1. मुलुक रा जुरऊ।
ओशि यो परमेश्वरुस जुमऊ लोमशित सिङ -सङ जुराऊ। दोक टु दयारु नंऊ छे-तोई ओदो सिङरा जुराऊ। परमेश्वरुस मुलुक जुरऊ ज्ञपतिङ दो खाबङबङ मेननङ छोयो मातोई, छु लोननङ परमेश्वरुस दोननंऊ छोयो माजुरऊ तोई। दत लि परमेश्वरु जिवा “ तिऊ” थोरिङ ठुरातु पोसी तोई।
दत परमेश्वरुस रिंऊ, “ छति वङछोत।” दत “छति” वंऊ जेऊ। परमेश्वरुस तंऊ “छति” ऐपो तश दोरा “नेन” लोऊ। अला दोक दोरा खाबङबङुस खेचौ लऊ दोरा दोक “मुन” लोऊ। परमेश्वरुस मुलुक जुरामऊ ई दयार दोमया “छतिरा” जुरऊ पिनु।
मुलुक जुरऊ निश दयारू नंऊ परमेश्वरुस रिंऊ “तिऊ” थोरिङ इत खेचौ गिनमा।” अला दत इत खेचो वंऊ जेऊ। परमेश्वरुस दो खेचो वंई रा “नम” लोऊ।
हुम दयार दोमया परमेश्वरुस रिंऊ, “ती इ जागऊ कट्ठा वङमा गिनमा अला फोसि मटङ तङमा गिनमा।” दोक फोसि मटङ रा “मुलुक” लोऊ अला “ती” रा समुन्द्रङ लोउ। परमेश्वरुस तंऊ कि छे दोगुस जुरामिन तशे दो ऐपो तश।
दत परमेश्वरुस रिंऊ, “मुलुकु नंऊ सिङ सङ बोठङ नङ सोलत टुङमा।” अला दत ओशियो वंऊ। परमेश्वरुस तंऊ छे दोगुस जुरामिन दो ऐपो तश।
मुलुक जुराऊ प दयार दोमया परमेश्वरुस रिंऊ नमु नंऊ “छति” वङमा।” दत नी, गोलछङ, नङ, कर्मा तुरो। परमेश्वरुस मुलुकु नंऊ “छति” खेमा रा “नेन” नङ “मुन” नमदिंऊ नङ बोषङु नंऊ खेचो लमा रा जुराऊ। परमेश्वरुस तंऊ दोक छे लि लऊ दो एपो तश।
ङा दयार दोमया परमेश्वरुस रिंऊ, “सारस छुमा ती रा बुंऊ पिनि अला प्यात नमु यपु जेई।” ओशि यो परमेश्वरुस तिऊ नंऊ पोसि सिङ छुमा नङ अला प्यात पङरा जुरऊ। परमेश्वरुस तंऊ जि ता ऐपो तष दत दोपङरा बोरङ खेऊ।
मुलुक जुरऊ टु दयारु नंऊ परमेश्वरुस रिऊ, “माटङु नंऊ पोसि सिङ छुमा तोमा गिनमा।” अला परमेश्वरुस रिङमिन खोता यो वंऊ। अला छुमा, क्युमु पोसि तोई, मटङु प्रिनलति तोई, अला बोनङु छुमा तोई। परमेश्वरुस तऊं जि ता ऐपो तश।
परमेश्वरुस रिंऊ, “जिरश उलपङ मी रा एनु रूंअङु अला रंऊ इ रुखि जुरामा। दो मुलुकु नंऊ सिङ- सङ छुमा पोऊ थोरिङ राज लरो।”
दत परमेश्वरुस फतिङ थुतु मी रा जुराऊ, दत दोननंऊ सारस पोसमा शितिङ सा रा फुसुतु पिनु। दत दो इत शिंई मी वंऊ जेऊ। दो मिंऊ मिन आदम तोई। आदम रा पोसमा शितिङ परमेश्वरुस इत चेइ रि जुरऊ, अला री रा खोनमा शितिङ आदम रा ओदा तऊ पिनु।
दो रिऊ किललिङ परमेश्वरुस निश मारुखि बोठङ टुंऊ पिनु- मिऊ जोलोमु बोठङ अला ऐपो नङ हलम रा छोतमा बोठङ। परमेश्वरुस आदम रा लोऊ कि दो रिऊ जोलोमु बोठङ नङ ऐपो, हलमु छोतमा बोठङ रा सोठऊ अला हलेस लि बोठङु ऊशो जामा लिई। दत लि दो बोठङु ऊशो जानङ ता दो सिऊ जेई।
दत परमेश्वरुस रिंऊ, “फोबलङ रा खेचो पोसमा ऐपो मातेई।” ऊङ लि छुमा आदमु पङगोत वङमा मलिऊ।
ओदोक परमेश्वरुस आदम रा डरा ञोनमतु तऊ। दत परमेश्वरुस इत हरको हनु दोरा इत योबलङ जुराऊ पिनु अला दोरा आदमु रा क्युफु जेऊ।
ओसपरिङ आदमुस दोरा खोनु ओशि लोऊ, “जि ता अङ खोता तश। जीरा “योबलङ” लोमा, छु लोननङ जीरा फोबलङकु रत जुरामिन तश।” ओदोक फोबलङ रऊं अमा-अपा रा सोठाऊ ऐनु योबलङ नङ ञमफो वंऊ जेइ।
परमेश्वरुस फोबलङ नङ योबलङ रा ऐनु रूअङ नङ जुराऊ। दोक दोरा बोरङ खेऊ दत लोऊ, “गोप चिगजा नङ कोत-पात तऊ मुलुक रा पुऊ पिननिश।” अला परमेश्वरुस तंऊ कि छे लि दोक जुराऊ दो हत ऐपो तश, अला दो सिङ तंऊ हत गरीस सिऊ। जि सिङ-सङ मुलुक जुरामऊ टु दयारु नंऊ वंऊ तोइ।
दत शिनिश दयार तुमा परिङ परमेश्वरुस छे-लि लेन तश दो सिङ लेन पङरा क्याऊ पिनु। दोक शिनिश दयार रा बोरङ खेऊ नङ दोरा संखमा लोऊ पिनु, छु लोन- नङ परमेश्वरुस मुलुक जुरामा क्याऊ तोई। ओशि यो परमेश्वरुस मुलुकु नंऊ छे लि तश दो सिङ-सङ जुराऊ।
उत्पत्ति पाठ 1-2 गुस बाइबलु इत कोथा।
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।