7. परमेश्‍वर याकुब रा बोरङ खेई।

दो चिगजा पङ चेई वंऊ दत याकुब रा क्‍युमु पोसमा एपो जेऊ, दत एसाव रा छुमा पङरा सतमा एपो जेऊ। रिबकास याकुब नङ बेन्‍नङ लऊ, दत इसहाकुस एसाव नङ बेन्‍नङ तऊ।

इ दयार, एसाव शिकार लऊ पोलठतु तु दत दो हत ओनठुस तोई। एसावुस याकुब रा लोऊ, “कस छे जुरामिन तो दोननंऊ मोच्‍चे थकतु अङरा लि खे। “याकुबुस लोऊ, “होमशित अङरा वादा लत का अङरत चेइ तोमा नङ सिङ छे लि कनरा पोरतमा गिनमा, दो सिङ का अङरा खेसमा।” दत एसावुस सिङ छला याकुब रा खेमा वादा लऊ पिनु। दत याकुबुस दोरा मोच्‍चे थकतु खेऊ।

इसहाक एसाव रा बोरङ खेमा गिनु तोइ। दत दोक ओशि लमा बस्‍कयङ, रिबका नङ याकुबुस दत याकुबुस एसाव वङमा रा कनु दत दोरा कवश लोऊ। इसहाक गतपो तोई अला छङ खोनमा मलिइ तोई। दत याकुबुस एसाव रा गस्‍कुला चुख्‍मा नङ तेतु पख्‍फा रा गोलंऊ नङ गुतु परिनलऊ पिनु।

याकुब इसहाकु रा जेऊ दत लोऊ, ”ग एसाव तोक। ग ओदोक तु का अङरा बोरङ खे।“ दत इसहाकुस तेतु करा तो ततु अला गस्‍कुला रा मुनु, दत दोक सुनचतु दो एसाव तो अला दोरा बोरङ खेऊ।

एसाव याकुबु रत जलतु छु लोन नङ याकुबुस दोऊ छङकु हक रा अला ञमफो दोऊ बोरङ रा लि खुतु पिनु। दत दोक दोऊ अपा सिऊ ज्ञपतिङ याकुब रा सतमा सुनचतु।

छु लोन नङ रिबकास एसावु कमचित गोऊ तोइ। दत दो नङ इसहाकुस याकुब रा दोऊ पेरङ नङ पोसमा शितिङ हत वरि पिनु तोइ।

याकुब गोप बोषङ शम रिबकऊ पेरङ नङ पोसु। दो बैलऊ दोक जन्‍नेटङ लऊ अला सनिश छङ नङ इत चमेत रा जोरमयऊ। परमेश्‍वरूस दोरा हत छुकपो लऊ पिनु।

निसा बोषङु शम कनानु नंऊ रंऊ कयुमुस वरि पोसु ज्ञपतिङ, याकुब एनु पेरङ, एनु नुकुर, नङ एनु छुमा पोऊ सिङ शालङ नङ ञमफो ओदा पोलठतु तु।

याकुब ओदोक हत बेऊ तोइ छु लोन नङ दोक सुनचतु एसाव अला लि दोरा सतमा गिनु तश। ओदोक तोफऊ खोता छुमऊ शालङ रा एसावु रा पिनु। दो नुकुर दो शालङ पङरा कयुफु जेऊ दत लोऊ, “कन नुकुर याकुब, जि छुमा पङरा कनरा खेसतो। दो हसल ओ तु तश।”

दत एसाव छङ याकुब रा नाशङ पिनमा मागिनि तोइ। ओदो बसकयङ, दो दोरा इ फेरा खोनु हत गरीस सिऊ। दोऊ ज्ञपतिङ याकुब कनान देशु नंऊ एपो पोसु। दत इसहाक सिऊ जेऊ दत याकुब नङ एसावुस दोरा बंऊ पिनु। परमेश्‍वरूस दो वादा अब्राहम नङ लमिन तोइ दो छङ इसहाकु रत याकुबु रा तु तोइ।