25. शैतान यीशु कर परीक्षा करेला

यीशु कर बपतिस्मा होवल कर तुरन्त बाद ही, पवित्र आत्मा उके जंगल में लेई गेलक। यीशु हुहाँ चालीस दिन आउर चालीस रात रहलक। उ समय उ उपवास कईररह्लक, आउर शैतान यीशु केर पास आएके पाप करवाएक लागिन उकर परीक्षा करलक।

पहले, शैतान यीशु के कहलक, "अगर तोय परमेश्वर कर बेटा हेकिस तो इ पखल के कह कि रोटी बइन जई ताकि तोय खाय सकीस!"

परन्तु यीशु शैतान के कहलक, "परमेश्वर केर वचन में इ लिखल हेइके, 'जिन्दा रहेकले मनुष्य के केवल रोटी कर जरुरत नहीं, परन्तु उके हर उ बात कर जरुरत हेइक जे परमेश्वर उमन से कहेला! "

तब शैतान यीशु के मंदिर केर सबसे उपरे चोटी में लेई गेलक। उ उकर से कहलक, "अगर तोय परमेश्वर कर बेटा हेकीस तो हिंया से नीचे डेइग दे, काहेकि लिखल हेइके, 'परमेश्वर तोके लोकेक ले अपन स्वर्गदूत के आज्ञा देवी कि तोर पाँव पखल से ठेस नी लागी।'"

लेकिन यीशु उसने नी करलक जे शैतान उके करेक ले कइह रहे। इकर बजाए, उ कहलक, "परमेश्वर हर आदमी से कहेला, 'तोहीन प्रभु अपन परमेश्वर कर परीक्षा न करबा।'"

फिर शैतान उके संसार केर सारा राईज दिखालक। उ उके दिखालक कि उ कितना शक्तिशाली रहे, आउर उ कितना धनी रहे। उ यीशु से कहलक, "मोय तोके ई सब देई देबों अगर तोय घुटना टेईक कर मोर उपासना करबे।"

यीशु जवाब देलक, "हे शैतान, मोर ठीन (पास) से चईला जा! परमेश्वर केर वचन में उ आदमीमन के आदेश देवेला, 'केवल अपन प्रभु परमेश्वर कर आराधना करबा। परमेश्वर कर रूप में केवल उकर आदर करबा।"

यीशु शैतान कर परीक्षा से हार नी मानलक, इकरले शैतान उकर पास से दूर चईल गेलक। तब स्वर्गदूत आयके यीशु कर सेवा टहल करेक लागलक।