14. इस्त्राएलि मी पङ पनिसा बोषङ शम जंगलु भटकतु।
परमेश्वरूस इस्राएली पङरा दो कानून रा लोमा कयऊ पिनु दो कानून दोपोऊरा होमशित ओ तोइ। दत दोक सीनै डोङखङु होमशित दोपोऊ गोबा वंऊ। दो दोपङरा वादऊ देशु किमा गिनु तोइ। जि मुलुक रा कनान लि लोइ तोइ। परमेश्वरूस जुऊ खम्बऊ थौरिङ दोऊ होमशित- होमशित जेऊ, अला दो दोऊ ज्ञपतिङ- ज्ञपतिङ तु।
परमेश्वरूस अब्राहम, इसहाक नङ याकुबु रत वादा लऊ तोइ दो वादऊ देशु रा दोऊ वंश पङरा खेइ, दत लि ओदा गोप जातु मी पोसि तोइ। दोपङरा कनानी लोइ तोइ। दो कनानी मी पङ परमेश्वरू अराधना मालई तोइ अला दोउ रिङमिन कमचित मागोइ तोइ। दोपङ कवश परमेश्वरू अराधना लइ तोइ अला गोप हलम लेन लइ तोइ।
परमेश्वरूस इस्राएली पङरा लोउ, “ओसपरिङ का दो वादऊ देशु जेनङ दत ओदतु सिङ कनानी पोऊरत पीछा छुडऊ पिनमा। दोपङ नङ समजोता मालमा अला दोपङ नङ जन्नेटङ मालमा। किमपङ दोपोऊ सिङ मुखङ रा होमयो कयऊ पिनमा। दत लि का अङ कमचित मागोनङ, दत का अङ बसकयङ दोपोऊ भोगानु अराधना लऊ पोसि।”
दत इस्राएली कनानु सिमंङु रा पुतु, मूसा गुस इस्त्राएलु सिङ खानदानु इत- इत लऊ सनिश फोबलङक रा चुनऊ। दोक दोपोऊ रा जेऊ ओदो देश हले तश खोनमा शितिङ पिनु दो हलै देश तश। दोपङरा दो कनानी पङरा खौनमा तोइ दो शेच्चन तोइ या मालि तोइ।
दो सनिश फौबलङुस सिङ कनान देशुस वंऊ जेऊ निशनिसा दयार गुमयतु अला दत दोपङ पोलठतु तु। दोपङ मी पङरा लोऊ,” दो कनान मुलुक हत फोलङ सा तश अला फौलङ गोप वङमिन तश।“ दत सा जासुस पङक रिऊ, ” दोपोऊ नगर हत शेच्चन तोइ अला दो मी पङ चेइ- चेइ तोइ। दत उलपङ दोपङ नङ संङकु तोङमा जेनङ , दत उलपङ हसल हरति अला उलपङरा सतु पिनपनसि।
हस्ल ओ कालेब नङ यहोश अला अलित निश जासुस पङक रिंऊ, ”जि दिमलेऔ हीन कनान देशु मी पङ चेइ नङ शेच्चन तोइ, दत लि उलपङ दोपङरा हरामा लिइ। परमेश्वर उलपोऊ शितिङ तोङकि।“
दत लि मीपङक कालेब नङ यहोशुऊ मागोऊ। दो मूसा नङ हारुनु थोरिङ छिङना लऊ, ”का निङपङरा ओइ बैमा थङक जागऊ छु कयुफु तु? उलपङरा मिस्रु ओ पोसमा गिनमा तोइ। दत लि उलपङ दो देशु जेनङ उलपङ तोङकु सिऊ जेइ, अला कनानु मी पङ उलपोऊ योबलङ नङ चिगजा पङरा नुकुर जुरऊ पिनि। “ दो मी दोपङरा पोलठऊ मिस्रु कयुफु जैमा शितिङ इत अलित गोबा पङ चुनामा गिनु तोइ।
दत दो मी पङ ओशि लोऊ दत परमेश्वर हत छिङना तऊ। दो छुशमा तोमबुअऊ नंऊ तु,अला रिंऊ ”किनपङक अङ खिलाफ बगावत लऊ तोइ , ओदोक किनपङरा ओइ जंगलु हलतमा वई। सिङ इत मी दो निसा बोषङ या ओदो बस्कयङ खुचि बोषङु तो दो सिऊ जेइ अला तशपयो ओदो देशु तुमा मलिइ दो ग किमपङरा खेसतोक। लैम कालैब नङ यहोशू दोन्नऊ जैमा लिइ।“
दत मीपङक परमेश्वर रा ओशि लोइ गोऊ, दत दोपङ दु:खङुस तोइ छु लोननङ दोपङ पाप लमिन तोइ। ओदोक दोपङुस कनानु मी पोऊ थोरिङ संङकु तोङकमा शितिङ लोऊ। मूसा गुस दोपङरा माजैमा शितिङ लोऊ छु लोननङ परमेश्वर दोपङ नङ ञमफो माजैइ तोइ, दत लि दोपङ मुसऊ कमचित मागोऊ।
परमेश्वर ओइ तोङमा परिङ दोपङ नङ ञमफो मा जेऊ तोइ, ओदोक कनानी पङक दोपङरा हरायऊ पिनु अला दोपोऊ गोप मी पङरा सतु पिनु। दत इस्त्राएली मीपङ कनानुस पोलठतु तु। अलित पनिसा बोषङ शम, दोपङ जंगलु नौस- जिस भटकयतु पोसि।
इस्राएली मी पोऊ लमिन जंगलु मै जैऊ निशनिसा बौषङु, परमेश्वर दोपोऊ गिनमा दौरा सिङ गिनमा दो लऊ। दोक दोपङरा स्वर्गुस रोटि खेऊ दोऊ मिन “मन्ना” तोइ। दोक बटेर मिनु प्यातु शालङ रा दोपोऊ जागऊ रा पिनमा छु लोननङ दोपोऊ रा जामा शितिङ शा तोमा गिनमा। ओदो बेलऊ, परमेश्वरूस दोऊ गस्कुला नङ फोनि पङरा जेरमऊ रत बचऊ।
दत बस्कयङ परमेश्वरूस दोऊ तुङमा शितिङ नमङ थङक राऊ रत ती हनु। दत लि जि सिङु बसकयङ, इस्राएलिऊ मी पङ परमेश्वर नङ मूसऊ खिलाफ कमचित शतु अला नमङ ततु। दत लि परमेश्वर दैङ तइ तोई। दोक दो वादा लऊ तोइ कि दो अब्राहम, इसहाक, नङ याकुबु वंश पोऊ शितिङ लई दोक दो लऊ।
इत अलित टैम दोपोऊ रा ती मतोइ तोइ, परमेश्वरूस मूसा रा लोऊ, “रा नङ कमचित लोत, दत दोउरत ती हनति।” दत लि मुसास रा नङ कमचित मालोऊ। दो बसकयङ, दोक छुङा गुस रऊ थोरिङ निश फैरा तोंऊ। ओशि लऊ दोक परमेश्वर रा मामोनऊ। सिङरा तुङमा शितिङ रऊस ती ता हन्तु, दत है परमेश्वर मूसा रा छिङना तंऊ। दोक लोऊ, “छु लोननङ कस ओशि लऊ, ओदोक का वादऊ देशु जैमा मालिइ।
दत इस्राएलिऊ मी पङ निशनिसा बोषङ शम जंगलु भटकयतु तोइ, दत दोपङक परमेश्वरू खिलाफ बगावत लऊ अला दोपङ सिङ सिऊ जैऊ तोइ। दत परमेश्वर दो मी पङरा हैलि दो वादऊ देशु सींमङ शम कयुफु जेऊ। छङ मूसा हत गतपौ वंऊ तोइ, ओदोक परमेश्वर मी पोऊ गोबा वङमा शितिङ यहोशु रा ठोतु। परमेश्वरूस मूसा नङ जि वादा लऊ तोइ कि इत दयार दो दोमीपोरा मूसऊ खोता इत भविष्य लोइ सा रा पिनि।
दत परमेश्वरूस मूसा रा इत डोङखङु थोरिङ जैमा शितिङ लोऊ छु लोननङ दो वादऊ देश रा खोनमा लीइ। मूसा गुस दो वादऊ देश रा खौनु दत लि परमेश्वर दोरा दोननऊ जैमा माखेऊ। दत मूसा सिऊ जैऊ, अला इस्राएलीस हुमनिसा दयार शम दु:खङ मोनऊ। यहोशू दोपोऊ सरपा गोबा वऊ तोइ। यहोशू इत एपो गोबा तोइ छु लोननङ दोक परमेश्वरू थोरिङ दैङ लऊ अला दोऊ कमचित पङरा गोऊ।
निर्गमन पाठ -16-17; गिनती 10-14; 20;27 गुस इत बाइबलु कोथा।
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।