9. परमेश्वरुस मूसा रा कुतु।
युसुफ सिऊ ज्ञपतिङ दोऊ सिङ पेरङ मिस्र बोसतु। दत अला दोपोऊ वंश पङ गोप बोषङ शम मिस्र पोसु अला दोपङक गोप चिगजा पङ तऊ। दोपङ इस्राएली वंऊ जेऊ।
ज्ञा बोषङु ज्ञपतिङ, इस्राएली पङ गोप वंऊ जेऊ तोइ। अला मिस्री पङ छङ ओई कमचित रा शितिङ कोशटङ मतति तोइ कि दोऊ शितिङ युसुफुस सिङ सङ लऊ तोइ। दोपङ इस्राएली पोऊरत बैऊ तोई छु लोननङ दोपङ गिनतिऊ नऊ दोपङ सै खुची तोइ। दत दो टाइमु मिस्रउ राज लइ फिरोनुस इस्राएली पङ रा मिस्रिऊ नुकुर लऊ पिनु।
मिस्तरस पङक इस्राएली रा गोप बङुला नङ अला गोप नगर पङ जुरामा शितिङ चेकचे लऊ। दो कोशटङु लेनुस दोपोऊ जिंदगी रा हत दु:खङुस पुंऊ पिनु, दत परमेश्वरुस दोपङरा बोरङ खेऊ अला दोपङ अला गोप चिगजा जोरमयतु।
फिरौनुस तंऊ कि इस्राएली पोऊ गोप चिगजा वंऊ तोइ, ओदोक दोगुस एनु सेनिक पङरा लोऊ जेरिश इस्राएली पोऊ सिङ फोबलङ चिगजा पङरा नील लुङफऊ पयऊ सतमा शितिङ लोऊ।
इत इस्राएली योबलङकुस इत फोबलङ रा पैदा लऊ। दत अला दोऊ फोबलङुस तचे वङरो दो चिगजा रा दोपोऊ रत ञंऊ तऊ।
दत दो चिगजऊ अमा-अपा दोरा अला ञामा मलिऊ, दत दोपङ दोरा सतमऊस बचामा शितिङ इत तिऊ यइ पिलतु लुङफऊ थोचलङ चिरू किललिङ तऊ पिनु। दो चिगजऊ चेई अपु जि खोनमा शितिङ पोसु कि ञमफौ दोरा छोयो वङमा ता मावंइ तशा।
फिरोनु चमेतुस दो पिलत रा खोनु दोरा नंऊ शम खोनु। दत दोगुस ओदा इत चिगजा रा तंऊ एनु छङकु खोता थऊ पिनु। दोगुस इत इस्त्राएली योबलङक रा दोरा पेल पिलामा शितिङ लेन लमा तऊ, छोयो मासुनचतु दो दो चिगजऊ दिमलेओ अमा तोइ। दत दो चिगजा ओनचे चेइ वंऊ जेऊ कि छङ दोरा एनु अमऊ पेल मागिनमा तोइ, दत दोगुस फिरोनु चमेतु रा दो चिगजा रा खेऊ पिनु, दोऊ मिन मूसा तोइ।
इ दयार, दत मूसा शरा वंऊ जेऊ तोइ, दत दोक तंऊ इत मिस्री इत इस्राएली रा तोऊ तश। मूसा गुस एनु पङगोत इस्राएली रा बचामा कोशिश लऊ।
दत मूसा सुनचतु दोरा उङको मतऊ तश दत दोक दो मिस्त्री रा सतु पिनु अला दोऊ लोटङ रा मटऊ ओपङ बंऊ पिनु। दत लि मूसा गुस छे लि लऊ दो उङ तशकयो तऊ पिनु तोइ।
फिरौन रा पता लगयतु कि मुसागुस छे लऊ। दोक दौरा सतमा कोशिश लऊ, दत ता मूसा मिस्त्रु रत जंगलु रोऊ जेऊ। फिरोनु सैनिक पङ दोरा ओदा फङमा मलिऊ।
मिस्त्रुस वरि जंगलु मूसा इत मिधयान देशङु पोसु तोइ अला दो दत इत पालस वंऊ जेऊ । दोक ओदा इत योबलङ नङ शादी लऊ पिनु अला निश छङ जोरमयऊ।
मूसा एनु गयोस्पोऊ तेतु शालङ रा खोनि तोइ। इ दयार, दोक इत रोशि चिर रा खोनु दो मेलिङ फतिङ मावंऊ लेम बरु जेऊ तोइ। दोरा खोनमा शितिङ दो ओदो डालङु नेमो जेऊ। दत दो डालङु नेमो पुतु दत परमेश्वरुस दोरा कमचित लोऊ। दोक लोऊ, “हे मूसा , रंऊ फोनि हनु पिन। का इत संखमा जागऊ थोरिङ डेन तोन।“
परमेश्वरुस लोऊ, ”ग अङ मीपोऊ दु:खङ रा खौनु तोक। ग कनरा फिरौनु रा पिननोक दत का इस्त्राएली पङ रा मिस्त्रु नुकुर लमऊ रत हनु सुमा। ग दोपङरा कनान देश खेरोक, दो मुलुक दोरा गस अब्राहम, इसहाक नङ याकुब रा खेमा वादा लमिन तोरे।”
मुसाक शुऊ, ”दत मीपङक शुशूसनङ अङरा उङ पिनपनसु दत ग छे लोमा?” परमेश्वरुस रिऊ, “ छे लि तोक ग तोक। दोपङरा लोमा , ‘परमेश्वरुस अङरा कनरा पिनपिनसु। दोपङरा ओशि लि लोमा, ” ग कन गनमो- गतपो अब्राहम, इसहाक नङ याकुबु परमेश्वर यहोवा तोक।” अङ जि मिन सोदा यो तोइ।
मूसा बैइ तोइ अला फिरौनु रा जेमा मागिनि तोइ, छु लोननङ दोक सुनचतु दो एपो लोमा मलिइ, ओदोक परमेश्वर मूसऊ बियम, हारुन, रा दोऊ पङगोत लमा शितिङ पिनु।
निर्गमन पाठ- 1-4 गुस इत बाइबलु कोथा।
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।