10. सा मुसीबोत पङ।
परमेश्वरूस मुसा नङ हारुन रा लोऊ कि फिरौन रऊ मी वंऊ जेतो। दत दोपङ फिरौनु रा जेऊ दत दोपङक लोऊ, “इस्त्राएलु परमेश्वरुस ओशि रिंऊ, “अङ मिपङरा जेमा मत।” दत लि फिरौनुस दोपोऊ मागोऊ अला इस्त्राएली पङ रा जेमा शितिङ पुरुतु पिनमा बसकयङ दोक दोपङरा कयति लेन लमा शितिङ चेकचे लऊ।
फिरौन दोपङ रा जैमा शितिङ दयारो मना लऊ पोसु, दत गोरि परमेश्वरुस मिस्रु नंऊ सा बैमा थङ मुसीबोत पिनु। ओइ मसीबोतु ज्ञपतिङ, परमेश्वरूस फिरौन रा कनु कि दो फिरोन नङ मिस्रु सत पङ बसकयङ खुचि शेच्चन तोक।
परमेश्वरुस दत नीलु लुङफा रा बोदलऊ पिनु, दत लि फिरौनुस अला लि इस्राएली रा जेमा माखैऊ।
परमेश्वरूस सिङ मिस्रु टिपलोक पिनु। फिरौनुस टिपलोक पङरा वरि लमा शितिङ मूसा रा ओरछे लोऊ। दत लि सिङ टिपलोक सिऊ ज्ञपतिङ, फिरौनुस एनु मोनङ रा शेच्चन लऊ पिनु अला इस्राएली पङ मिस्त्रुस हनतु जेरो।
ओदोक परमेश्वरूस चिगित चिइ बियङक पोऊ मुसीबोत पिनु। ओदोऊ ज्ञपतिङ दोक शुई टिपि कोयङ पोऊ मुसीबोत पिनु। फिरौनुस मूसा नङ हारून रा कुतु दत दोक रिंऊ मेननङ दत दो ओलडो रा रोकयानङ दत इस्राएली मिस्र रा सोठऊ जेमा लिइ। दत मूसाक परमेश्वर रा ओरछै लोऊ दत मिस्रउ रत शुइ टिपि कोयङ पङरा हनु पिनु। दत फिरौनुस एनु मोनङ रा करई लऊ अला दो मीपङरा ओदत जेमा माखेऊ।
दोऊ होमशित, परमेश्वरूस मिस्रिऊ सिङ कयुमु छुमा पङरा शोतु सीमा मतु तोइ। दत लि फिरौनु मोनङ करई वंऊ जेऊ अला दोक इस्राएली पङ रा जैमा माखेऊ।
दत परमेश्वरूस मूसा रा फिरौनु तुसिङ लानु नऊ मेलिङ फतिङ पयामा लोऊ। दत दोक ओशि लऊ दत मिस्रु मिऊ डियङु जुकरेर सा पोटोक हनतु तु, दत लि इस्राएली पङरा छोयो मावंऊ। परमेश्वरूस फिरौनु मोनङ रा क्रईं लऊ पिनु, अला फिरौनुस इस्राएली पङरा आजाद वंऊ ओदत जेमा माखेऊ।
दोऊ ज्ञपतिङ, परमेश्वरूस रस थतु अला मिस्त्रु सिङ फोलङ पङरा खोतोम लऊ पिनु अला उङ लि दकपा हनतु दोरा सतु पिनु। फिरोनुस मूसा नङ हारून रा कुतु अला दोक रिंऊ, “गस पाप लमिन। किमपङ जेमा लिई।” दत मूसाक परमेश्वर रा कोलङ लऊ, दत नमुस रस दतमा बोनत वंऊ।
दत लि फिरौनुस हे पाप लऊ अला एनु मोनङ रा जेप लऊ पिनु। दोक इस्राएली पङरा आजाद वंऊ ओदत जैमा माखेऊ।
दत परमेश्वरूस मिस्रु नंऊ बैमु वा रा तुमा खेऊ। दो बैम पङक दो सिङ फोलङ रा जऊ पिनु हलेसा फौलङ रसुस मासतु तोई।
दत परमेश्वरूस मिस्त्रु खबङबङ लऊ पिनु दो हुम दयार शम वंऊ पोसु। जि ओनचे खुचि खबङबङ तोइ कि मिस्रु मी पङ एनु कयुमुस हन्तमा मालीरो। दत लि दा इस्राएली मी पङ पोसि तोई ओदा छति तोई।
जि गू मुसीबोतु ज्ञपतिङ लि, फिरौनुस इस्राएली पङरा दत जेमा माखेऊ। छु लोन नङ फिरौनुस परमेश्वरू कमचित मागोऊ ओदोक परमेश्वरू इत कयामा मुसीबोत रा पिनमा प्लान जुरऊ। जि फिरौनु मोनङ रा लेऊ पिनि।
निर्गमन पाठ- 5-10 गुस इत बाइबलु कोथा।
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।