36. यीशुउ रूअङ बोदलतु।

इ दयार, यीशुस एनु हुम चेला पङ, पतरस, याकूब, अला यूहन्‍ना रा एन नङ ञमफो किऊ। (जि यूहन्‍ना मिनु चेला ओदो मी दो मेन दोगुस यीशु रा संखमा डुबयतमा खेऊ तोइ।) दोपङ परमेश्‍वर रा कोलङ लमा शितिङ इत थोनपो डोङखङु जेऊ।

ओदोसपरिङ यीशु परमेश्‍वर रा कोलङ लऊ तोइ दत दोऊ मोमि नीऊ खौता छति वंऊ जेऊ। दोऊ गस्‍कुला छतिऊ खौता छंई वंऊ जेऊ, हले मुलुकु नंऊ ऊङ लि लरो ओदो बसकयङ लि छंई।

दत मूसा नङ एलिय्‍याह भविष्‍य लोइ सा दा छतिऊ खोता तु। ओइ फोबलङक जि मुलुकु नंऊ देसङ बसकयङ सैकडों बोषङ होमशित थलतो पोसि तोइ। दोपङक यीशु रा दोऊ सीमंऊ बारे लोऊ, छु लोननङ दो हसल ओ यरूशलेमु सिइ सा तोइ।

ओदोसपरिङ मूसा नङ एलिय्‍याह यीशु नङ कमचित लोऊ तोइ दत पतरसुस यीशु रा लोऊ, “ऊलपङरा शितिङ ओया तोमा एपो तश। ऊलपङ हुम जागा रा जुरारे, इत कन शितिङ, इत मूसा रा अला इत एलिय्‍याह रा शितिङ। “दत लि पतरस मासेसि तोइ कि दो छे रिंऊ तश।

दत पतरस कमचित लोऊ तोइ, दत इत चमकयति जू ओपङ दोपोऊ थोरिङ तु छायतु। दत दोपङक जू नंऊ इत कत तुइ गोऊ। दौगुस लोऊ, “जि अङ छङक जीरा ग हत बेन्नङ लइ तोक। ग दोऊरत गरीस तोक। दोऊ गोमा।” दो हुम चेला पङ बेऊ मटङु थोरिङ लेटतु पिनु।

दत यीशुस दोपङरा थनु अला लोऊ, “थाबेरिश। अनतिश।” दत दोपङ नोपा-जिपा खोनु, दो ओदा तोइ दो लेम यीशु ओ तोइ।

यीशु नङ दो हुम चेला पङ दो डोङखङु पोलठतु ओपङ तु। दत यीशुस दोपङरा लोऊ, “देसङ ओया वङमिन दो ऊङरयो मालोमा। ग हसल ओ सिइ अला हे सारस वंई। दोऊ ज्ञपतिङ, किमपङ मीपङरा लोमा लिइ।”