40. यीशु क्रूस में चढ़ाय जायेला

यीशु कर ठट्ठा करल केर बाद, सैनिकमन उके क्रूस में चढ़ाएक ले लेई गेलय। उमन उ क्रूस के उखे से उठवालय जेकर में उके मरेक रहे।

उ सैनिकमन यीशु के उठीन लेईके आलय जे खोपड़ी कहलात रहे। आउर उकर हाथ आउर उकर गोड़ के क्रूस में ठोंइक देलय। लेकिन यीशु कहलक, “हे बाबा, इमन के क्षमा कइर दे, काहेकि इमन नी जनेना कि इ का करथय।” उमन एगो तख्ती के भी उकर मुड़ी कर उपरे टाइंग देलय। उकर में लिखल रहे, “यहूदी मन कर राजा” पिलातुस उमन के एहे लिखेक ले कईह रहे।

तब सैनिकमन यीशु कर कपड़ा लागिन चिठ्ठी डाईल के लोटरी करलय। जब उमन एसन करलय तो उमन उ भविष्यवाणी के पूरा करलय जेकर में कहल गेले रहे, उमन मोर कपड़ा के अपन में बाइंट लेलंय, आउर मोर कपड़ा ले चिठ्ठी डाललंय।"

उठींन दुईठो डाकूमन भी रहलय, जेमन के सैनिकमन ओहे घडी क्रूस उपरे चढ़ाय रहलय। उमन उमन के यीशु केर दुईयो बटे रखलय। उकर में से एगो डाकू यीशु केर मजाक उड़ालक, लेकिन दूसरा कहलक, “का तोय नी डराइस कि परमेश्वर तोके दण्ड देवी? हमींन त बहुत से बुरा काम कईर के दोषी ठहराय गेले ही, लेकिन इ आदमी निर्दोष हेइक।” फिर उ यीशु के कहलक, “जब तोय अपन राईज में आबे तो कृपा कईर के मोके इयाद करबे” यीशु जवाब देलक, “आइज ही तोय मोर संग स्वर्गलोक में होबे।"

यहूदी अगुवा मन आउर भीड़ केर दुसर आदमीमन यीशु कर मजाक उड़ालक। उमन उके कहलय, “अगर तोय परमेश्वर कर बेटा हेकीस, तो क्रूस से नीचे उतईर के आव आउर अपन के बचाय ले! तब हमींन तोर उपरे बिश्वास करब।"

तब उ पूरा देश में आसमान पूरी तरह से करिया होई गेलक, यदपि उ दिन कर बीच कर समय रहे। इ दोपहर कर समय करिया होई रहे अउर तीन घंटा तक एसने रहलक।

तब यीशु हकाय के कहलक “पूरा होलक! हे अब्बा, मोय अपन आत्मा तोर हाथ में सोपथों।” तब उ अपन मुड़ के झुकालक आउर अपन प्राण छोइड देलक। जब उ मरलक तो एगो भूकंप आलक। उ बड़का परदा जे परमेश्वर कर उपस्थिति से लोग मन केर अलग करत रहे उपरे से निचे बटे फाईट के दुई हिस्सा में होई गेलक।

अपन मरेक कर द्वारा, यीशु आदमीमन लागिन परमेश्वर ठीन आवेक कर रास्ता खोइल देलक। जब यीशु कर निगरानी करेक वाला एगो सैनिक जे कुछ होई रहे, इ सबके देईख रहे तो उ कहलक, “निश्चित रूप से ई आदमी निर्दोष रहे। ई परमेश्वर कर बेटा रहे।”

तब यूसुफ आउर नीकुदेमुस नाव कर दुईठो यहूदी अगुवा आलय। उमन बिश्वास करत रहलय कि यीशु ही मसीह रहे। उमन पिलातुस से यीशु कर शरीर के मांगलय। उमन उकर देहके कपड़ा में लेपटलंय। तब उमन उके एगो चट्टान में से काईट केर बनाल कबर में लेई गेलय आउर उके भीतरे राईख देलंय। तब उमन उ कबर केर दुरा के बंईंद करेक ले एगो बड़काले पखल के लुढ़काय देलय।