34. लफमा शितिङ यीशुस गोप कोथा पङ सुनायऊ।

यीशुस परमेश्‍वरु राज्‍यु बारे अलित गोप कोथा पङ सुनायऊ। इत कमचित, दोक लोऊ, “परमेश्‍वरु राज्‍यु इत राइऊ पुजतु खोता तोइ दोरा ऊङकि एनु रिऊ नंऊ पुतु पिनु तोइ। किनपङ सेसि राइऊ पुजत सिङ पुजत पोऊ नंऊ थोनतु चिगित तुइ।”

“दत राइ चोऊ चेइ वंऊ जेइ दत दो रिऊ नंऊ सिङ बोठङ पोरत थोनतु चेइ वंऊ जेइ, ओनचे चेइ कि प्‍यात तु दोऊ डालङु थोरिङ शवनु पोसि।

यीशुस इत अलित कोथा लोऊ, “परमेश्‍वरु राज्‍य सुरि बरकजनु खोता तोइ दोरा कयुफु दो योबलङक सिङ तिसङु नंऊ कुऊ पिनि दत दो सिङ तिसङु फैलतु जेइ।”

“परमेश्‍वरू राज्‍य दो खजानंऊ खोता तोइ दोरा ऊङकि रिऊ नंऊ ञंऊ तऊ। ऊङि अलित मी रा दो खजाना पोरतु अला दोक दोरा गिनमा शितिङ हत खुसि लऊ। ओदोक दोगुस दोरा हेलि बंऊ पिनु। दो ओनचे गरीस तोइ कि दोगुस जेऊ एनु सिङ- सङ रंऊ पिनु छू लोननङ दो ओदो री रा छोङमा लिइ ओदा दो खजाना ञङमिन तोइ।”

“परमेश्‍वरू राज्‍य इत हत कीमती संखमा मोतिऊ खोता तोइ। दत ऊङ लि छोंईसा दोरा गिनि दत दो दोरा छोङमा शितिङ एनु सिङ-सङ रंऊ पिनि।”

ओदा तचे ता मी ओशि सुनचति तोइ कि परमेश्‍वर ओदोक दोपङरा गिनि छु लोननङ दोपङ एपो लेन लऊ ततु। जि मीपङ ओशि मीपङरा एपो मातति तोइ दो मीपङ एमपोऊ खोता लेन मालई तोइ। ओदोक यीशुस दोपङरा ओइ कोथा लोऊ: “निश फोबलङक तोइ अला निशो परमेश्‍वरू रा कोलङ लमा शितिङ थानङु जेऊ। दोपोऊ नंऊ इत माबला थइ सा तोइ, अला अलित इत धर्मु गोबा तोइ।”

“दो धारमिक गोबास ओशि कोलङ लऊ कि, “हे परमेश्‍वर, कन ओरछे तो कि ग अलित मी पोऊ खोता डाकू, माएपो मी, हलम लेन लई सा, या बसकयङ जा पोसि दो माबला थ्ई खोता पापी मातोक।”

“इत कमचित, ग हफ्‍तऊ निश फेरा व्रत तइ तोक, अला ग अङरा पोरति रूपया नङ छलऊ सा हिसा कनरा खेसि तोक।”

“दत दो माबला थईसा दो धारमिक गोब नङ हत वरि डेन वंऊ पोसु। दोक थोरिङ स्‍वर्गु फोक मी लि माथुऊ। ओदो बसकयङ, दोक एनु मुठी गुस एनु छती रा तोंऊ अला परमेश्‍वर रा कोलङ लऊ, ‘हे परमेश्‍वर, अङरा पापङ तत छु लोननङ ग इत पापी तोक।”

दत यीशु गुस लोऊ, “ग कनरा दिमलेओ रिंऊ तोक, परमेश्‍वरुस दो माबला थइ सऊ बिनती गोऊ अला दोरा एपो मी लोऊ। दत दोक दो धारमिक गोबऊ बिनती रा मागिनमा लऊ। परमेश्‍वर सिङ इत घंमडिऊ पिशा रा ओपङ लई, दत लि दो सिङ रा एपो लई दो एनरा परमेश्‍वरु तुसिङ झुकयारो।”