39. यीशु उपरे मुकदमा चलेला

अब इ आधा राईत कर बेरा रहे। उ सैनिक मन यीशु के महायाजक कर घर लेइके गेलय काहेकि उ यीशु से सवाल करेक चाहत रहे। पतरस दूर से उकर पीछा करत रहलक। जब सैनिक मन यीशु के घर में लेई गेलय तो पतरस बहरे रुइक के अपने आप के आईग सेंकात रहे।

घर भीतरे, यहूदी अगुवामन यीशु उपरे मुकदमा चला लय उमन उकर बिरुद्ध झूठ बात के बोलेक लगीन बहुत से झूठा गवाह मन के लेइके आलय। हलांकि उमन कर बात एक दुसर से सहमत नी रहलक, इकरले यहूदी अगुवा ई साबित करे नी पारलय कि उकर में कोनो बात कर दोष रहलक। यीशु कोनो नी कहलक।

अंत में, महायाजक सीधे यीशु बटे देईख कर कहलक, "हमिन के बताव कि का तोहें जीवित परमेश्वर कर बेटा मसीह हेकीस?"

यीश कहलक, "मोय हेकों आउर तोंय मोके परमेश्वर कर संग बैठल आउर स्वर्ग से आवते देखबा” महायाजक अपन कपड़ा फाईड़ लेलक काहेकि जे यीशु कहलक उ उ बात उपरे बहुत गुस्साय रहे। उ दूसर आगुवामन उपरे चिल्लालक, “हामीन के इ बताएक ले केखों आउर गवाह कर जरूरत नखे कि इ आदमी का कइर हे! तोहिन अपने (स्वयं) इके इ कहते सुनला कि उ परमेश्वर कर बेटा हेके। उकर बारे में तोहरेमन कर का बिचार हिक?

सब यहूदी अगुवामन महायाजक के जवाब देलय, "उ मरेक लायक हेइक! " तब उमन यीशु कर आँईख में पट्टी बाँधलय, उकर उपरे थूकलय, उके मारलय, आउर उकर मजाक उड़ालंय।

आउर पतरस, जब उ घर केर बाहरे इंतिजार (प्रतीक्षा) करत रहे। तब एगो दासी छोंड़ी उके देखलक। उ उके कहलक “तोय भी यीशु कर संग रहले।” पतरस मना कइर देलक। बाद में दुसर छोंड़ी इहे गोईठ के कहलक आउर पतरस फिनु मना कइर देलक। अंत में, कुछ आदमीमन कहलय, हमींन जानीला कि तोय यीशु कर संग रहले काहेकि तोहीन दुईयो गलील प्रदेश कर हेका।”

तब पतरस कहलक, “अगर मोय इ आदमी के जानोना तो परमेश्वर मोके शाप देवी! ” तुरंते पतरस इ लखे किरिया खाल केर बाद, एगो मुर्गा बोइल देलक यीशु पीछे मुईड़ (घुइर) के पतरस के देखलक।

पतरस उठन से चईल गेलक आउर बिलइक-बिलइक (फूट-फूट) कर कान्दलक। ओहे घडी यीशु के पकुड़वायक वाला यहूदा देखलक कि यहूदी अगुवा मन यीशु कर मौत कर सजा सुनालय। यहूदा बहुत दुखी होई गेलक आउर जायके आपने आप के माइर डाललक।

अब उ देश कर राज्यपाल पिलातुस रहे। उ रोम लागिन काम करत रहे। यहूदी अगुवामन यीशु के उकर ठीना लेके आलय। उमन चाहत रहय कि पिलातुस उके मौत कर सजा सुनाय दे आउर उके माईर मरुवावा। तब पिलातुस यीशु से पूछलक, "का तोय यहूदिमन कर राजा हेकीस?"

यीशु जवाब देलक, "तोय सचे कहले। लेकिन मोर राईज हियाँ धरती में नखे। यदि होतक तो मोर दास मन मोर लागिन लड़ाई करतय। मोय पृथ्वी में परमेश्वर केर बारे में सच बताएक ले आय हों। हरेक जन जे सच से प्रेम करेला उ मोर सुनेला।" पिलातुस कहलक, "तो सच का हिक?"

यीशु केर,संग बात करल बाद, पिलातुस बाहरे भीड़ ठीन जायके कहलक, "मोय ऐसन कोई कारण नी पालों कि ई आदमी मारेक लायक होवी।" लेकिन यहूदी अगुवामन आउर भीड़ चिल्लाय कर कहलक, "उके क्रूस में चढ़ाय देवा!" पिलातुस जवाब देलक, "उ कोनो भी गलत कर दोषी नखे।" लेकिन उमन आउर भी जोर से चिल्लालय। तब पिलातुस तीसरा बार कहलक, "उ दोषी नखे! "

पिलातुस डराय गेलक कि उ भीड़ दंगा शुरू कईर देवी, इकरले उ अपन सैनिक मन दवारा यीशु के क्रूस में चढ़ाएक लागिन माईन गेलक। रोमी सैनिक मन यीशु के कोड़ा लगालय, आउर उके राजा लखे कपड़ा पहनालय, आउर उकर मुईड़ में कांटा कर बनल मुकुट के रखलंय। तब उमन इ कईह के उकर मजाक उड़ाय लागलंय, “देखा यहूदी मन कर राजा! ”