16. छुडई पङ।
यहोशु सिऊ ज्ञपतिङ इस्त्राएलि पङक परमेश्वर रा मामोनऊ। दोपङक परमेश्वरूस रिङमिन दो मागोऊ, अला दोपङक दो वादऊ देशुस बचति कनानि मी पङरा दकपा माहनु। इस्त्राएलि पङक एनु सोचा परमेश्वर, यहोवा रा सोठऊ कनानी पोऊ भोगानु अराधना लमा तिखु। इस्त्राएलि मी पोऊरा उङो राजा मातोइ तोइ, ओदोक उङरा छे एपो तुरो दोक ओशि यो लऊ।
परमेश्वरु रिङमिन दो मगोऊ ज्ञपतिङ इस्त्राएलि पङक इत रिवाज जोदे शुरु लऊ दोरा गोप फेरा लऊ तोइ। जि रिवाज ओशि चलतु कि गोप बोषङ शम इस्त्राएलु मी पङ परमेश्वरु कमचित मागोइ, दत दो दोपोऊ दुश्मोनु रत हरतु ज्ञपतिङ सजा खेइ। जि दुश्मोन पङ इस्त्राएलि पोरत सिङ- सङ लुटई तोइ, दोपोऊ नोर रा कयऊ पिनि, अला दोपोऊ नंऊ गोप मीपङरा सतु पिनि। दत दोसपरिङ इस्त्राएलि पोऊ दुश्मोन पङ दोपोऊ थोरिङ गोप बोषङ शम ङनचेन लई तोइ, दोऊ ज्ञपतिङक इस्त्राएलु मी पङ एनु पाप लमिन दो सोठइ अला दोपङरा बचामा शितिङ परमेश्वर रा कोलङ लई।
दयारो दयारो इस्राएली दुखङ लन्नङ परमेश्वर दोपङरा बचायाई । दो इत छुडायई मिऊ रत ओशी लइ – इत ओशी मी दो दोपोऊ दुसमोन नङ तोङकी अला दोपङरा हरायइ । दत दो देशु सवङना वङरो अला दो छुडायइ मी दोपोऊ थोरिङ ऐपोस राज लरो। परमेश्वरूस दोपङरा बचामा रा गोप छुडायइ सा मी पङरा पिनु । परमेश्वर रा ञमफो तोई ईत दुसमोन जातु मी, मिधानी पङक इस्राएलि पङरा हरामा शितिङ हेलि ओशि लऊ।
मिधानी पङक शिनिश बोषङ शम इस्राएली पोऊ फोलङ रा लुटायऊ। इस्राएलिऊ मी पङ गोप बेऊ तोइ, अला दोपङ गुफऊ ञखु छु लोननङ मिधानि मी पङ दोपङरा फङमा मालिइ। दोपङरा बचामा शितिङ दोपङक परमेश्वर रा कुतु।
गिदोन मिनु इत इस्त्राएली फौबलङक तोइ। इ दयार, दो इत मातङमा जागऊ रोजत ठोंऊ तोइ छु लोननङ मिधानी मीपङ दोरा खुतमा मालिइ। यहोवऊ स्वर्गु मीस गिदोनु रा तु दोरा लोऊ,“ हे शेच्चन मी, परमेश्वर कन नङ ञमफो तो। जो अला इस्राएली पङरा मिधानी पोऊरत बचायई।“
गिदोनु अपाऊ रा मुखङ रा तामा शितिङ इत जागा तोइ। थोनतु होमशित कमचित दो परमेश्वरुस गिदोन रा ओशि लमा शितिङक लोऊ छु लोननङ दोऊ जागा रा ठामा तोइ। दत गिदोन मी पोऊरत बेइ तोइ, ओदोक दोक मुञञा तशपा वङरो रिंऊ शुंऊ। दत दोक दो पुजा तीमा जागा रा ठऊ यम -यम लऊ पिनु। दोक परमेश्वरु शितिङ इत सरपा जागा जुरऊ अला दोऊ थोरिङ परमेश्वरु शितिङ पुजा तिउ।
अलित नममत मीपङक तंऊ ऊङक ता दो जागा रा ठऊ यम-यम टुकडा लऊ पिनमिन तश, ओदोक दोपङ हत छिङना तंऊ तोइ। दोपङ गिदोन रा सतमा शितिङ दोऊ कयुमु जेऊ, दत गिदोनु अपास लोऊ, ” का छे रंऊ परमेश्वरु ओमेत लमा शितिङ कोशिश लऊ आ? दत दो परमेश्वर तोननङ दोरा एनु हिफाजत एनरा लमा मतमा। छु लोननङ दोक ओशि रिंऊ ओदोक मीपङक गिदोन रा मासतु।
ओसपरिङ इस्राएली पङरा लुटामा शितिङक मिधानी मीपङ हेलि तु। दोपङ ओनचे तोइ कि दोपङरा शुममा लि मालिमा तोइ। गिदोनुस दोपोऊ खिलाफ तोङकमा शितिङ इस्राएली पङरा ञमफौ कुतु। गिदोनुस परमेश्वरु रत निश सार थऊ दत दोरा देङ वङरो परमेश्वर इस्राएल रा बचामा शितिङ रिंऊ तश।
होमशित सार रा शितिङ, गिदोनुस तेतु चम रा मटङु तऊ परमेश्वर रा लोऊ कि नममतु बेमो लेम तेतु चमु थोरिङ तुमा गिनमा अला मटङु थोरिङ मेन। परमेश्वरु ओशि यो लऊ। अलित गोङक, दोगुस परमेश्वर रा लोऊ मटङ थिसि वङमा गिनमा अला तेतु चम फौसि यो पोसमा। परमेश्वरुस ओशि यो लऊ। ओइ निश सारु लमिन, गिदोन रा परमेश्वरु थोरिङ देङ वंऊ कि परमेश्वरुस दिमलेयो गिनि कि दो इस्राएली पङरा मिधानि पोऊरत बचई।
दत गिदोनुस सैनिक पङरा एनु रा कुतु अला हुमनिसऊ निश हजार फौबलङक तु। दत परमेश्वरुस दोरा लोऊ कि जिपङ ता गोप तश। दत गिदोनुस दो सिङ निसऊ निश हजार मी पङरा कयुमु पोलठऊ पिनु दोपङ तोङकमरा बेई तोइ। परमेश्वरुस गिदोन रा लोऊ कि जि फोबलङ पङ अला लि गोप तश। ओदोक गिदोनुस हुमज्ञा सैनिक पङरा सोठऊ दोपङ सिङरा कयुमु पिनु।
दो गोङक परमेश्वरूस गिदोन रा लोऊ, ” मिधानी पोऊ चातु नंऊ जेऊ पिन अला दोपङरा कमचित लोइ दो दोगुस गोउ। ओसपरिङ का गोनङ दत दोपङ छे कमचित लोऊ तश दत का दोपोऊ थोरिङ सङकु तोङकमा शितिङ माबेइ। ओदोक दो गोङक, गिदोन ओपङक नंऊ दोपोऊ चातु नंऊ जेऊ अला दोक इत मिधानिऊ सेनिक रा एनु पङगोत रा दो कमचित लोइ गोऊ दो दोक मङु नंऊ तंऊ तोइ। दो फोबलङकु पङगोतुस लोऊ, ” जि मङु मतलब गिदोनु सेना उलपङ मिधानी सैना रा हरऊ पिनि। दत गिदोनुस जि गोऊ दत दोगुस परमेश्वर रा ओरछे लोऊ।
दत गिदोनुस एनु सैनिक पोऊरा पोलठतु अला दोपोऊ नंऊ इत- इत रोनशिङक, इत मटङु बनिङ, अला इत मेसालो खेऊ। दोपङक दो चात रा घेरऊ पिनु ओदा मिधानिऊ सैनिक ञोनु तोइ। गिदोनु हुमज्ञा सैनिक पङक रंऊ मेसालो रा बनिङुस खोपु तऊ ओदोक मिधानिऊ मी पङक दो मेसालोऊ मै रा मातंऊ।
दत गिदोनु सिङ सैनिक पङ एनु बनिङ पङरा इतो टेमु ठऊ लेम मेसालोऊ मै रा कनु पिनु। दोपङक एनु रोनशिङक फुसुतु अला हरो टऊ, ” गिदोन नङ ञमफौ यहोवऊ तलवार।”
परमेश्वरुस मिधानी पङरा पेऊ पिनु, ओदोक दोपङ इतुस अलित नङ तोङकु- सशु। हसल ओ, गिदोन दो कमचित हलइ पङरा अलित इस्राएली पङरा मिधानी पोऊ ज्ञपतिङ जेऊ दोपोऊ ओमेत लमा शितिङ कुतमा पिनु। दोपङक दोपोऊ नंऊ गोप रा सतु पिनु अला ञुइ पङरा फंऊ दोपङरा इस्राएली देशु दकपा हनु पिनु। ओदो निर इत लाख मिधानी सिऊ जेऊ। ओशि लऊ परमेश्वरुस इस्राएल रा बचऊ।
दो मीपङ गिदोन रा राजा जुरामा गिनु तोइ, दत गिदोनुस दोपङरा ओशि लमा माखेऊ, दत दोक दोपोऊरत ज्ञङु टानङ थऊ दोपोऊ नंऊ गोप ता मिधानी पङक लुटऊ तोइ। दो मीपङक गोप ज्ञङ गिदोन रा खेऊ।
दत गिदोनुस दो जङु इत एपो गस्कुला जुरऊ हले दो महायाजक चुखि तोइ। दत मीपङक दोरा मोनामा शुरु लऊ दो इत मुखङ तोइ। दत परमेश्वरुस हेलि इस्राएलु मी पङरा सजा खेऊ छु लोननङ दोपङक मुखङु अराधना लऊ तोइ। परमेश्वरुस दोपोऊ दु:श्मोन रा दोपङरा हरामा शितिङ लोऊ। दत हेलि दोपङक ओमेत लमा शितिङ परमेश्वर रा कोलङ लऊ, अला परमेश्वरुस दोपङ रा बचामा शितिङ इत अलित छुडई सा रा पिनु।
जि कमचित गोप फेरा वंऊ, इस्राएलिऊ मी पङ पाप लई, परमेश्वर दोपङरा सजा खेइ, दोपङ दु:खङ लइ, अला परमेश्वर दोपङरा छुडामा शितिङ उङिरा पिनि। गोप बोषङ शम, परमेश्वरुस गोप छुडई पङरा पिनु दोपङक इस्राएल पङरा दोपोऊ दु:श्मोनु रत बचऊ।
दत ज्ञपतिङ, दो मी पङक अलित देश पोऊ खोता परमेश्वरु रत एनपोऊ शितिङ इत राजा गिनमा लोऊ। दोपङ इत ओशि राजा गिनु तोइ दो शुइ नङ शेच्चन तोमा गिनमा, अला दो तोङकमा परिङ दोपोऊ गोबा वङरो। परमेश्वर रा जि कमचित एपो माजेऊ, दत लि दोक दोपङरा ओशि यो राजा खेऊ हलेया दोपङ गिनु तोइ।
न्यायियों पाठ -1-3; 6-8;1 गुस इत बाइबलु कोथा।
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।