13. इस्‍त्राएली मी पङ नङ परमेश्वरू वायदा।

इस्राएली पङरा मंइ समुन्‍द्रङु नोमा जेऊ ज्ञपतिङ, परमेश्वरूस दोपङरा जंगलुत वंऊ सीनै लोइ डोङखङु फोक कयुफु जेऊ पिनु। जि ओदो यो डोङखङ तोइ ओदा मूसाक रोशि चिर रा तंऊ तोइ। दो मी पङक डोङखङु ओपङ एनु तोमबुआ रा तिऊ पिनु।

परमेश्वरूस मूसा नङ इस्राएलिऊ सिङ मी पङरा लोऊ, “कनरा अमबोरो अङ कमचित गोमा वई अला छे वादा ग कननङ ञमफो छुततोक दोरा जुरऊ तामा। दत ओशि लननङ, दत का अङ तोफा खेस्‍मिन गिनमा रूपया, याजक पोऊ राज्‍य, अला इत संखमा जातु मी वंइ।

परमेश्वरूस लमिन दोपोऊ रा तुमा शितिङ मी पङक हुम दयार शम रङ रा जुरऊ। दत परमेश्वरूस सीनै डोङखङु थोरिङ हनतु। दत दो तुमा परिङ सङगुल तु, बिजुल टाशु, खू हन्‍तु, अला रोनशिङकु गोप कत वंऊ। दत मूसा एन डोङखङु थोरिङ जेऊ पिनु।

परमेश्वरूस दत मी पङ नङ ञमफो इत वादा छुतु। दोक लोऊ, “ग किमपोऊ परमेश्वर तोक। ग ओ तोक जो किमपङरा मिस्रु नुकुर लमउरत छुडासु। अलित भोगानु अराधना मालमा।”

“मुखङ माजुरामा अला दोऊ अरादना मलमा, छु लोननङ ग ओ, किमपोऊ इपोटोक परमेश्वर तोक। हलमुस अङ मिन माहनमा। शिनिश दयार रा एपो ततु मोनामा। अलित कतु नंऊ, टु दयारू नंऊ सिङ लेन लमा, शिनिश दयार किमपोऊ शितिङ पोसमा अला अङरा कोलङ लमाऊ दयारो तो।”

“रंऊ अमा नङ अपा रा एपो लमा। ऊङरयो मास्‍तमा। उलपटाङ मरेतमा। चोरस मालमा। रंऊ ख्‍युमदेसु योबलङ, दोऊ कयुम, अला दोऊ छे लि छला रा थामा खुसि मालमा।”

परमेश्वरूस दो मी पङ रा छे लमा लोऊ दोरा शितिङ दोपङ यऊ। दोपङ लेम परमेश्वरू मी वंऊ पोसमा अला लेम दोऊ अरादना लमा शितिङ यऊ।

परमेश्वरूस इस्राएली मी पोऊ रत इत चेइ तोमबुआ जुरामा शितिङ लोऊ- छुशमंऊ तोमबुआ। दोक दोपङरा एपोस लोऊ कि जि तोमबुआ रा हले जुरामा तश, अला दोननंऊ छे छला पङ तामा। दोक दोपङरा दो तोमबुअऊ निश पनठङ खेचौ जुरामा शितिङ इत चेइ परदा जुरामा लोऊ। परमेश्वर दो परदऊ ज्ञपतिङ पनठङु तुइ अला ओदा यो पोसि। ओदा परमेश्वर तोइ दो पनठङु जेमा लेम महायाजक पोऊ तोइ।

दो मी पङरा छुशमऊ तोमबुअऊ होमशित इत जागा जुरामा वई। उङ लि परमेश्वर रिङमिन दो मगोनङ दो ओदो वेदिऊ नंऊ इत छुमा रा कयुफु तुमा गिनमा। दत याजक दोरा पुजा तिइ अला वेदिऊ थौरिङ परमेश्वरू शितिङ पुजा तीमऊं खोता रोति। परमेश्वरुस रिंऊ अला दो छुमऊ शुई दो मिऊ पाप रा खोपि। ओदोक, छङ परमेश्वर दो पाप रा माखोनि। दो मी परमेश्वरू नजरु “संखमा” वङरो। परमेश्वर मूसऊ बियम हारून रा अला हारूनु वंश पङरा एनु याजक वङमा शितिङ चुनायऊ।

दत परमेश्वरूस ओई सा कमचित पङरा रंऊ निश पटियऊ थोरिङ चेऊ मूसा रा खेऊ पिनु। परमेश्वरूस लमा शितिङ मी पङरा गोप सिङ कानुन खेऊ। दत लि दोपङ ओइ लेन लननङ परमेश्वर दो मी पङरा बोरङ खैमा अला दोपङ रा खौनमा शितिङ वादा लऊ। दत लि दोपङ लोमिन दो मलननङ दो दोपङरा सजा खेइ।

गोप दयार शम,मूसा सीनै डोङखङु थोरिङ ओ पोसु। दो परमेश्वर नङ कमचित लोऊ तोइ। दत मी पङ दोऊ पोलठतु तुमा शितिङ शुंऊ पोसु-पोसु मलिऊ तोइ। ओदोक दोपङ हारूनु रा जङ कयुफु तु अला दोरा इत मुखङ लमा लोऊ दत दोपङ परमेश्वर बस्‍कयङ दोऊ अराधना लमा लीरो । ओदोक, दोपङ हत बैमा थङ परमेश्वरू खिलाफ पाप लऊ।

हारूनुस लुक चेत जङु इत मुखङ जुरऊ। दो मी पङ दो मुखङ रा अराधना लमा तिखु अला दोरा पुजा तिऊ पिनु। दोऊ पापु लमिन परमेश्वर दोपङरा हत छिङना तंऊ तोइ। दो दोपङरा सतु पिनमा गिनु तोइ। दत मुसाक परमेश्वर रा दोपङरा मासतमा लोऊ। परमेश्वरूस दोऊ रिङमिन कमचित गोऊ अला दोपङरा मासतु।

दत ज्ञपतिङ मूसा सीनै डोङखङुस ओपङ हनतु तु। दो निश रऊ पटिया रा थुतमिन तोइ दोगु नंऊ परमेश्वरूस सा हुकुम चेमिन तोइ। दत दोक ओदो मुखङ रा खौनु। दो ओनचे छिङना तंऊ कि दोक दो चेमिन पटिया रा ठऊ खनङ लऊ पिनु।

दत मूसा गुस दो मुखङ रा पिसऊ दोऊ चूरा लऊ पिनु, अला दो चूरा रा तिऊ कुउ दो मीपङरा ओदो ती पलायऊ पिनु। परमेश्वरूस दो मी पोऊ थोरिङ इत ओलडो पिनु दत दोपोऊ नंऊ गोप मी सिऊ जेऊ।

दो रऊ पटिया रा मूसा गुस ठऊ तोइ। दोऊ पोलङक थामा शितिङ मूसा गुस दो सा हुकुम रा रऊ सरपा पटिया जुरऊ। दत दो हे डोङखङु थोरिङ जेऊ अला लोऊ परमेश्वर दो मी पङरा माफ लरो। परमेश्वरूस मूसऊ गोऊ अला दोपङरा माफ लऊ। सरपा पटियऊ नंऊ चेमिन सा हुकुम दो कयुफु मूसा डोङखङु ओपङ तु। ओसपरिङ परमेश्वरूस सीनै डोङखङु रत वादऊ देश शम इस्राएली पोऊ गोबा वंऊ।