49. परमेश्वरू सरपा वादा।
इत स्वर्गु मीस इत चिओस योबलङक मरियम रा लोऊ कि दो परमेश्वरू छङक रा जोरमयइ। दो अला कुवांरी तोइ, दत संखमा जिवा दोऊ तुसिङ तु दो खोकु चिगजा नङ वंऊ। दोगुस इत छङ जोरमयऊ दोऊ मिन दोगुस यीशु तऊ। ओदोक, यीशु परमेश्वर नङ मी निशो तोइ।
यीशुस गोप चमतकार लऊ दो तङमा तुइ कि यीशु ओ परमेश्वर तो। दो तिऊ थोरिङ विनु अला होलडो रा डेममा मतु। दोगुस गोप शोति मी पङरा एपो लऊ अला गोप मी पोरत हलम जिवा पङरा हनु पिनु। दोगुस सिइ मी रलि जिंदा लऊ, अला दोगुस ङा रोटि अला निश मछस रा ङा हजार मी पङरा खोक बुङ थकतु खेऊ।
यीशु इत एपो मास्टर लि तोइ। छे लि दोगुस दोपङरा सिखायऊ, दो दोगुस एनु पूरा मोनङुस सिखायऊ। छे लि दो मी पङरा लमा शितिङ लोइ तोइ दो दोपङरा लमा गिनमा छु लोननङ दो परमेश्वरू छङक तो। इत कमचित, दोगुस सिखायऊ कि किमपङरा मी पङरा ओदोऊ खोता यो बेन्नङ लमा गिनमा हले किमपङ रङ रा गोरङ लइ तश।
दोगुस ओशि लि सिखायऊ कि किमपङरा सिङ छला बसकयङ खुचि अला रंऊ जङ- मूल बसकयङ लि खुचि परमेश्वर रा बेन्नङ लमा गिनमा।
यीशुस लोऊ कि मुलुकु हले लि छला गिनमा बसकयङ एपो तश परमेश्वरू राज्यु तोमा। दोऊ राज्यु नंऊ जेमा शितिङ जुरुरी कि परमेश्वर किमपङरा किमपोऊ लमिन पापुस बचारो।
यीशुस लोऊ कि तचे ता मी पङ दोरा मोनई। परमेश्वर दो मी पङरा बचारो। दत अलित मी पङ दोरा मामोनइ। दोगुस ओशि लि लोऊ कि तचे ता मी पङ एपो मटङु खौता तश, छु लोननङ दोपङ यीशुउ बारे एपो कमचित रा गोइ तोइ,अला परमेश्वर दोपङरा बचइ। दत तचे ता मी ओमपु करंई रऊ खौता तश। परमेश्वरू वचन पुजतु खोता ओमपु दति, दत लि ओदा छोयो माचोइ। जि मी पङ यीशुउ बारे फरिनतन रा मागोइ खुङक वंऊ जेऊ। दोपङ दोऊ राज्यु जैमा शितिङ मना लऊ पिनि।
यीशुस सिखायऊ कि परमेश्वर पापी पङरा हत बेन्नङ लई तश। दो दोपङरा माफ लमा गिनु तश अला दोपङरा एनु चिगजा जुरामा गिनु तश।
यीशुस ओशि लि लोऊ कि परमेश्वर पाप रा माडई तो। छु लोननङ आदम नङ हव्वास पाप लऊ, ओदोक दोपोऊ चिगजा पङक लि पाप लऊ। ओइ मुलुकु पोसि सिङ मी पाप लइ अला परमेश्वरू रत वरि तश। सिङ मी पङ परमेश्वरू दु:शमोन तश।
दत परमेश्वरूस ओइ मुलुकु पोसि सिङ मी पङरा ओशि एपो लऊ, दोगुस एनु इपोटोक छङक रा खेऊ पिनु दत परमेश्वर दोपङरा सजा माखेरो उङ लि दोऊ थोरिङ दैङ लऊ तश। ओदो बसकयङ, दोपङ दो नङ ञमफो अमबोरो यो पोसतो।
किमपङ सिइ सा तश, छु लोननङ किमपङक पाप लमिन तश। परमेश्वर किमपोऊ थोरिङ, खरोसमा एपो यो तश, दोऊ ज्ञपतिङ, दो यीशुउ थोरिङ छिङना तंऊ। दोगुस यीशु रा क्रूसु थोरिङ सीमा शितिङ सजा खेऊ।
यीशुस तशपयो पाप मालमिन तोइ, दत लि दोगुस परमेश्वर रा एनरा सजा खेमा मतु। दो सीमा गोमु। ओदोक ओ, किमपोऊ पाप रा अला ओइ मुलुकु पोसि सिङ मी पोऊ पाप रा थुतु किमा शितिङ दो इत मरि पुजा तशे। यीशुस एनरा परमेश्वर रा शितिङ पुजा तिऊ पिनु, ओदोक परमेश्वर ऊङ लि पापी रा, या बसकयङ बेमा थङक पाप रा लि माफ लइ तश।
दत लि किमपङ गोप एपो लेन पङ लननङ, दत दोऊ लमिन परमेश्वर किमपङरा माबचासि। दोऊ पङगोत वङमा शितिङ ओशि छोयो मातेइ दो किमपङ लमा लीरो। ओदो बसकयङ, किमपङरा दैङ तामा कि यीशु परमेश्वरू छङक तो, अला किमपोऊ कला क्रूसु थोरिङ सिऊ जेऊ, अला ओइ लि कि परमेश्वर दोरा हेलि जिंदा लऊ पिनु। दत किमपङ ओइऊ थोरिङ दैङ लननङ, दत परमेश्वर किमपोऊ पाप लमिन दो माफि खेसतो।
परमेश्वर दो सिङ मी रा बचारो दो यीशुउ थोरिङ दैङ तारो अला दोरा एनु प्रभु तततो। दत दो दोपङरा माबचइ दो दोऊ थोरिङ दैङ मालइ। जि छोयो माखौनि कि किमपङ छुकपो तोश या मेतपो तोश, योबलङक तोश कि फौबलङक तोश, गतपो तोश कि शरा तोश, या किमपङ अमा पोसि तोश। परमेश्वर किमपङ रा बेन्नङ लइ तश अला ओशि गिनि कि किमपङ यीशुउ थोरिङ दैङ लरो कि दो किमपोऊ पङगोत वङमा लीरो।
यीशु किमपङरा कुकुशु तो कि किमपङ दोऊ थोरिङ दैङ लरो अला संखमा तिऊ डुबयतमा। छे किमपङ दैङ लइ तोश आ कि परमेश्वरू इपोटोक छङक, यीशु ओ मसीह तो। छे किमपङ दैङ लइ तोशा कि किमपङ पापी तोश अला ओइ लि कि किमपङरा परमेश्वर सजा खेमा गिनमा? छे किमपङ दैङ लई तोशा कि किमपोऊ पाप रा शिमा शितिङ यीशु क्रूसु थोरिङ सिऊ?
दत किमपङ यीशूउ थोरिङ अला छे दोगुस किमपोऊ शितिङ लमिन तश दोऊ थोरिङ दैङ लननङ, दत किमपङ इत मसीही तोश। शैतान एनु खबङबङु राज्यु छङ किमपोऊ थोरिङ हुकुम माचलारो। छङ परमेश्वर एनु छतिऊ राज्यु किमपोऊ थोरिङ हुकुम चलारो। दोगुस किमपङरा पाप टेखयऊ ततासु, दोरा किमपङ लइ तोरेश। दोगुस किमपङरा इत सरपा, एपो जोलोम खेसु तश।
दत किमपङ इत मसीही तोननङ छे यीशुस लऊ दोऊ लमिन परमेश्वर किमपोऊ पाप लमिन दो माफ लमिन तश। छङ, परमेश्वर इत दु:शमोन बसकयङ किमपङरा इत एपो पङगोत तति तश।
यीशुउ का परमेश्वरू पङगोत तोन अला प्रभु यीशुउ नुकुर तोननङ किमपङ ओदो कमचित पङरा गोमा गिनमा छेलि यीशु किमपङरा सिखयासतो। दत लि किमपङ मसीह तोश, शैतान अला लि पाप लमा शितिङ किमपोऊ इम्तिहान किरो। दत लि परमेश्वर अमबोरो दो लइ तश दो छे रिंइ ओदो लइ। दो रिंइ कि किमपङ एनु पाप लमिन दो मोनतमा, दत दो किमपङरा माफ लऊ पिनि। दो किमपङरा पापु खिलाफ तोंङकमा शितिङ सोततिङ खेसतो।
परमेश्वर किमपङरा दोरा मोनमा अला दोऊ वचन रा लफमा शितिङ रिंऊ तो। दो किमपङरा अलित विश्वासी पङ नङ ञमफौ पोसु दोरा अराधना लमा शितिङ लि रिंऊ तश। किमपङरा अलित मीपङरा लि लोमा वंइ कि दोगुस किमपोऊ शितिङ छे लऊ । दत किमपङ ओइ सिङ लेन पङ लननङ, दत दो किमपोऊ इत पका पङगोत वंऊ जेइ।
रोमियों- 3:21-26,5:1-11, यूहन्ना-3:16; मरकुस-16:16; कुलुस्सियों 1:13-14;2 कुरिन्थियों 5:17-21;1, यूहन्ना-1:5-10 गुस इत बाइनलु कोथा।
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।