23. यीशु कर जनम

यूसुफ नाव केर एगो धर्मी व्यक्ति केर संग मरियम कर मंगनी होई चुईक रहे। जब उ सुनलक कि मरियम गर्भवती हेइके तो उ जानत रहे कि उ उकर बच्चा ना लागे। लेकिन, उ मरियम के बदनाम नी करेक चाहत रहे, इकर ले उ उकर उपरे दया करेक कर आउर उके चुपचाप छोइड देवेक लागिन सोचलक। लेकिन इकर से पहले कि उ ऐसन करतक, एगो स्वर्गदूत उकर सपना में आएके उकर से बात करलक।

उ स्वर्गदूत कहलक, "हे यूसुफ, मरियम के अपन पत्नी केर रूप में लेइके आनेक से मईत डराव। उकर भीतर जे छउवा (बच्चा) हेईक उ पवित्र आत्मा बटे से आहे। उ एगो बेटा के जनम देवी। उकर नामव यीशु रखबा (जेकरअर्थ हेइके, 'यहोवा बचायला ), काहेकी उ आदमीमन के उमन केर पाप से बचाई।"

अतः यूसुफ मरियम से शादी केरलक आउर उके आपन पत्नी कर रूप में घर लेई आलक, परन्तु उकर छउवा के जनम देवेक तक उ उकर साथे नी सुतलक।

जब मरियम कर जनम देवेक कर समय भिरे रहे, तो उ आउर यूसुफ बैतलहम जायक ले एगो लम्बा यात्रा करलय। उमन के हुहाँ जाएक रहे काहेकि रोमी अधिकारी इस्राएल में रहेक वाला सोब आदमीमन कर गिनती करेक चाहत रहे। उ मन चाहत रहे कि सोब आदमी मन हुहाँ जाबएँ जहाँ उमन कर पूर्वज रहत रहलय। राजा दाऊद कर जनम बैतलहम में होई रहे, आउर उ मरियम आउर यूसुफ दोईयों कर पूर्वज रहंय।

मरियम आउर यूसुफ बैतलहम गेलंय, लेकिन हुहाँ जानवर के राखेक वाला (स्थान) जगह केर अलावा उमन ले ठहरेक लागिन कोई जगह नी रहे। जहाँ मरियम आपन छउवा के जनम देलक। उ उके (कठौती) चरनी में सुताय देलक काहेकि हुहाँ उकर ले कोई बिस्तर नी रहे। उमन उकर नाव यीशु राखलंय।

उ राइत, हुवां नजदीक कर खेत में कुछ गड़ेरियामन आपन भेड़ कर रखवाली करत रहलय। अचके में एगो चमकदार स्वर्गदूत उ मन ठीन प्रगट होलक, आउर उमन डराय गेलय। उ स्वर्गदूत कहलक “ना डरावा, काहेकि मोर ठीन तोहर ले शुभ सन्देश हेइक। बैतलहम में मसीह, स्वामी कर जनम होई हे।

जाएके उ बालक के खोजा, आउर तोहिन उके कपड़ा में लिपटल आउर चरनी में सुतल पाबा।" अचानक से, आकाश स्वर्गदूत मन से भईर गेलक। उमन परमेश्वर कर बड़ाई करत रहलय। उमन कहलय, "पूरा महिमा स्वर्ग में विराजमान परमेश्वर के मिलेक। धरती में उ आदमीमन में शांति होवे जेके उ चिंता करेला! "

तब स्वर्गदूत चईल गेलक। उ चरवाहा मन भी आपन भेड़ के छोईड़ के बालक के देखेक गेलय। तुरंते उमन उ जगह ठीन पहुंचलय जहाँ ठीन यीशु रह्लक आउर उमन उके चरनी में सुतल पालय जैसन कि उ स्वर्गदूत कईह रहे। उमन बहुत उत्साहित रह्य। तब उ चरवाहा वापस घुइर के हुहाँ से लौट गेलक जहाँ उमन कर भेड़ रह्लक। उमन जे कुछ भी सुनलय आउर देखलय उ सब केर ले उमन परमेश्वर कर स्तुति करत रहलय।

पूरब में दूर एगो देश में कुछ पुरुष मन रहै। उमन तराईगन के पढ़लय आ उर उमन बड़ी बुद्धिमान रहलय। उमन एगो विचित्र तराईगन के देखलय। उमन कहलय कि इकर माने है कि यहूदीमन लागिन एगो राजा कर जनम होई हे। इकर ले उ बालक के देखेक लागिन आपन देश से यात्रा करेक कर बिचार करलय। एगो लम्बा यात्रा कइर के, पाछे उमन बेतलेहेम आलय आउर उ घर के पालय जहाँ यीशु आउर उकर माय बाप ठहइर रहलय।

जब इ पुरुष मन यीशु के अपन माँय के संग देखलय तो उमन घुटना टेइक कर उकर आराधना करलय। उमन यीशु के कीमती दान देलय। फिर उमन आपन घर घुइर गेलय।