स्त्री के जबाब देलक इ सच न लागे! तोंय नी मरबे, परमेश्वर खुदे जानेला कि जैसने ही उ फर के खाबे, तोंय परमेश्वर कर समान होई जाबे आउर उकरे लखे भला आउर बुरा के समझेक लागबे।”

जेखने स्त्री देखलक कि उ गाछ केर फर खाएक ले बेस, आउर देखेक में लुभावना रहे। उ भी बुद्धिमान बनेक चाहत रहे। इकर ले उ फर के तोइड़ के खालक। फिन उ आपन पति ले उ फर के देलक जे उकर संगे रहे आउर उ भी खालक।

अचके, उकर आंइख खुइल गेलक, आउर उके पता चइल गेलक कि उमन लंगटे रहैं। उमन पतईमन केर एक साथ सीके उमन कर लुगा बनालय, आउर उकर से आपन गतर के ढांकेक कर कोशिश करलैं।

तब उ आदमी आउर उकर बहोरिया उ बगीचा में घूमत रहलैं। परमेश्वर कर शबद के सुनलैं। उमन दुइयों परमेश्वर से छिप गेलैं। तब परमेश्वर आदमी के हंकालक “तोंय कहां आहिस?” आदम जवाब देलक “मोंय तोके बगीचा में घूमत सुनलो, आउर मोय डराय गेलों, काहे की मोय लंगटा रहों। इकर ले मोंय लुइक गेलों।”

फिर परमेश्वर पुछलक “तोके के बतालक कि तोंय लंगटा आहिस का तोंय उ फर के खाले जेके खायेक ले मोंय तोके मना कइर रहों।आदमी जवाब देलक तोंय जे मौके स्त्री देहिस एहे मोके उ फर के देलक तब परमेश्वर स्त्री से पूछलक तोंय इ का कइर देले? उ स्त्री बोललक सांप मोके बहकाय देलक।”

परमेश्वर सांप के कहलक, “तोंय श्रापित आहीस! तोंय पेट के बल चलबे। आउर माटी के चाटबे। तोंय आउर इ स्त्री एक दूसर से घृणा करबा। आउर तोर छउवा आउर उकर छउवा मन भी एक दूसर से घृणा करबैं। ई स्त्री कर वंश तोर मुड़ी के कुचबैं आउर तोंय उमन कर एड़ी के डंसबैं।

तब परमेश्वर स्त्री के कहलक, “मोंय तोर गर्भवती होवेक कर पीड़ा के बहुते बढ़ाए देबूँ। छउवा जनमाएक कर बथा के बहुत बढ़ाए देबूँ। तोंय आपन पति बटे चाहत रखबे आउर उ तोर उपरे राईज करी।

परमेश्वर आदमी के कहलक तोंय आपन बहोरिया कर सुनले आउर मोर आज्ञा के नी मानले। इकर ले धरती श्रापित ढोलक आउर तोके अन्न उबाएक ले कठिन मेहनत करेक कर जरूरत होवी। अब तोंय मईर जाबे आउर तोर गतर माटी में मिल जाई” उ आदमी आपन बहोरिया कर नाव हव्वा राखलक, जेकर माने होवेला “जिंदगी देवेक वाला” काहे की उ सब आदमीमन कर आदिमाय होवी। आउर परमेश्वर आदम आउर हव्वा के जानवर कर चमड़ा के पिन्धना बनायके उमन के पिन्धाय देलक।

फिर परमेश्वर कहलक, “अब भला आउर बुरा के जाइन के मनुष्य हामीन लखे हो गेलैं, इकर ले उमन के उ जीवन कर गच्छ कर फर के खायकले नी देवेक चाही। ऐसन ना हो कि उमन खाबंय आउर सादाले जीवित रहबैं” इकर ले परमेश्वर आदम आउर हवा के उ बगीचा से बाहरे निकलाय देलक। परमेश्वर उ बगीचा कर घुंसेक कर दुरा ठीन शक्तिशाली स्वर्गदूत मन के पहरा में लगाय देलक। ताकि केउ भी उ जीवन कर गछ कर फर के खाएक नी सकबंय।