26. यीशु एनु सेवा लमा जुमा तिखु।

शैतानुस किमिन इम्‍तिहान रा मालइ लोऊ ज्ञपतिङ, यीशु पोलठतु गलीलु राज्‍यु तु। ओइ ओदो यो जागा तोइ ओदा दो पोसि तोइ। एपो जिवा दोरा हत सोततिङ खेऊ तोइ, अला यीशु इत जागास अलित जागऊ जेऊ अला मीपङरा लोऊ। सिङो दोरा शितिङ एपो कमचित लोऊ।

यीशु नासरत नगरू जेऊ। जि ओदो नगर तोइ ओदा दो एनु चिगजा दोसपरिङ पोसि तोइ। शिनिश दयार दोमया, दो अराधना लमा जागऊ रा जेऊ। गोबा पङक दोरा यशायाह भविष्‍य लोइसाक फरिनतनु इत किताब खेऊ। दोपङ गिनि तोइ कि दोपङ ओइगुस लफतो। दत यीशु गुस दो किताब रा खोलऊ दोऊ इत हिसा रा मी पोऊ शितिङ लफु।

यीशुस लफु, “परमेश्‍वरूस अङरा एनु जिवा खेसमिन तो छु लोननङ ग छोयो मतेइऊ नंऊ एपो फरिनतन लोमा लीरोक। दोक अङरा ओदोक पिनपनसु कि कैदी पङरा छुडायामा लीरोक, मातंई पङरा हेलि तङमा लीरो, अला दोपङरा छुडायामा दोपङरा अलित पङक टैमु पिनु। जि ओदो यो टाइम देसङ परमेश्‍वर ऊलपङरा पापङ तति अला उलपोऊ पङगोत लई।”

दत यीशु पोसु । सिङ मी दोरा यो खोनु पोसु तोइ। दोपङ सेसि तोइ कि पवित्रशास्‍त्रु दो हिसा दोक जोदे लफु तोइ दो मसीहूउ बारे तोइ। यीशुस रिऊ, “दो कमचित पङ गस जोदे कन शितिङ लफु तोइ, दो देसङ वऊ तशँ। “सिङ मी पङ बिंऊ तोइ। दोपङक रिऊ, ”जि छै युसुफु छङ मेन आ?”

दत यीशुस लोऊ, “जि दिमलैयो कि मीपङ ओशि भविष्‍य लोइ सा रा तशपयो मागिनि तोइ दो दोपोऊ नगरू चेइ वंऊ तोइ। एलिय्‍याह भविष्‍य लोइ सऊ टैमु, इस्राएलु गोप विधवा पङ तोइ। दत लि हुम नङ खनङ बोषङ शम छरबा मावऊ दत परमेश्‍वरूस एलिय्‍याह रा इस्राएलु उङ लि विधवऊ पङगोत लमा शितिङ मापिनु। ओदो बसकयङ, दोक एलिय्‍याह रा सदोन देशु विधवऊ रा पिनु।”

यीशुस लोऊ ओ पोसु, “अला एलीशऊ भविष्‍य लोइ सऊ टाइमु, इस्राएलु गोप मीपङ कोडु शोतुस तोइ। दत लि एलीशास दोपोऊ नऊ उङरायो एपो मालऊ। दोक लैम इस्राएलु दुशमोनु सेनापति रा एपो लऊ। “दत लि दो मीपङ यीशु रा गोऊ तोइ दोपङ यहूदी तोइ। ओदोक हेलि दोपङक दोरा ओशि लोइ गोऊ दत दोऊ थोरिङ छिङना तंऊ।

नासरतु मी पङक यीशु रा चुमु पिनु अला दोरा अराधना लमा जागऊ रा डपु दकपा कयुफू जेऊ। दोपङ दोरा सतमा रा पयामा शितिङ इत डोङखऊ थोरिङ कयुफु जेऊ। दत लि यीशु भीडुस हनतु तु अला नासरत नगर रा सोठऊ जेऊ पिनु।

दत यीशु सिङ गलील जिलऊ सिङ इलाकऊ जेऊ, अला गोप मीपङ दोऊ तुसिङ तु। दोपङ ओशि गोप मीपङरा कयुफु तु दो शोतमिन नङ बङखोन मातेइ तोइ। दोपोऊ नऊ तचे मतंई, माविनि, मागोइ अला चलमा मालिइ तोइ, अला यीशुस दोपङरा एपो लऊ।

ओदो बसकयङ, गोप मीपङ यीशु रा जेऊ दोपोऊ नऊ हलम जिवा पङ तोइ। यीशुस दो हलम जिवा पङरा दोपोऊ रत हनतु जैमा शितिङ लोऊ। दो हलम जिवा पङ दयारो हरो टऊ, ”का परमेश्‍वरु छङ तोन।“ भीडु मी पङ बिंऊ पोसु अला दोपङक परमेश्‍वरू तारीफ लऊ ।

दत यीशु गुस सानिश फोबलङक रा चुनायऊ दोपङरा दोक एनु चेला लोऊ। दो खास चेला पङक दोपङ नङ ञमफो हलतु अला दोऊरत एपो कमचित सिखयतु।