27. दयालु सामरिऊ कोथा।

इ दयार, यहूदिऊ कानून रा सेसि इत मी यीशुउ रा तु। दो सिङरायो कनमा गिनि तोइ कि यीशु हलम लफलफु तश। ओदोक दोगुस लोऊ, “हे गुरू, गोप चेइ जोलोम गिनमा शितिङ ग छे लमा?” यीशुस लोऊ, “परमेश्‍वरूस कानुनु नंऊ छे चेमिन तश?”

दो मीस रिंऊ, “दो रिंऊ तशे कि रंऊ परमेश्‍वरू रत रंऊ सिङ मोनङ, जिवा, शेत अला दिमाग रा बेन्‍नङ तामा। अला रंऊ खयुमदेस नङ एपो पोसमा।” यीशुस लोऊ, “का दिमलयो एपो तोन, दत कनरा एपो जिन्‍दगी पोरततो।”

दत लि दो कानून सेसि सा मी, मी पङरा कनमा गिनि तोइ कि दोऊ जिन्‍दगी शिङमऊ तरीका एपो तश आ। ओदोक दोगुस यीशु रा शुउ, “एपो तश, दत अङ खयुमदेस ऊङ तश?”

यीशुस दो कानुन सेसि मी रा इत कोथा लोऊ दत जवाब खेऊ। “इत यहूदी मी तोइ दो इत ओमपुस वंऊ यरूमलेशुस यरीहो फौक जेऊ तोइ।”

“दत तचे ता चोरस पङक दोरा खोनु अला दोऊ थोरिङ ञङकु तोङकमा जेऊ। दोपङक दोऊ सिङ-सङ किऊ पिनु अला दोरा खनङ सीमा शम तोंऊ- सतु। दत दोपङ जेऊ पिनु।”

“दोऊ ज्ञपतिङ, इत यहूदी याजक ओदो यो ओमपुस वंऊ जेऊ। दो याजकुस दो फोबलङ रा ओमपु थोरिङ बरिन तऊ। दत दोक दोरा तंऊ दत दो ओमपु अलित फोक जेऊ विनु पोसु। दोक दो मी रा मातंइ खुङक वऊ।”

“ओदोऊ ज्ञपतिङ टैम बिततु, इत लेवी दो ओमपु तु। लेवी यहूदी पोऊ इत कबीला तोइ दोपङक थानङु याजक पङरा पङगोत लऊ तोइ। दो लेवी लि ओमपु नोपत हन्‍तु जेऊ। दोगुस लि दो मी रा मातई खुङक वंऊ।”

“अलित मी दो ओदो ओमपुस तु दो सामरियऊ इत फोबलङक तोइ। सामरी नङ यहूदी इत नङ अलित रा मडामा लइ तोइ। दो सामरीस ओमपु दो नाशङ जेइ मीरा तंऊ। दोक तंऊ कि दो यहूदी तश, दत लि दोक दोरा हत पापङ ततु। दत दो दोऊरा जेऊ अला दोऊ नाशङ जेमिन दोऊरा पट्टी छुतु।”

“दत दो सामरीस दो मी रा एनु फोतु थौरिङ लेटायऊ अला दोरा दो ओमपुस इत सरायऊ किऊ। ओदा दोक दोरा खोनमा शितिङ पोसु।”

अलित दयार, दो सामरी रा एनु हलतमा दो ओशि यो तामा तोइ। दोक दो सराएंऊ मालिक रा गटो रूपया खेऊ। दोक दोरा लोऊ, “जि मीरा एपो खौनमा। दत लि ओइ रूपया बसकयङ कन अला रूपया जेनङ दत पोलठतु तु थलत ग कन सिङ रूपया पोलठऊ खेस्‍तोक।”

दत यीशुस दो यहूदी शास्‍त्री रा शुऊ, “का छे सुनचतु? ओइ हुम मी पोऊ नऊ उङ दो मिंऊ खयुमदेस तश दोरा लुटऊ अला तोंऊ तोइ?” दोगुस लोऊ, “ओदोक ओ दोगुस दोरा पापङ ततु।” यीशुस दोरा लोऊ, “का जो अला ओशि यो लत।”