15. वादऊ देश।

कयाना परिङ, दो टैम तु तोइ कि इस्राएलिऊ मी पङ छङ कनान देशु जेमा लिइ तोइ। दो देशङु यरीहो मिनु इत नगर तोइ। दोपङरा एपोऊ शितिङ दोऊ नोस- जिस पका बितिङ तोइ। यहोशुस दो नगरू नंऊ निश जासूस रा पिनु। दो नगरु राहाब मिनु इत रिटिए पोसि तोइ। दोक दो मी पङरा ञंऊ तऊ, अला दत ज्ञपतिङ दोक दोपङरा ओदो नगरूत बचतु जैमा ओमप कनु। दोक ओशि ओदोक लऊ छु लोननङ दो परमेश्‍वरु थौरिङ दैङ तई तोइ। दोपङ राहाब रा वादा लऊ कि दत दो मी पङ जि छवनि रा कयऊ पिनि दत दोपङ दो नङ दोऊ पेरङ पङरा बचई।

इस्राएलिऊ मी पङरा वादाऊ देशु जैमा शितिङ यरदन समुनद्रङ रा पोमा तोइ। परमेश्‍वरुस यहोशू रा लोऊ, “याजक पङरा होमशित जैमा मतमा।” दत याजक पङक यरदन समुनद्रङु नंऊ रंऊ बङखौन तऊ दत ती तुमा डेमु, ओदोक इस्राएलिऊ मी पङ समुनद्रङु नोचलङ फोसि मटङु थौरिङ जैमा लीरो।

दो मीपङक यरदन लुङफा पोऊ जैउ दत परमेश्‍वरूस यहोशू रा लोऊ यरीहो नंऊ संङकु तोङमा शितिङ छसु पोसमा, दोपङ हत शेच्चन देशङ तोइ। परमरश्‍वरूस दो मी पङरा लोऊ कि दोपोऊ याजक पङ नङ सैनिक पङरा टु दयार शम दो नगरु नोपा- जिपा ठुरतु पोसमा वई। दत याजक नङ सैनिक पङक ओशि यो लऊ।

दत शिनिश दयारू, इस्राएली पङक दो नगरु नोपा- जिपा हे शिनिश फैरा ठुरतु। दोऊ ज्ञपतिङ, याजक पङक रोनशिङक बजऊ दत सैनिक पङक शेच्‍चन हरो टऊ।

दत यरीहोऊ नोपा- जिपा सिङ बितिङ बरूसु जैऊ। हलै परमेश्‍वरूस लोऊ तोइ इस्राएली पङक नगरू सिङ छला रा कयऊ पिनु। दोपङक लैम राहाब नङ दौऊ पैरङ रा सोठऊ, दो पङ इस्राएली पोऊ खोता वंऊ जेऊ तोइ। दत कनानु पोसि अलित मी पङ गोऊ इस्राएली पङ यरीहो रा कयऊ पिनु, दत दोपङ बैऊ इस्राएली मी पङ दोपङ नङ लि संङकु तोङकमा तुइ।

परमेश्‍वरूस इस्राएली पङ रा लोऊ कनानु पोसि उङ लि जात नङ ञमफो समझोता मालमा। दत लि गिबोनियों मिनु इत कनानी जातु मीस यहोशू रा कवश लोऊ दो कनानुस वरि इत जागऊ पोसि तोइ। दोपङक यहोशू रत दोपङ नङ समझौता लमा शितिङ लोऊ। यहोशू नङ अलित इस्राएली मुखिया गुस परमेश्‍वर रा शुऊ कि दोपङरा छे लमा गिनमा। ओदो बसकयङ,दोपङ गिबोनि पङ नङ समझौता लऊ पिनु।

हुम दयार ज्ञपतिङ, इस्राएली पङ रा पोता लगयतु कि गिबोनिऊ मी पङ कनानु ओ पोसि तोइ। दोपङ हत छिङना तऊ छु लोननङ गिबोनि पङ दोपङरा कवश लोऊ। दत लि दो दोपङ नङ ञमफो लमिन समझौता रा लऊ तऊ छु लोननङ दो परमरश्‍वरू तुसिङ तु तोइ। दत गोप टेमु ज्ञपतिङ, कनानु पोसि इत अलित जात, एमोरियोंऊ राजापङ गोऊ कि गिबोनी पङ इस्राएली पङ नङ समझोता लऊ पिनु, ओदोक दोपङक एनु- एनु सैनिक पङरा ञमफो लऊ इत चेइ सैना जुरऊ पिनु अला गिबोनु तोंङकमा जेऊ पिनु। गिबोनी पङ दोपोऊ पङगोत लमा शितिङ यहोशु रा इत फरिनतन पिनु।

जि फरिनतन गोऊ यहोशूस इस्राएलिऊ पोऊ सैना रा कटठा लऊ अला गिबोनी पोऊरा पुतमा शितिङ दोपङ इ गोङक पूरा विनु। नममत ठेठे दोपङक एमोरिऊ सैना रा हैरान लऊ पिनु अला दोपङ नङ संङकु तोङकमा जेऊ।

ओदो दयार परमेश्‍वर इस्राएलि पोऊ शितिङ तोङकु। दोक एमोरि पङरा पेऊ पिनु अला दोक चेइ- चेइ रस थतु गोप एमोरी सैनिक पङरा सतु पिनु।

परमेश्‍वरूस नी रा लि नमु नंऊ इ जागा टेखयऊ तऊ छू लोननङ इस्राएली पङरा गोप टाइम पोरति दत एमोरि पङरा होमयो हरऊ पिन। ओदो दयार, परमेश्‍वरूस इस्राएली पोऊ शितिङ जिततु पिनु।

दत परमेश्‍वरूस दो सैना पङ रा हरायऊ ज्ञपतिङ, गोप कनानु जातु मी पङ इस्राएलु संङकु तौङकमा शितिङ कटठा वंऊ। यहोशु नङ इस्राएली गुस तोङकु दोपङरा सतु पिनु।

ओइ तोङकु ज्ञपतिङ, परमेश्‍वरूस इस्राएलु सिङ गोत्र पङरा प्रतिज्ञऊ देशु नंऊ दोपोऊ हिसा खैऊ तोइ। दत परमेश्‍वरूस इस्राएल रा दोपोऊ सिङ सिंमङु रा सवङना लऊ पिनु।

दत यहोशु गतपो वंऊ जेऊ दत दोक इस्राएलु सिङ मी रा ञमफो कुतु। दत यहोशू गुस दो मी पङरा लोऊ कि किमपङक दो वादा रा लमा कसम लऊ तोइ दो परमेश्‍वरूस किमपङनङ सीनै डोङखङु रा छुतु तोइ। दो मीपङक परमेश्‍वरू थोरिङ देङ तामा अला दोऊ गिनमा दो खेमा शितिङ वादा लऊ।