37. यीशु लाज़र के मरल में से जियालक

लाज़र नाव कर एगो आदमी रहे। उकर दुइठो बहिन रहलय जेमन कर नाव मरियम आउर मार्था रहे। उमन सब यीशु कर गहिरा (बढियां) दोस्त (मित्र) रहलय। एक दिन केऊ हर यीशु के बतालक की लाजर ढेईर बीमार आहे। जब यीशु सुनलक तो उ कहलक, “ई बीमारी लाजर केर मरेक ले नखे लेकिन परमेश्वर केर महिमा लागिन हेके तेकर ले आदमीमन परमेश्वर कर आदर करबय।”

यीशु अपन दोस्त मन से प्रेम करत रहे, लेकिन जहाँ उ रहे हुवां उ दुई दिन तक इंतजार करलक। उ दुई दिन कर बाद उ आपन चेलामन के कहलक “आवा वापस यहूदिया प्रदेश जाब” चेलामन जवाब देलय, “लेकिन हे गुरु अभी कुछ समय पहले हुवांकर आदमी मन तोके मारेक चाहत रहलय! ” यीशु कहलक, “हमर दोस्त लाजर निंदाय जाय जाहे आउर मोके उके जगायक हेइक।”

यीशु चेलामन के जवाब देलक, हे प्रभु, अगर लाजर निदाथे तो उ ठीक होई जाई।” तब यीशु उमन के साफ कइह देलक “लाजर मईर जाहे। मोय आनंदित आहों कि मोय उ ठीन नी रहों, ताकि तोहीन मोर उपरे बिश्वास कईर सकेला।”

जब यीशु लाज़र केर गाँव पहुँचलक तो लाज़र कर मरल पहिले से ही चाईर दिन होई जाय रहे। मार्था यीशु से मिलेक ले बहरे आलक आउर कहलक, “हे प्रभु, अगर तोय हियाँ होते तो मोर भाई नी मरतक। लेकिन मोय बिश्वास करोना कि जे कुछ भी तोय परमेश्वर से मांगबे उ तोके देवी।”

यीशु जवाब देलक, "पुनरुत्थान आउर जीवन मोय हेकों। जे केऊ मोर उपरे बिश्वास करी अगर मईर भी जई तोउ पर भी जीयी। जे केऊ मोर उपरे बिश्वास करेला उ कभी नी मरी। का तोय ई बात में बिश्वास करीस?” मार्था जवाब देलक हे प्रभु, मोय बिश्वास करोना की तोय परमेश्वर कर बेटा मसीह हेकीस।”

तब मरियम आलक। उ यीशु केर गोड़ में गिर के कहलक, “हे प्रभु अगर तोय इठन रहते तो मोर भाई नी मरतक।” यीशु उकर से पूछलक, “तोहीन लाजर के कहाँ ठीन राईख हा? उमन उके बतालंय, “कबर (मसड़ा) में। आव आउर देईख ले।” तब यीशु कान्देक लागलक।

उ कबर कर एगो गुफा रहे जेकर दुरा में एगो पथर से धांकल रहे। जब यीशु कबर ठीन पहुंचलक तो उ उमन के कहलक, “पखल के हटाय देवा” लेकिन मार्था कहलक, “उकर मरल चाईर दिन होई जाहे। उकर में से बदबु आवत होई।”

यीशु जवाब देलक, "का मोय तोहीन से नी कइह रहों कि अगर तोहीन मोर उपरे बिश्वास करबा तो परमेश्वर कर सामर्थ के देखबा?” इकरले उमन पखल के हटाय देलंय।

तब यीशु उपरे स्वर्ग बटे देखलक आउर कहलक, “हे अब्बा, मोर सुनेक ले तोर धन्यवाद करोना। मोय जनोना कि तोय हमेशा मोर सुनीसला, लेकिन मोय इठन खड़ा ई सबकर सहायता करेक ले कहलक ताकि ई बिश्वास करबय कि तोय मोके भेइज हीस।” तब यीशु आवाज लगालक, “हे लाजर, बहरे नीकईल के आव।”

अतः लाज़र बाहरे निकईलके आलक! उ एखन तक कफन में लिपटल रहलक। यीशु उमन के कहलक, “ई कफन के निकलायेक में उकर सहायता करा आउर उके अजाद करा।” इ चमत्कार कर कारण बहुत से यहूदीमन यीशु उपरे बिश्वास करलय।

लेकिन यहुदिमन कर धार्मिक अगुवा यीशु से जलेक लागलंय, इकरले उमन योजना बनाएक ले एक संग जमा होलंय कि कैसन यीशु आउर लाजर के माईर डालबंय।