50. यीशु हेलि पोलठतु तु।

मोच्‍चेमेननङ निशहजार बोषङुस, मुलुकु सिङ जागऊ नंऊ गोप- गोप मी मसीह यीशुउ बारे एपो कमचित पङ गोऊ तोइ। कलीसिया तरक्‍की लऊ तश। यीशुस वादा लऊ तोइ कि दो मुलुकु अंत वङमा परिङ पोलठति। दत लि दो अला लि पोलठतु मतु तश, दत लि दो एनु वादा रा पूरा लरो।

ओदिसपरिङ ऊलपङ यीशु पोलठतु तुरो रिंऊ शुंऊ पोसि, परमेश्वर ऊलपोऊ नंऊ ओशि रिवाजुस जिंदगी जियामा खुसि लऊ तश ओदो संखमा तश अला दोरा आदर खेरो। ओसपरिङ यीशु मुलुकु पौसमा परिङ दोगुस लोऊ, “अङ चेला पङ मुलुकु सिङ जागऊ मी पङरा परमेश्वरू राज्‍यु बारे एपो कमचित पङरा लोरो, अला दत मुलुकु अंत वङरो।”

गोप मीपङक अला लि यीशुउ बारे मागोऊ तोइ। स्‍वर्गु पोलठतु जेमऊ होमशित, यीशुस मसीही पङरा दो मी पङरा एपो कमचित लोमा शितिङ लोऊ दोपङक ओइ तशपयो मगोऊ तोइ। दोगुस लोऊ, “जेरिश अला सिङ जातु मीपङरा चेला लततिश।” अला “खोमा शितिङ रिऊ नंऊ फोलङ शोमिन तश।”

यीशु ओशि लि लोऊ, “ऊङि मिऊ नुकुर एनु मालिक बसकयङ चेइ मतुइ। ओइ मुलुकु सिङ मीस अङरा मडामा लऊ, अला अङ लमिन दोपङ किमपङरा लि ङनचेन लइ अला सतु पिनरो। ओइ मुलुकु किमपङ शोति लि, दत लि शेच्‍चन वङमा, छु लोननङ गस शैतान रा हरायऊ पिनु, ओदो ओइ मुलुकु नंऊ हुकुम चलई तोइ। दत किमपङ कयामा शम अङ थोरिङ दैङ तामा, दत परमेश्वर किमपङरा बचासतो।”

यीशुस एनु चेला पङरा ओइ सोमजामा शितिङ इत कोथा सुनायऊ कि ओसपरिङ मुलुकु अंत वङरो दत मी पङनङ ञमफौ छै वङरो। दोगुस लोऊ, “ऊङि मीस एनु रिऊ नंऊ एपो पुजत पुतु। ओसपरिङ दो ञोनु तोइ दत दोऊ दु:शमोन तु अला ब्रुऊ पुजत पोऊ किललिङ जंगलु सोलतु पुजत पङरा पुतु पिनु, अला दत दो जेऊ पिनु।”

“ओसपरिङ सोलत वङमा परिङ नुकुर पङक दो मीरा लोऊ, “हे मालिक, कस ता रंऊ रिंऊ नंऊ एपो पुजत पुतु तोइ। दत ओइनंऊ जंगलु सोलत छु तश? ‘दो मीस जवाब खेऊ, “लेम अङ दु:शमोन ओ ओशि लमा लिइ। जि अङ ऊङि दु:शमोन ओ वङरो दोगुस ओशि यो लमिन तश।”

“दो नुकुर पङक एनु मालिक रा जवाब खेऊ, “छे ऊलपङरा बोनऊ सोलत पङरा फुलु पिनमा गिनमेया? ‘दो मालिकुस लोऊ, मेन। दत किमपङ ओशि लननङ किमपङ गटो ब्रू रा लि फुलु पिनि। खोनि शम शुङरिश। दत बोनङु सोलत पङरा इ जागऊ कटठा लऊ पिननिश दत किमपङ दोरा रोतमा लीरोश। दत ब्रू रा अङ ढैरिऊ रा क्युफु तुमा”

चेला पङ ओइ कोथऊ मोतलब मासमजतु, ओदोक दोपङक यीशु रा दोपङरा सोमजामा शितिङ लोऊ। यीशुस लोऊ, “एपो पुजत पुति सा मी मसीह रा कनु तश। री मुलुक रा कनु तश। एपो पुजत परमेश्वरु मी पङरा कनु तश।”

“जंगलु सोलत दो हलम मी, शैतानु मी पङरा कनु तश। दो मिऊ दु:श्‍मोन शैतान रा कनु तश। दोगुस बोनङु सोलत पङरा पुतु पिनु तोइ। खौमा ओइ मुलुक कयामा परिङ दो कनु तश। अला खोइ पङ परमेश्वरू स्‍वर्गदूत पङरा कनु तश।”

“ओसपरिङ मुलुक कयऊ जेइ दत स्‍वर्गदूत मी दो सिङ मी पङरा ञमफौ कटठा लइ दोपङ शैतान तोश। दो स्‍वर्गदूत मी दोपङरा इत गोप कोसरा मेंऊ नंऊ पयऊ पिनि। ओदा दो मीपङ हत करपि अला एमपोऊ सवा करिसि। दत ओदो मी धोरोमु तश, दोपङक यीशू रा मोनऊ, दोपोऊ परमेश्वर अपऊ राज्‍यु निंऊ खोता चमकयति।”

यीशुस ओशि लि लोऊ कि दो मुलुक कयामंऊ होमशित मुलुकु पोलठतु तुइ। दो ओशि यो पोलठतु तुई हले दो जेऊ तोइ। दत, दोऊ रा एनु ओसली डियङ वङरो, अला दो नमु नंऊ जुऊ थोरिङ शोखु तुइ। ओसपरिङ यीशु पोलठति, दत सिङ- सङ मसीह दोपङ सी कयऊ तश सिऊ लि जिंदा वंइ अला दोरा नमु नंऊ छुशि।

दत दो मसीही अला लि जिंदा तोइ दोपङ नमु नंऊ यपु जेइ अला दो अलित मसीहि पङ नङ ञमफौ वंऊ जेइ दोपङ सिऊ थलत लि जिंदा वंऊ जेइ। दोपङ सिङ ओदा यीशु नङ ञमफौ वङरो। दोऊ ज्ञपतिङ, एनु मी पङ नङ ञमफौ पोसि। ओसपरिङ दोपङ इत वंऊ ञमफौ पोसनङ दत दोपोऊ रा सोदयो संवङना वङरो।

यीशुस दोऊ थोरिङ दैङ लमा शितिङ सिङ मी पङरा इत मुकुट खैसतोक लोऊ वादा लऊ। दोपङ सोदयो परमेश्‍वर नङ ञमफौ सिङ छलऊ थोरिङ राज लरो। दोपोऊ रा गोप संवङना वङरो।

दत परमेश्‍वर दो सिङ मी पोऊ इंसाफ लरो दोपङ यीशुउ थोरिङ दैङ मालइ तश। दो दोपङरा नरगु पिनु तइ। ओदा दोपङ करपि अला रंऊ सवा करिसि,अला दोपङ अमबोरो दु:खङु ओ पोसतो। तशपयो माबयुइ मैं दोपङरा दयारो रोतु पोसि, अला ओङक दोपङरा जामा शितिङ तशपयो मारुकयति।

ओसपरिङ यीशु पोलठति, दत दो होमयो शैतान रा नङ अला दोऊ राज्‍य रा खौतोम लऊ पिनि। दो शैतान रा नरगु पिनु तइ। ओदा शैतान ओमबोरो यो रोशु पोसि, दो सिङ नङ दोपङक परमेश्‍वरु कमचित गोमा बसकयङ शुनऊ ज्ञपतिङ विनु जेमा गिनु तोइ।

छु लोननङ आदम नङ हव्‍वास परमेश्‍वरु कमचित मागोऊ अला पाप रा ओइ मुलुकु कयुफु तु तोइ, परमेश्‍वरुस दोरा शाप खेउ अला दोरा खोतोम लमा शितिङ फैसला लऊ। दत अलित दयार परमेश्‍वर इत सरपा स्‍वर्गु अला इत सरपा मुलुक जुरारो दो सिदद वङरो।

यीशु नङ दोऊ मीपङ दो सरपा मुलुकु पोसि,अला दोपङ सोदयो सिङ छला पोऊ थोरिङ राज लरो। दो मी पोऊ मिंऊ सिङ मिसती रा सुऊ पिनरो। छङ ऊङो दु:खङुस मावङरो। दोपङ छङ माकरपि। दोपङ माशोति अला मासिइ। अला ओदा छोयो हलम मावङरो। यीशु एनु राज्‍यु पुरा लोगोनुस ,अला एपोस राज लरो। दो सोदयो एनु मी पङ नङ ञमफौ पोसतो।