6. परमेश्‍वर इसहाक रा शितिङ इन्‍तजाम लऊ।

ओसपरिङ अब्राहम गतपो वंऊ तोइ दत दोऊ छङ, इसहाक, इत शरा मीं वंऊ जेऊ तोइ। ओदोक अब्राहमुस एनु इत नुकुर रा ऐनु छङ इसहाक रा शितिङ ओदो देशु इत योबलङ सुमा पिनु ओदा दोऊ पेरङ पोसि तोइ।

अब्राहमु पेरङ दा पोसि तोइ ओदो देशु जेमा इत चेई सैलिऊ ज्ञपतिङ परमेश्‍वरुस दो नुकुर रा रिबका नङ मिलायऊ। दो अब्राहमु बियमु कोत तोई।

रिबका एनु पेरङ रा सोठऊ दो नुकुर नङ ञमफो पोलठतु जेमा यऊ। हले या दोपङ पुतु इसहाकुस रिबका नङ जन्‍नेटङ लऊ पिनु।

इत चेई बेलऊ ज्ञपतिङ, अब्राहम सिऊ जैऊ। दत परमेश्‍वरुस अब्राहमु छङ इसहाक रा, अब्राहम नङ छुतमिन वादऊ लमिन बोरङ खेऊ। दो वादऊ नंऊ परमेश्‍वरुस लोऊ अब्राहमु गोप वंश पङ वङरो। दत लि इसहाकु योबलङक रिबकऊ छोयो चिगजा मावंऊ तोइ।

इसहाकुस रिबका रा शितिङ प्राथना लऊ, अला परमेश्‍वरुस दोरा निश जुडवा चिगजा वङमा बोरङ खेऊ। दो टेमु दो निश चिगजा रिबकऊ खोकु तोइ, दो निश एनिशु नऊ तोङकि तोइ, ओदोक छे लि वंऊ तशे दो सिङ रिबकास परमेश्‍वर रा लोऊ पिनु। " परमेश्‍वरुस रिबका रा लोऊ, “का निश छङ रा पैदा लई। दोऊ वंश पङ खेचो- खेचो जातु वङरो। दो इत नङ अलित नङ ञमफो तोङकि। दत चेई छङकु चिगजा रा चिगित छङकु वंई चिगजऊ कमचित गोमा वई। "

ओसपरिङ रिबकऊ छङ पङ जोरमयतु, दत चेई छङ मई नङ गोप करा नङ तोइ, दत दोक दोऊ मिन एसाव तऊ। दत चिगित छङ एसावु ठोङोल रा चुमु जोरमयतु तोइ, अला दोऊ मिन याकुब तऊ।