37. यीशु लाज़र रा सिऊ थलत हेलि जिंदा लई।

लाज़र मिनु इत मी तोइ। दोऊ निश बियम तोइ दोनिशु मिन मरियम नङ मार्था तोइ। दोपङ सिङ यीशु नङ हत पङगोत तोइ। इ दयार, उङीस यीशु रा लोऊ कि लाज़र हत शोतमिन तशे। दत यीशु ओशि गोऊ दत दोक लोऊ, “जि शोत लाज़रू सिऊ ज्ञपतिङ लि माकयइ। ओदो बसकयङ, ओइ मी पङरा परमेश्‍वरू आदर लमा शितिङ लोइ।”

यीशु एनु मीं पङरा हत बेन्नङ लई तोइ, दत लि ओदा दो तोइ तोइ दोगुस निश दयार शम शुंऊ पोसु। ओदो निश दयारू ज्ञपतिङ, दोक एनु चेला पङरा लोऊ, “जिरश पोलठतु यहूदिया प्रदेश फौक जेते।” चेला पङक जवाब खेऊ, “दत लि हे गुरू, जोदे गटो यो टेम वंऊ ओदतु मी पङ कनरा सतमा गिनु तशे। यीशुस लोऊ, “ऊलपोऊ पङगोत लाज़र ञोनमिन तश, अङरा दोरा अनमा तो।”

यीशुउ चेला पङक जवाब खेऊ, “हे प्रभु, छे लाज़र ञोननङ, दो एपो वंई या।” दत यीशुस दोपङरा एपोस लोऊ, “लाज़र सिऊ कयामिन। ग गरीस तोक कि ग ओदा मातोरेक, छु लोननङ किमपङ अङ थोरिङ दैङ लमा लीरो।”

दत यीशु लाज़रू देशङु पुतु दा ता लाज़र सिऊ प दयार वङ कयऊ तोइ। मार्था यीशु रा छुशमा शितिङ दकपा तु दत लोऊ, “हे प्रभु, का ओया तोननङ अङ बेते मासिइ तोइ। दत लि ग दैङ तारोक छै लि का परमेश्‍वरु रत थारोन दो कनरा खेसतो।”

यीशुस जवाब खेऊ, “सिऊ लि जिंदा अला जिंदा तोक। ऊङ लि अङ थोरिङ दैङ तई दत लि दो सीनङ दत लि दोरा जोलोम पोरति। ऊङ लि अङ थोरिङ दैङ तानङ दो तशपयो मासिइ। का छे ओइऊ थोरिङ दैङ तई या?” मार्थास जवाब खेऊ, “हे परमेश्‍वर, ग दैङ तारोक कि का परमेश्‍वरु छङ मसीह तोन।

दत मरियम तु। दोक यीशुउ बङखौनु दतु लोऊ, “हे प्रभु, का ओया तोननङ अङ बेते मासिइ तोइ।” यीशुस दोरा शुऊ, “किमपङक लाज़र रा अमा तामिन?” दोपङक दोरा लोऊ,“ कब्रु नंऊ। जिरा अला खोनु पिन।” दत यीशु करपु पिनु।

दो कब्र इत गुफा तोइ दोरा डोङखङ खोदऊ जुरामिन तोइ। दत यीशु कब्रु रा पुतु दत दोगुस दोपङरा लोऊ, “रा र थुतु पिननिश।” दत मार्थास लोऊ, “दोरा सिऊ प दयार वङ कयऊ। दोननऊत डिमा तुइ।”

यीशुस मारथा रा जवाब खेऊ, “गस कनरा मारिङरेक आ का अङ थोरिङ दैङ मालननङ दत परमेश्‍वरु शेत रा खोनि?” ओदोक दोपङक रा थुतु पिनु।

दत यीशुस थोरिङ स्‍वर्गु फोक खोनु लोऊ, “हे अपा, अङ कमचित गोमा शितिङ ग कनरा पेरततोक। ग सेसि कि का सोदयो अङ गोइ, दत लि गस जि ओया डेन सिङ मी पङरा पङगोत लमा शितिङ रिंऊ छू लोननङ जि पङ दैङ लरो कि कस अङरा पिनपिनसु।” दत यीशुस कत टऊ, “हे लाज़र, दकपा हनतु जिरा।”

दत लाज़र दकपा हनतु तु। दो अला लि कफनुस लिपटतमिन तोइ। यीशुस दोरा लोऊ, “ओइ कफन रा हनमा शितिङ दोऊ पङगोत लततिश अला दोरा आजाद लऊ पिनमा।” ओशि लऊ ज्ञपतिङ गोप यहूदी पङक यीशूउ थोरिङ दैङ लऊ।

दत यहूदी पोऊ धरमु गोबा पङ यीशूउ रत माशोंऊ, ओदोक दोपङ प्‍लान लमा शितिङ ञमफौ कटठा वंऊ यीशु नङ लाज़र रा हलै सतमा गिनमा।