9. परमेश्वर मूसा के बुलायला

युसुफ कर मरल कर पाछे उकर सब जाइत गोतिया मिश्र देश में रहेक लागलय। उमन आउर उकर वंश कई बरस (साल) तक मिश्र में रहलय आउर उमन बहुत संतान पैदा करलय। उमन इसरायली कहलालय।

कई साल कर पाछे इसरायली कर संख्या बहुत बईढ जाय रहे। आउर मिश्र वासी मन अब इ बात से आभारी नी रहलय कि उमन कर सहायता करेक ले युसुफ बहुत कुछ कईर रहे। उमन इसरायली मन से डराय गेलय काहे कि उमन गिनती में उमन से बहुत बगरा रहलय। इकरले उ समय मिश्र में शासन करेक वाला फिरौन इस्राएली के मिश्र कर गुलाम बनाय देलय।

मिश्रवासी इस्राइलीमन के ढेर घर आउर हियाँ तक कि कईगो शहर बनायके ले मजबूर करलय उ कठिन परिश्रम उमन कर जीवन के बड़ा दुःख दायी बनाय देलक लेकिन परमेश्वर उमन के आशीष देलक आउर उमन के आउर संतान जनम लेलयं।

फिरौन देखलक कि इसरायली मनले बहुत छउवा पैदा होवत रहै इकेरले उ आपन आदमी के इसरायली कर सब लड़का (बाबु) छउवा के नील नदी में फेंकेक कर आउर माइर डालेक कर आज्ञा देई देलक।

एगो इसरायली स्त्री एगो छोड़ा छउवा के जनम देलक। उ आउर उकर आदमी जेतना उमनसे होई सकत रहे लुका्य के राखलय।

जब उ छउवा केर माय बाप उके आउर अधिक लुकाय नी पारलक, तो उमन उके मारेक जायेक से बचाएक ले एगो पाऊंरेक वाला टोकरी में नील नदी कर किनारे सरकंडा कर बिच में राइख देलय। उकर बड बहिन इ देखेक ले उकर निगरानी करलक कि उकर संग का होवी।

फिरौन कर बेटी उ टोकरी के देइ ख के उके झांकलक। जब उ एगो बच्चा कर रूप में लेई लेलक। उ एगो इस्राइली स्त्री के दूध पियायक ले काम में राखलक, बिना ये जाइन के कि उ उस बच्चा कर वास्तविक माय रहे। जब उ छउवा इतना बड़का होई गेलक। कि अब उके आपन माय कर दूध कर जरुरत नखे, तो उ फिरौन कर बेटी ठीन उके घुराय देलक उकर नाव मूसा रहे।

एक दिन, जब मूसा बड़का होई जाय रहे तो उ देखलक कि एगो मिश्री एगो इस्राइली के पिटाई करत रहे। मूसा आपन साथी इस्राइली के बचायक कर प्रयास करलक।

जब मूसा सोचलक कि इके कोई नी दखबय तो उ मिश्री के माइर डाललक आउर उकर शव के डाफनाय देलक। लेकिन मूसा जे कईर रहे सेके कोई देईख लेई रहंय।

फिरौन के मालूम होई गेलक कि मूसा का कइर हे। उ उके माइर डालेक कर कोशिश करलक लेकिन मूसा मिश्र से जंगल में भाइग गेलक। फिरौन कर सेना मन उके हुवां खोजे नी पारलेन।

मिश्र से दूर जंगल में मूसा एगो चरवाहा बईन जाई रहे। उ हुवां एगो स्त्री से शादी कईर लेलक आउर दूइठो बेटा जन्मलै।

मूसा आपन ससुर कर भेड़ कर झुण्ड केर देखभाल करत रहे। एक दिन उ एगो जलत झाड़ी के देखलक जे बिना राख होले जलत रहे। उके देखेक ले उ झाड़ी ठीन नजदीक गेलक। जब उ उकर बहुते नजदीक रहे तो परमेश्वर उकर से बात करलक उ कहलक “हे मूसा, अपन जूता के उतराय दे। तोय एगो पवित्र स्थान में खड़ा ठढ़ाए हीस।

परमेश्वर कहलक “मोय आपन आदमी कर दुःख के देइखों हों। मोय टोके फिरौन ठीन भेजबू ताकि तोय इस्राएली के मिश्र कर गुलामी से निकलाय के लानबे। मोय उमन के कनान देश देबुं उ देश जे के मोय अब्राहम इसहाक आउर याकूब के प्रतिज्ञा कईर हों।

मूसा पुछलक “अगर आदमीमन जानेक चाहबय कि मोके के हर भेईज हें तो मोय का कहबू ?” परमेश्वर कहलक “जे मोय आहों से मोय आहों। उमन के कह “मोहे हों मोके तोहीन ठीन भेईझे” उमन से इ भी कह “मोय तोर पूर्वज अब्राहम, इसाहक आउर याकूब कर परमेश्वर यहोवा हेकों मोर इ नाम हमेशा कर हेइके”।

मूसा डरत रहे आउर फिरौन ठीन जायेक नी चाहत रहे काहेकि उ सोचलक कि उ अच्छा बोले नी पारेला, इकेरले परमेश्वर मूसा कर भाई हारूण, के उकर सहायता करेक ले भेजलक।