12. इस्त्राएलु मी पङ मिस्त्र देशुस दकपा हनतु।
इस्राएलिऊ मी पङ मिस्रुस देशुस हन्तु थलत हत गरीस तोइ। दो पङ छङ नुकुर मतेइ तोइ, अला दोपङ वादऊ देश फोक जेऊ तोइ। छे लि इस्राएली पङक थथासु, मिस्त्रि पङक सिङ सङ खेऊ पिनु, या बसकयङ जङ नङ मूल अला अलित नोर पङ लि। अलित देषङु मोच्चै मी पङ परमेश्वरू थोरिङ दैङ लऊ अला दत इस्राएली मी पङ मिस्रुस हनतु दत दोपङ लि दोपङ नङ ञमफो वंऊ पिनु।
निर दोस्परिङ जू इत चेई खम्बा दोनङ होमशित- होमशित जेऊ। अला गौङक दोस्परिङ दो मेऊ खम्बा जुरतु जेऊ। परमेश्वरूस दो जुऊ खम्बऊ नंऊ अला होमशितु खम्बऊ थोरिङ तोइ, दो दयारो दोपङ नङ तोइ अला दोक जैना परिङ दोपोऊ गोबा वंऊ। दोपङरा लेम ओनचे लमा तोइ कि परमेश्वरू ज्ञपतिङ विनमा।
मोच्चे टेमु ज्ञपतिङ, फिरौन नङ दोऊ मीपङक एनु मोनङ लेऊ पिनु। दो इस्राएली रा हे लि एनु नुकुर जुरामा गिनु । ओदोक दोपङ इस्राएली पोऊ ज्ञपतिङ जेऊ। जि परमेश्वर ओ तोई जिक दोऊ मोनङ रा लेऊ तोइ। दोक ओशि ओदोक लऊ छु लोन नङ दो गिनु तोइ सिङ जि सेसमा गिनमा कि फिरोनु रत अला मिस्रिऊ सिङ भोगान बसकयङ दो, यहोवा, हत शेच्चन तोइ।
दत इस्राएली पङक मिस्रु सेना रा तुइ तंऊ दत दोपङ सेसु दो फिरौनु सेना अला मंई समन्द्रङु किल्लिङ फसतु। दोपङ हत बेऊ अला करपु, “निङपङक मिस्त्र रा छु सोठऊ? निङपङ सीमरा तोक।”
मूसा गुस इस्राएली पङरा लोऊ, “मबैमा। परमेश्वर तोरो किमपङरा शितिङ तोङकि अला कनरा बचई। “दत परमेश्वरूस मूसा रा लोऊ, “जि मी पङरा मंई समुन्दरङ फौक होमशित जैमा लोत।”
दत परमेश्वरूस दो जुऊ खम्बा रा कयुफु इस्राएली नङ मिस्रिऊ किल्लिङ तऊ ओदोक मिस्रु मी पङ इस्राएली पङरा खोनमा मलीरो।
परमेश्वरूस मूसा रा समुन्द्रङु नंऊ एनु गुत होमशित लमा शितिङक लोऊ। दत परमेश्वरूस लानुस समुन्द्रङु ती रा डैलौ नङ जखङ फोक लऊ पिनु, ओदोक समुन्दरङुस इत ओमप वंऊ जेऊ।
इस्राएली मी पङ एनु निश फोक तिऊ बितिङ नङ ञमफो फोसि मटङु थोरिङ समुन्द्रङु रत वंऊ जेऊ पिनु।
दत परमेश्वरूस ओदो ओमपु रत जू रा थुतु पिनु दत मिस्रु मी पङ इस्राएली पङरा बचतु जेइ तंङरो। मिस्रि पङक दोपङरा चुममा शितिङ दोपोऊ ज्ञपतिङ जेमा प्लान लऊ।
दत दोपङ समुन्द्रङु ओमपुस इस्राएली पोऊ ज्ञपतिङ जेऊ, दत लि परमेश्वरूस मिस्रि पङरा पेऊ पिनु अला दोपोऊ बेशोख पङरा फसऊ पिनु। दोपङ हरो टऊ, “रोरिश। इस्राएलि पोऊ फोकुत परमेश्वर तोङकु तोइ।”
सिङ इस्राएली पङ समुन्द्रङु नोपा फोक पुतु। दत परमेश्वरूस मूसा रा लोऊ हे लि तिऊ थोरिङ गुत पिनमा। दत मूसा गुस ओशि यो लऊ, दत ती मिस्रु सेनऊ थोरिङ तु अला होमशितु खोता वंऊ जेऊ। सिङ मिस्रु सेना डुबयतु जेऊ।
दत इस्राएली पङक तंऊ मिस्री पङ सिऊ जेऊ तौइ दत दोपङक परमेश्वरू थोरिङ दैङ लऊ। दोपङ दैङ लऊ दत मूसा परमेश्वरू फोकुत भविष्य लोइ सा तोइ।
इस्राएली मी पङ ओदोक हत गरीस तोइ छु लोननङ परमेश्वरुस दोपङरा सिमऊ रत बचऊ अला नुकुर वङमऊ रत बचऊ तोइ। दत दो परमेश्वरू अरादना लमा शितिङ आजाद तोइ। इस्राएली पङ एनु आजादिऊ तिवारङ मोनामा शितिङ परमेश्वर रा खुश लमा शितिङ गोप बजन पङ लोऊ छू लोननङ परमेश्वरूस दोपङरा मिस्रु सेना पोऊ रत बचऊ तोइ।
परमेश्वरूस इस्राएली रा इ बोषङु इत तिवारङ मोनामा शितिङ लोऊ जि सेसमा शितिङ कि हलै परमेश्वरूस मिस्रि पङ रा ज्ञपतिङ तऊ दत दोपङरा नुकुर वङमऊ रत छुडायऊ पिनु। जिरा फसहऊ तिवारङ लोइ तोइ। जिननऊ दोपङरा जि तिवारङ मोनामा शितिङ इत एपो क्रात रा पुजा तीमा तोइ, दोरा रोतमा तोइ, अला दोरा सुरि रोटि नङ जामा तोइ।
निर्गमन पाठ- 12:33-15:21 गुस इत बाइबलु कोथा।
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।